Read Kivunjo New Testament 1999 1 Wakorinto 7 Bible Online

1 Wakorinto 7 - Kivunjo New Testament 1999 bible

1 Wakorinto 7

¹Kyasia ko mbonyi tsa shindo shilya mulengyiṟeia, nyi necha mndu msoṟo alaalyikye.

²Kyaindi kyipfa kya wuṟui orio mndu msoṟo nawaṙe mka okye amonyi, na orio mndu mka nawaṙe mii okye amonyi.

³Mii naenengye mka okye kyilya kyimmbaṟi, na wuṙo na mka naenengye mii okye kyilya kyimmbaṟi.

⁴Mka eiṙima igamba kye mmbiu okye nyi okye amonyi-pfo, indi mmbiu okye nyi o mii okye. Na wuṙo mii alechiiṙima igamba kye mmbiu okye nyi okye amonyi, indi mmbiu okye nyi o mka okye.

⁵Maa mulaimane, sile kofia kyiyeri moiṙikyiana ko kyiyeri kyifuhi, kundu muwone ṙaawa lyeterewa Ruwa; mukooyane-se kyimmbiu, Satana alachemuyesha kyipfa kya iuṟa meena.

⁶Kyaindi ngyigamba isho, iloṟa makusaṟo gako tikyi, na chi kui imuitika-pfo.

⁷Indi kyindo ngyikundi nyi kye wandu woose wawe chandu inyi ngyikyeri. Kyaindi orio mndu nawoṙe kyienengo kyakye amonyi kyiwukyie ko Ruwa, ichu kuṙi na ichu kuṙi.

⁸Kyaindi ngawia walya walandealyikye, na wakusu, nyi nanga wakae chandu inyi ngyikyeri.

⁹Kyaindi kokooya walechiiṙima ikarishia, waalyikye; kyipfa nyi nanga ialyika kuta iwaṙa lango.

¹⁰Kyaindi walya walemualyika, ngawawia; maa iho chi inyi-pfo indi nyi Mndumii; mka alalekane na mii okye;

¹¹kyaindi kokooya nalekana na oe, maa alaalyiko, ang'u naiṙikyiane na mii okye; lyingyi-se mii alaṙe mka okye.

¹²Kyaindi wandu wengyi ngawawia inyi, maa chi Mndumii-pfo; kye kokooya mndu aiṙikyie Ruwa nawoṙe mka alaiṙikyie Ruwa, na mka-cho nakundi ikaa na oe, alalekane na oe.

¹³Na mndu mka, awoṙe mii alaiṙikyie Ruwa, na mii-cho nakundi ikaa na oe, alalekane na mii okye.

¹⁴Cha kyipfa mii ulya alaiṙikyie Ruwa nekyeendo na ko wandu wa Ruwa kui njia ya isanzo na mka okye, na mka alaiṙikyie Ruwa nekyewa kyiwungo kya wandu wa Ruwa kui njia ya mii okye. Kokooya kyilawekyeri kuṙo, wana wanyu wawechiwa wana wa wandu walaiṙikyie Ruwa o loi; kyaindi wulalu nyi wandu wa Ruwa.

¹⁵Kyaindi ulya alaiṙikyie Ruwa kakunda ilekana na ulya aiṙikyie Ruwa, kyikuwiie kuṙo. Iho mii ang'u mka aiṙikyie Ruwa neiṙima iwuta chandu akunda. Wakulekanie ko ufoṟo kyipfa Ruwa nalelulaga luwe wandu wa ufoṟo.

¹⁶Cha kyipfa nomanya kuṙa, iyoe mndu mka, kokooya nochikyiṟa mii opfo? Ang'u nomanya kuṙa, iyoe mndu msoṟo, kokooya nochikyiṟa mka opfo?

¹⁷Kyaindi chandu Ruwa alegawia orio mndu, na chandu Ruwa alelaga orio mndu, nawute kuṙo. Nyi wuṙo ngawia siṟi tsoose.

¹⁸Ngyesa mndu mlyiwe alelago amṙino-pfoe? Alawe cha ilyi alamṙine. Mndu mlyiwe nalelago alaṙino? Kyasia alaṙino.

¹⁹Iṙino chi kyindo-pfo, na iṙa iṙino chi kyindo-pfo; kying'anyi nyi iosha mawawaso ga Ruwa.

²⁰Orio mndu nakae chandu awei lyilya alelago.

²¹Ngyesa nulelago uwe mtumo? Maa ulawone nyi kyiwicho. Kyaindi koiṙima iwa cha mndu alaichilyio nyi kyindo, wa cha mndu alamchilyie nyi kyindo.

²²Cha kyipfa ulya alelago kyiiṙi kya Mndumii ai cha mtumo, icho ai mtumo kyiiṙi kya Mndumii-pfo. Na wuṙo ulya alelago alai mtumo, icho nyi mtumo o Kristo.

²³Muleguṟo kui woguru; maa mulawe watumo wa wandu.

²⁴Wana wa wama wako, orio mndu nakae mbele ya Ruwa akyeri chandu awei lyilya alelago.

²⁵Ko mbonyi tsa walya walawaalyikye na walaalyikyie Mndumii angyiwiie kyindo kyoose-pfo, kyaindi ngyigamba kya makusaṟo gako inyi ngyimonyi, inyi ngyileenengo isaṟia lya Mndumii iwa mndu msimiri.

²⁶Kyasia, ngyiwonyi nyi necha, kyipfa kya wukyiwa wukyeri pfo, kye nyi necha mndu nakae chandu akyeri.

²⁷Ngyesa numlungye tapu na mka opfo? Maa ulakunde iletsano. Numletsane? Maa ulapfule mka.

²⁸Kyaindi kokooya oalyika onyamaṟa-pfo; maa mana o kyika kaalyiko anyamaṟa-pfo. Kyaindi wandu cha iwo mmbiu yawo yechiwalyisa wukyiwa; na inyi ngyikundi iwashingyia walalye wukyiwa.

²⁹Kyaindi, wana wa wama, ngagamba kuṙi, kyiyeri kyitsugai kyikyileshi-pfo. Kyasia wookyia wulalu walya wawoṙe waka wawe cha ilyi walawoṙe;

³⁰na walya wailyia cha ilyi walailyia; na walya waichihiyo cha ilyi walaichihiyo; na walya waiguṟa cha ilyi walawoṙe kyindo.

³¹Na walya wekyekuwinisha na wuyana cha ilyi walaikuwinisha mnu na wuyana; kyipfa shindo sha wuyana-wu shiiṙa.

³²Kyaindi ngyikundi kulawaṙe shindo shemuṟaisha. Ulya alaalyikyie nekyekuwinisha na shindo sha Mndumii, nachihiṟe kuṙa Mndumii;

³³indi ulya aalyikyie nekyekuwinisha na shindo sha wuyana-wu, chandu echihiṟa mka okye.

³⁴Lyingyi-se mana o kyika chi kyimwi na mndu mka mwalyikye-pfo. Ulya alamwalyikye nekyekuwinisha na mbonyi tsa Mndumii, naiṙime iwa mweele kyimmbiu na kyimrima. Kyaindi ulya amwalyikye nekyekuwinisha na mbonyi tsa wuyana-wu, chandu echichihiṟa mii okye.

³⁵Ngagamba isho kundu ngyimuenengye kyiira, chi kye ngyimuoṟowie kyigowo-pfo indi kyipfa kya shilya shichihiṟie, lyingyi-se muiṙime iṟundia Ruwa kulawoṙe shindo shingyi shimkuruo nyoe.

³⁶Kyaindi mndu oose kawona kye aiiṙima ikarishia mbele ya ulya akundi imwalyika-pfo, kokooya lango tsakye tsa mmbiu tsing'anyi, na nyi wuṙo kyiwaṟi iwa, nawute chandu akundi; waalyikane, kuwoṙe wuwicho-pfo.

³⁷Kyaindi ulya alawoṙe lango, aichi ikarishia na ikuringa, kuwoṙe mndu aimwitika ialyika-pfo. Lyingyi-se kokooya mrimenyi kokye nakusaṟie ikaa na oe cha mndu akundi imwalyika, nechiwuta necha.

³⁸Kyasia aalyika ulya akundi imwalyika nawuta necha, na ulya akuringa alaalyikye nawuta necha ngoseṟa.

³⁹Mndu mka namlungye tapu na mii okye kyiyeri mii okye ai na moo; kyaindi kokooya mii okye apfa, neiṙima ialyiko na mndu oose amkundi; kyiiṙi kya Mndumii tupu.

⁴⁰Kyaindi nanga oe kakaa chandu akyeri. Nyi wuṙo ngyiwonyi inyi; na inyi ngakusaṟa kye inyi ngyiwoṙe Mumuyo o Ruwa.