Read Kivunjo New Testament 1999 2 Wakorinto 9 Bible Online

2 Wakorinto 9 - Kivunjo New Testament 1999 bible

2 Wakorinto 9

¹Ko mbonyi tseṟundia wandu wa Ruwa kuwoṙe kyimaṙuma ngyimuṟeie-pfo.

²Kyipfa ngyiichi ikuṟeyeṟa lyanyu; ikuṟeyeṟa ngyekyekushelyia kyipfa kyanyu ko wandu wa Makyedonia, kye Akaya iwekuṟeyeṟie maka oose; na wuragari wonyu wulekarisha wafoi.

³Kyaindi ngyileṙuma wana wa wama-wo, kundu ikushela lyaṙu kyipfa kyanyu lyilailachikye kyiiṙi kya kyindo-kyi; muiṙime ikuṟeyeṟa chandu ngyilegamba,

⁴kundu wandu wa Makyedonia wakacha hamwi na inyi, wakamukooya mulakuṟeyeṟie, soe lulacherigo nyi sonu (lulagambe nyoe), kyiiṙi kya mbaṟe-yo iyo ya ikusuria.

⁵Kyasia ngyilewona kyangyikooya ngyitutume wana wa wama-wa wasonguoe ishika konyu, na iachikyia iwinyi kyisumbo kyanyu mulekyiteṟia wookyia kacha, kundu kyiwe kyamuṟeyeṟo, na kuṙi kyiwe cha kyienengo, maa chi cha kyindo kyekyeenengyio kui iitiko-pfo.

⁶Kyaindi ngyigamba kyindo-kyi, “Mowaaya shaangu nesambuo shaangu; mowaaya kui ilekyia nesambuo kui ilekyia.”

⁷Orio mndu nawute chandu akusurie mrimenyi kokye, chi kui ikuinaṙia, maa chi kui iitiko-pfo; kyipfa Ruwa nakundi ulya ekyeenengyia kui mrima mkyesi.

⁸Na Ruwa neiṙima imuenenga orio mboṟa iingikyie, kundu nyoe mfiri yoose muiṙime iwaṙa orio kyindo mukundi, na muwoṙe orio kyindo mukundi muiṙime ienengyia kulawoṙe iehia.

⁹Chandu kyikyiṟeie, “Oe nekyeenengyia kui ilekyia, kaenenga wakyiwa wusumganyi wokye wokaa mlungana.”

¹⁰Na ulya ekyeenenga mbeu mndu mowaaya, na mkate uwe kyelya, nemuenenga mbeu tsewaaya na itsiengyeṟa, na oe nechiengyeṟa shilyimu sha wusumganyi wonyu.

¹¹Mochiiritso shindonyi shoose muiṙime iwaṙa ilekyia lyoose, lyekyeenenga Ruwa wandu wafoi waimmbia haika kyipfa kya shienengo shanyu wekyeambilyia iwuka koṙu.

¹²Kyipfa iṟunda-lya iṟunda-lyi chi lyetarama wandu wa Ruwa shindo shilya wauṟie tikyi-pfo, indi lyekyeengyeṟika mnu iwaṙa kyiira kui iana lying'anyi Ruwa ekyeenengo.

¹³Cha kyipfa mukoyesho kui iṟunda-lyo, waiṟumisha Ruwa kyipfa kya wuindi wonyu kui iṟingyishia Ndumi Ngyicha ya Kristo, na kyipfa kya ilekyia lyanyu mulewaambutsia wo na wandu woose.

¹⁴Nawo wawenyi, wechiterewa kyipfa kyanyu, wamukundi mnu mrimenyi kowo kyipfa kya isaṟia lya Ruwa lyileingyikyi mnu konyu.

¹⁵Ruwa naano kyipfa kya kyienengo kyakye, lulawoṙe maṙeṙo geonguo mbonyi tsakyo.