Read Kivunjo New Testament 1999 2 Wakorinto 12 Bible Online

2 Wakorinto 12 - Kivunjo New Testament 1999 bible

2 Wakorinto 12

¹Kyangyikooya ikushela, maa chandu kyilakyicha; kyaindi ngyegamba shindo Mndumii alengyiloṟa ngyikyeri cha mndu ailoṙo na ingyishukuya.

²Ngyiichi mndu umwi kyiiṙi kya Kristo, hamsia cha maka ikumi na ina wulalu (kye nawekyeri kyiiṙi kya mmbiu ngyiichi-pfo; kye nawekyeri nja ya mmbiu ngyiichi-pfo; Ruwa naichi). Mndu-cho naleirio wuye mṟasa ngyinenyi ya kaṟaaṟu.

³Na inyi ngyiichi mndu-cho, (kye nawekyeri kyiiṙi kya mmbiu ngiichi-pfo; kye nawekyeri nja ya mmbiu ngiichi-pfo; Ruwa naichi).

⁴Kye naleiro mṟasa Paradiso, kaicho maṙeṙo galekyeiṙima iṙeṙo, galakyeri sungusinyi mndu igaṙeṙa.

⁵Ko mbonyi tsa mndu cha icho ngyekushela; kyaindi kyipfa kyako ngyekushela-pfo, sile mbonyinyi tsa wufofo woko.

⁶Kyipfa kokooya ngyiwekundi ikushela ngyiwechiwa tondo-pfo, kyipfa ngyegamba loi. Kyaindi ngyekushela-pfo, kundu mndu alachengyitalyia ngoseṟa ya isho awonyi koko ang'u ishiicho koko.

⁷Na kyimaṙuma ngyilaiṙime ikushela na ielewetsa kyipfa kya shilya ngyileshukuyo, ngyileenengo kyindo kyewawiṟa mmbiu mbaṟe ya msha, kyindo kyikyeri cha mndu amṙume nyi Satana kundu nangyikape, ngyilachekushela na ielewetsa.

⁸Kyipfa kya kyindo-kyo ngyileterewa Mndumii kaṟaaṟu kye kyingyiwukye.

⁹Na oe kangyiwia, “Isaṟia lyako lyikushikyie; kyipfa wuiṙimi woko wokyeafukyia wufofonyi.” Kyasia ngyekushelyia wufofo woko kui sia ing'anyi, kundu wuiṙimi wo Kristo wukae na inyi.

¹⁰Koikyo ngyichihiṟo nyi wufofo, shilahio, ngyuukyiwa tsa orio mbaṟe, kyipfa kya Kristo. Kyipfa kyiyeri ngyikyeri mfofo nyi lyo-ndu ngyiwoṙe pfinya.

¹¹Ngawa tondo, nyi nyoe mulengyitewe. Kyipfa kyiwekyiwaṟi nyoe mungyiṟumishe, kyipfa kuwoṙe kyindo wasu wang'anyi walengyiiṟa nakyo-pfo, maa chandu ngyilakyeri kyindo.

¹²Nyi loi shiṟingyishio shekyeoshana na wasu shileṟundika konyu kui wusimiri woose, kui shiṟingyishio na maṟiyisho na ṟigo.

¹³Kyipfa nyi kyikyi muleuṟa kuta siṟi tsingyi, sile nyi ilyi ngyilalewa ṟio konyu? Ngamuterewa mungyihooṟie wuwicho-wu.

¹⁴Ambuyenyi kye nyi lya kaṟaaṟu inyi ngyikuṟeyeṟie icha na konyu, maa ngyechiwa ṟio konyu-pfo. Kyipfa ngyipfula masaa ganyu-pfo, indi ngyimupfula nyoe; kyipfa kyiwaṟi wana ikooma kyiseyesoe ko wafee-pfo, indi wafee ko wana.

¹⁵Na inyi kui sia ing'anyi ngyikuṟeyeṟie iwuta kyoose ngyiwoṙe, maa ikuwuta inyi ngyimonyi kyipfa kya mrima yanyu. Ngyesa mongyikunda kyitutu kyipfa kya ilyi inyi ngyimukundi mnu-pfoe?

¹⁶Kyaindi kyikuwiie kuṙo, inyi ngyilewa ṟio konyu-pfo; indi nyoe muigamba kye kui iwa mṟango ngyilewawaṙa kui ngyeṟo.

¹⁷Ngyesa kuwoṙe mndu oose ngyilemṙuma konyu, ngammbia namtose kyindo?

¹⁸Ngyileikyimbia Tito, ngaṙuma mono-wama ulya hamwi na oe. Ngyesa Tito nalemtosa kyindo? Ngyesa lulechumia kui Mumuyo ulya ulya na ndifonyi tsilya tsilya-pfoe?

¹⁹Mokusaṟa kye maa wulalu luṙeṙa mbonyi tsekuringa konyu! Mbele ya Ruwa luiṙeṙa kyiiṙi kya Kristo. Na isho shoose, wakunde, nyi kyipfa kya imukarisha nyoe.

²⁰Kyipfa ngiowuo, ngyilachemukooya chandu ngyilakundi imukooya mukongyiwona konyu chandu mulawekusurie ingyiwona ngyilachekooya kofia nyi wuṟiingyi na wunyeng'i, na nyashi, na maluyano, na iiriana wongo, na iṙeṙana, na makushelo, na kyituṟu.

²¹Na inyi ilyi ngyechicha-se, Ruwa oko alachengyienenga irigo nyi sonu konyu, na inyi ngyisuo kyipfa kya wafoi waleṙeko wookyia iho, walaṙumbuye wunyamaṟi wo ukoe, na wuṟui, na lango tsingyi tsa sonu.