Read Kivunjo New Testament 1999 1 Wakorinto 3 Bible Online

1 Wakorinto 3 - Kivunjo New Testament 1999 bible

1 Wakorinto 3

¹Kyaindi, wana wa wama wako, inyi ngyileiṙima iṙeṙa na nyoe cha wandu wawoṙe mkaṟo ya kyimrima-pfo, indi cha wandu wawoṙe mkaṟo ya kyimmbiu, cha wana wanangu kyiiṙi kya Kristo.

²Ngyilemuenenga maruwa, ngyilemuenenga kyelya-pfo; cha kyipfa mulekomokyiiṙima-pfo. Yee, maa wulalu mokyiiṙima-pfo,

³cha kyipfa mṟasa wulalu nyoe nyi wandu wa mkaṟo ya kyimmbiu. Kyipfa kokooya konyu kuwoṙe wunyenyi na wuṟiingyi, ngyesa nyoe chi wandu wa mkaṟo ya kyimmbiu-pfoe? Lyingyi-se mokyewuta kui mbaṟe ya kyimndu?

⁴Kyipfa kyiyeri-kyo mndu umwi ekyegamba, “Inyi nyi o ura lo Paulo,” na ungyi, “Inyi nyi o ura lo Apolo,” ngyesa nyoe chi wandu-pfoe?

⁵Kyasia Apolo nyi wui? Na Paulo nyi wui? Nyi waṟundi walya kui wo muleiṙikyia Ruwa na orio mndu chandu Ruwa alemuenenga wuiṙimi.

⁶Inyi ngyilewaaya, Apolo kanyosa; indi mong'anyisa nyi Ruwa.

⁷Koikyo mowaaya chi kyindo-pfo, maa monyosa, indi Ruwa ekyeng'anyisa.

⁸Kyasia ulya mowaaya, na ulya monyosa nyi kyindo kyimwi, kyaindi orio mndu nechiambilyia wori wokye iṙuana na wukyiwa alelya.

⁹Kyipfa soe lukyeri waṟundi hamwi na Ruwa; nyoe nyi ṙema lya Ruwa, nyi numba ya Ruwa.

¹⁰Iṙuana na isaṟia lya Ruwa ngyileenengo, inyi cha msongoru o wewika numba wawoṙe wuṟango, ngyilewika urende, na mndu ungyi naiwika numba wuye ya urende-lo. Kyaindi orio mndu naambuye chandu aiwika numba wuye ya urende-lo.

¹¹Kyipfa urende lungyi kuwoṙe mndu eiṙima iluwika, sile nyi lulya lulemmbiko, lukyeri nyi Yesu Kristo-pfo.

¹²Kyaindi kokooya mndu awika numba wuye ya urende-lo, sahapu ang'u heleri ang'u magoe ga woguru, ang'u mashiṙi ang'u maṟa ang'u nyatsi, iṟunda lya orio mndu lyechimanyika na pata.

¹³Kyipfa mfiri ulya o ianduyo ochiloṟa iṟunda-lyo na pata cha kyipfa lyechiloṟo moṙonyi; na moṙo ulya ochiyesha iṟunda lya orio mndu, nyi lya mbaṟe iha.

¹⁴Iṟunda lya mndu alyiwikyie wuye ya urende-lo lyilanderumatso nyi moṙo, nechiambilyia wori.

¹⁵Iṟunda lya mndu lyikarumatso nyi moṙo, nechiwaṙa wanda; indi oe nechikyiṟo; kyaindi nyi cha kui moṙo.

¹⁶Muichi kye nyoe mowa hekalu lya Ruwa, na kye Mumuyo o Ruwa nekyekaa mrimenyi konyu?

¹⁷Kokooya mndu anyamaṟa hekalu lya Ruwa, Ruwa nechinyamaṟa mndu-cho. Cha kyipfa hekalu lya Ruwa nyi lyiele, nalyo nyi nyoe.

¹⁸Mndu alakulembe amonyi. Kokooya mndu awona kye nawoṙe wuṟango kyiiṙi kyanyu kunu wuyanenyi, nawe tondo, kundu naiṙime iwa mndu awoṙe wuṟango.

¹⁹Kyipfa wuṟango wo wuyana-wu nyi wutondo mbele ya Ruwa. Cha kyipfa kyikyiṟeie, “Oe nyi oe ekyewaṙa wawoṙe wuṟango ngyeṟonyi tsawo.”

²⁰Na lyingyi-se, “Mndumii naichi makusaṟo ga wawoṙe wuṟango kye chi ga sungusinyi-pfo.”

²¹Kyasia, mndu oose alakushelyie wandu. Cha kyipfa shoose nyi shanyu;

²²kye nyi Paulo, ang'u Apolo, ang'u Kyefa; ang'u wuyana, ang'u moo, ang'u upfu; ang'u shindo shilya shikyeri pfo wulalu, ang'u shilya shekoshikyeri pfo ipfo-ndu luiyenda; shoose nyi shanyu.

²³Na nyoe nyi wandu wa Kristo, na Kristo nyi o Ruwa.