Read Kivunjo New Testament 1999 Wagalatia 1 Bible Online

Wagalatia 1 - Kivunjo New Testament 1999 bible

Wagalatia 1

¹Inyi Paulo, ngaṟeia paruo-i, ngyikyeri msu (chi msu o wandu maa amṙume nyi mndu-pfo, indi amṙume nyi Yesu Kristo, na Ruwa Awu alemṟutsa iwuka ko wapfu),

²na woose waiṙikyie Yesu wakyeri hamwi na inyi loiṟikyiṟa siṟi tsoose tsa Galatia.

³Isaṟia lyikae konyu, na ufoṟo, shiwukyie ko Ruwa Awu, na ko Mndumii oṙu Yesu Kristo.

⁴Ulya alereka mrima okye kyipfa kya ngyuunyamaṟi tsaṙu, kundu nalukyiṟe mawicho ga kunu wuyanenyi lukyeri wulalu, chandu Ruwa, Awu oṙu, alekunda.

⁵Kyiṟumi kyikae na oe, mlungana na mlungana. Amen.

⁶Ngyimṟiyie kyipfa muiṙa iwinyi kuṙo ulya alemulaga isaṟienyi lya Kristo, na igalukyia malosho ga mbaṟe ingyi gaigambo kye nyi ndumi ngyicha.

⁷Kuwoṙe ndumi ngyicha ingyi-pfo; kyaindi kuwoṙe wandu waipfuṟukana wakundi iilacha Ndumi Ngyicha ya Yesu Kristo.

⁸Kyaindi kokooya soe ang'u malaika o ruwewu amulosha shindo shingyi shilakyeri shilya lumuongoya, nawusio kyiseso.

⁹Chandu lulesonguo igamba, na wulalu ngyigamba-se, mndu oose kamuongoya ndumi ngyicha ingyi ilakyeri iya muleambilyia koṙu, mndu-cho nawusio kyiseso.

¹⁰Kyipfa wulalu ngyesa ngyikundi ikundo nyi wandu? Ote! Kyindo ngyikundi nyi ikundo nyi Ruwa. Kyipfa kokooya ngyiwekundi mṟasa wulalu ichihiṟa wandu, ngyiwechiwa mṟundi o Kristo-pfo.

¹¹Cha kyipfa, wana wa wama wako, Ndumi-yo Ngyicha ngyilemuongoya, ngyimmbia kye ilewuka ko wandu-pfo.

¹²Cha kyipfa ngyileiambilyia ko wandu, maa ilosho nyi mndu-pfo, indi kui ishukuyo nyi Yesu Kristo.

¹³Kyipfa muleicho mbonyi tsa mkaṟo yako wookyia mawookyionyi kyiyeri ngyiwekyeindia Ruwa chandu Wayuda wekyemwindia; kye ngyilelyisa Siṟi ya Mndumii wukyiwa wuelewetsie, ngyetambagana iinyamaṟa.

¹⁴Na inyi wandunyi wa rika lyako inyi ngyiwekyeri mbele kuta wengyi kyipfuṟukanionyi kyeindia Ruwa chandu Wayuda wekyemwindia, ngatambagana mnu iosha shilya ngyileambilyia ko waku wako.

¹⁵Kyaindi Ruwa alengyisaanga wookyia wosinyi ko wama oko, kangyilaga kui isaṟia lyakye;

¹⁶kyiyeri alewona nyi necha iṟingyishia Mono-kye mrimenyi koko, kundu ngyiongoye walya walaiṙikyie Yesu mbonyi tsakye; maa ngyileyenda ko mndu oose immbesa kyindo-pfo.

¹⁷Maa ngyilekunda iyenda Yerusalemu ko walya walengyisongoya iwa wasu-pfo; indi ngyileyenda uruka lo Waarabu na numa ya iho ngawuya-se na Dameskyi.

¹⁸Numa ya iho; hamwiṙe maka iṟaṟu, ngaṙo iyenda Yerusalemu kundu ngyiwonane na Kyefa, ngakaa kokye mfiri ikumi na itanu.

¹⁹Kyaindi ngyilewona msu ungyi sile Yakobo, mono-wama o Mndumii-pfo.

²⁰Na isho ngyimuṟeia nyoe, ambuyenyi, mbele ya Ruwa, ngyiṙeṙa wongo-pfo.

²¹Numa ya iho ngyileyenda ngyuura tsa Shamu na Kyilyikyia.

²²Kyaindi ngyilewono kyaam kyako nyi siṟi tsa Uyuda tsiwekyeri kyiiṙi kya Kristo-pfo;

²³indi waleicho tupu kye icho mfiri ya ipfo numa awekyewalyisa wukyiwa, wulalu naionguo mbonyi tsa iiṙikyia alelyinyamaṟa ilyi kacha.

²⁴Wakaṟumisha Ruwa kyipfa kyako.