Read Kivunjo New Testament 1999 1 Wakorinto 8 Bible Online

1 Wakorinto 8 - Kivunjo New Testament 1999 bible

1 Wakorinto 8

¹Na mbonyi tsa shindo shaṙasio mafano, luichi kye soe loose luwoṙe wuṟango. Wuṟango wokyeende makushelo, indi ikunda lyekyekarisha iiṙikyia.

²Mndu kakusaṟa kye naichi kyindo, aichi kyindo kyoose chandu kyimmbaṟi imanya-pfo.

³Kyaindi mndu kakunda Ruwa, icho Ruwa namwichi.

⁴Kyasia ko mbonyi tsa ilya shindo shaṙasio mafano; luichi kye ifano chi kyindo kunu wuyanenyi-pfo, na kye kuwoṙe Ruwa ungyi sile umwi tupu-pfo.

⁵Cha kyipfa maa chandu kuwoṙe wekyelago waruwa, ruwewu ang'u wuyanenyi, chandu kuwoṙe waruwa wafoi na wandumii wafoi;

⁶kyaindi koṙu soe Ruwa nyi umwi tupu, akyeri Awu, ulya shindo shoose shiwukyie kokye, na soe lokyekaa kokye. Kuwoṙe na Mndumii umwi Yesu Kristo, ulya kui oe shindo shoose shilegumbo, na soe lulegumbo kui oe.

⁷Indi wuṟango-wu wukyeri ko wandu woose-pfo. Kyaindi wengyi kui iichiwia ifano lyilya wekyelya cha ilyi nyi kyindo kyikyiṙasie mafano, wuṟango wowo wo imanya kyicha na kyiwicho wuwufofo, na wekyefana kyimṟumoe.

⁸Kyaindi kyelya kyekyeluṙuo mbele ya Ruwa-pfo; kyipfa lulalye losoko kyindo-pfo; maa lukolya loengyeṟio kyindo-pfo.

⁹Kyaindi ambuyenyi wuiṙimi-wu wonyu wo iwuta kyoose mokunda wulachetewe walya wafafa wanyamaṟe.

¹⁰Cha kyipfa mndu kakuwona iyoe uwoṙe wuṟango, ochilya kyelya hekalunyi lya ifano, ngyesa wuiṙimi wokye wo imanya kyicha na kyiwicho, kookoya namfofo, kyechimanyika mṟasa oe nalye shindo shishiṙasie mafano-pfoe?

¹¹Na ulya amfofo nechirumatso kui wuṟango wopfo, na oe nyi mndu Kristo alepfa kyipfa kyakye.

¹²Koikyo mukotewe wana wa wama wanyu wakanyamaṟa, na inyamaṟa wuiṙimi wufofo wo manya kyicha na kyiwicho, monyamaṟia Kristo.

¹³Koikyo kyelya kyikatewe mono-wama oko nanyamaṟe, loi ngyechilya nyama mṟasa mlungana-pfo, ngyilachetewe mono-wama oko nanyamaṟe.