Read Kivunjo New Testament 1999 2 Wakorinto 7 Bible Online

2 Wakorinto 7 - Kivunjo New Testament 1999 bible

2 Wakorinto 7

¹Kyasia-ng'u, wakunde wako, cha kyipfa luwoṙe shaasa-sho, lusanje mrima-i yaṙu ilekane na ukoe loose lo mmbiu na mrima, kunu lochiafutsia wuele kui iindia Ruwa.

²Luenengyenyi ṙaawa mrimenyi. Lulelyiiya mndu oose mbaka-pfo, maa lulenyamaṟa mndu-pfo, maa lulandewutie mndu kyindo kundu luwone ho kyiira-pfo.

³Ngyiṙeṙa kyindo-kyo kundu ngyimuanduye nyoe kye muwoṙe ṙeko-pfo; cha kyipfa ngamsonguo igamba kye, nyoe mukyeri mrimenyi koṙu maa kui ipfa handu hamwi, na ikaa na moo handu hamwi.

⁴Ngyiwoṙe wukari wung'anyi konyu; ngyiwoṙo nyi ikushela lying'anyi kyipfa kyanyu. Ngyiichuo nyi iwiyiṟio moo, wukyiwenyi woṙu woose ngaichuo sia ya ngosera.

⁵Cha kyipfa maa kyiyeri luleshika Makyedonia wukyiwa wulya mmbiu yaṙu iweilya wuleanguha-pfo, indi lulewona wukyiwa ngyuura tsoose. Nja kuwewoṙe shiṙa, na mrimenyi fowa.

⁶Kyaindi Ruwa, ekyewiyiṟia wafofo moo, naleluwiyiṟia moo kui icha lya Tito.

⁷Maa chi kui icha lyake tikyi-pfo, indi chandu alewiyiṟio moo nyi nyoe, echiluwia mbonyi tsa ilanga lyanyu, na ṟanyi yanyu, na wuragari wonyu kyipfa kyako, mṟasa ngaengyeṟa ichihiyo.

⁸Cha kyipfa maa chandu paruo iya yako ilemuendie fowa ngyiwihiyo mrimenyi-pfo; maa kokooya ngyilewihiyo mrimenyi, ngyiwonyi kye paruo iya ilemuendie fowa, kyiyeri kyifuhi tikyi.

⁹Wulalu ngyimchihiye, chi kyipfa kya nyoe iwona fowa-pfo, indi kyipfa kya ilyi mulewona fowa, mṟasa mukoṙumbuya wunyamaṟi. Kyipfa mulewona fowa kyipfa kya Ruwa, kundu mulaṙetse kyindo kyipfa kya kyindo lulewuta soe.

¹⁰Iwona fowa lyikyeri kui mbaṟe ya Ruwa lyekyeende iṙumbuya wunyamaṟi wokyeende wukyiṟo wulawoṙe isumkyia indi fowa ya wuyana yekyeende upfu.

¹¹Wulalu moiṙima iwona kyindo kyekyeendo nyi iwona fowa chandu Ruwa akundi. Nyoe moiṙima wulalu iwa wandu wawoṙe ipfuṟukana, wawoṙe kyindo kyegamba. Mokyeṙumbuko nyi maṙima na iowuo; mokyepfuṟukana na iwona kye kya wusumganyi kyiṟundo. Nyoe moloṟa na pata kye muwoṙe ṙeko kyiiṙi kya ikyi ngyigamba-pfo.

¹²Kyasia, maa chandu ngyilemuṟeia paruo, ngyileṟeia kyipfa kya ulya alenyamaṟa, maa chi kyipfa kya ulya alewutio kuṙo-pfo, indi ipfuṟukana lyanyu kyipfa kyaṙu lyiiṙime iṟingyishio konyu mbele ya Ruwa.

¹³Koikyo lulewiyiṟio moo. Lyingyi-se kyiiṙi kya iwiyiṟio moo lyaṙu lulechihiyo mnu ngoseṟa kyipfa kya sia ya Tito; kyipfa nyoe moose mulechihiṟa mrima okye.

¹⁴Cha kyipfa kokooya ngyilekushela mbele yakye kyindonyi kyoose kyipfa kyanyu, ngyilewona sonu-pfo; indi chandu lulemmbia mbonyi tsoose kui wuloi, na wuṙo ikushela lyaṙu mbele ya Tito lyiwei lya loi.

¹⁵Na ikunda lyakye konyu lyekyeengyeṟika ngoseṟa, kyiyeri ekyekumbuo iindia lyanyu nyoe moose, chandu mulemwambilyia kui wuowu na iṙeṙema.

¹⁶Ngachihiyo, kyipfa kyiiṙi kya orio kyindo ngyechiiṙima ikusuria konyu.