Read Kivunjo New Testament 1999 2 Wakorinto 1 Bible Online

2 Wakorinto 1 - Kivunjo New Testament 1999 bible

2 Wakorinto 1

¹Inyi Paulo, ngyikyeri msu o Kristo Yesu chandu Ruwa akundi, na Timoteo mono-wama oṙu; ngaṟeia paruo-i ko siṟi ya Ruwa ikyeri Korinto, hamwi na wandu wa Ruwa woose wakyeri urukyenyi loose lo Akaya.

²Isaṟia lyikae konyu na ufoṟo, shiwukyie ko Ruwa Awu oṙu na ko Mndumii Yesu Kristo.

³Ruwa naṟumisho, Awu o Mndumii oṙu Yesu Kristo, Awu o isaṟia, Ruwa o iwiyiṟia moo lyoose;

⁴ekyeluwiyiṟia moo ngyuukyiwenyi tsaṙu tsoose kundu na soe luiṙime iwawiyiṟia moo walya wakyeri ngyuukyiwenyi tsa mbaṟe tsoose, kui iwiyiṟio moo-lyo, lokyewiyiṟio moo nyi Ruwa.

⁵Kyipfa chandu matuuro ga Kristo gaiengyeṟika koṙu, na wuṙo iwiyiṟio moo lyaṙu lyiengyeṟika kui rina lya Kristo.

⁶Kyaindi kokooya soe lukyeri wukyiwenyi wung'anyi, nyi kyipfa kya iwiyiṟio moo lyanyu na wukyiṟo wonyu; ang'u kokooya lowiyiṟio moo, nyi kyipfa kya nyoe iluwiyiṟia moo; lyekyeṟunda iṟunda lyayo kui ikarishia matuuro galya galya lokyetuuro soe.

⁷Na ikusuria lyaṙu kyipfa kyanyu lyilolomie-pfo, lochimanya kye chandu muwekyeri wandu walewetuuro nyi matuuro galya, na wuṙo mulewewutio iwiyiṟio moo lyilya.

⁸Kyipfa, wana wa wama, lukundi muṙe mulamanya mbonyi tsa wukyiwa wulya wung'anyi wulelukooya kulya Asia-pfo. Kye lulelemio mnu kuta chandu luwechiiṙima, mṟasa lukopfiiyo nyi mṙoe kye luwechiiṙima-se ikaa na moo-pfo.

⁹Yee, soe luwenyi luwewoṙe ianduyo lya upfu mrimenyi koṙu, kundu lulachekusuria kya mrima yaṙu, indi lukusurie Ruwa, moṟutsa wapfu.

¹⁰Alelukyiṟa soe upfunyi lung'anyi kuṙo; lyingyi-se nelukyiṟa. Ulya lulekusuria kye neengyeṟa ilukyiṟa.

¹¹Na nyoe mukotaramana na soe kyipfa kyaṙu kyiiṙi kya iterewa, kundu kyipfa kya kyisumbo kyilya luenengo soe kui itarama wandu wafoi, wandu wafoi waane kyipfa kyaṙu.

¹²Cha kyipfa ikushela lyaṙu nyi ilyi, iṟingyishia lya kyilya mrima yaṙu iwonyi kye kyikyicha, kye kui wuele na ngoo ngyiilyi iwukyie ko Ruwa; chi kui wuṟango wo mmbiu-pfo, indi kui isaṟia lya Ruwa; lulewaṙa mchumie wuyanenyi, na ngoseṟa konyu nyoe.

¹³Kyipfa luimuṟeia nyoe kyindo, sile kyilya muisoma, na ikyiṟingyishia-pfo; na inyi ngyikusurie kye mochiṟingyishia isho mṟasa mafurumionyi.

¹⁴Na wuṙo chandu muleṟingyishia mbonyi tsaṙu kyitutu, kye soe nyi kyimaṙuma kya ikushela lyanyu, chandu nyoe mukyeri koṙu, mfiri ulya Mndumii oṙu Yesu echicha lya kawi.

¹⁵Na inyi ngiwoṙe ikusuria-lyo ngiwekundi ishika konyu iho kuwooka, kundu muwone kyisumbo kya kawi;

¹⁶na iiṙa konyu ngyiyende mṟasa Makyedonia. Na lyingyi-se iwuka Makyedonia ngyiwuye na konyu muṙuo ṟio lya kyaro kyako kya iyenda Uyuda.

¹⁷Kyasia, kyiyeri ngyilekunda iwuta isho, ngyesa ngyileilacha kyilya ngyiweteṟie? Ang'u isho ngyikundi iwuta ngyikundi ishiwuta kui mbaṟe ya mmbiu kye shiwe kuṙi koko, igamba “Yee, yee,” na chi “Ote, ote-pfo?”

¹⁸Kyaindi chandu Ruwa ai msimiri, ṙeṙo lyaṙu konyu chi “Yee” na “Ote-pfo.”

¹⁹Kyipfa Mana o Ruwa, Kristo Yesu, ulya mbonyi tsakye muleongoyo nyi soe, kyimwi na igamba, “Inyi na Silyiwano na Timoteo,” awekyeri “Yee” na “Ote-pfo;” indi kyilaṙuṙanyi na ikyo oe nyi “Yee” ya Ruwa.

²⁰Kyipfa shaasa shoose sha Ruwa shikyeri kokye nyi “Yee.” Lyingyi-se kyipfa kya ikyo kokye oe nyi “Amen;” Ruwa naiṙime iṟumisho kui soe.

²¹Kyasia ulya ekyelukarisha hamwi na nyoe kui Kristo, na ilushia mafuṙa, nyi Ruwa,

²²na oe nyi oe aleluwika kyiṟingyishio kyiwoṙe mfano okye kyaluenenga Mumuyo mrimenyi yaṙu.

²³Kyaindi inyi ngyilaga Ruwa nawe mṟingyishi o mrima oko, kye, kui iwawonia wukyiwa ngyilandeshikye Korinto-pfo.

²⁴Chi kye luichilyia iiṙikyia lyanyu-pfo; indi lukyeri watarami wa sia yanyu; kyipfa kui iiṙikyia lyanyu mugoṟokyi.