Read Kivunjo New Testament 1999 Wagalatia 2 Bible Online

Wagalatia 2 - Kivunjo New Testament 1999 bible

Wagalatia 2

¹Numa ya iho, hamwiṙe maka ikumi na ina, ngaṙo-se iyenda Yerusalemu ngyiṙuṙanyi na Barinaba na Tito.

²Na inyi ngyileyenda kyipfa ngyileshukuyo ngawia wandu Ndumi Ngyicha iya ngyekyeongoya walya walakyeri Wayuda, kyaindi kui kyiṟika ko walya wawoṙe kyiṟumi, kyilacheewa kofia ngyiṙicha wulya, ang'u ngyileṙicha wulya.

³Kyaindi Tito awekyeri hamwi na inyi, na oe nyi Mkyiṟikyi, aleitiko iṙino-pfo.

⁴Indi kyipfa kya wandu walekuloṟa kye waiṙikyie Yesu na kunu waweiṙikyie-pfo, wandu walekulunga na soe kui kyiṟika kundu wamanye mbonyi tsaṙu soe lulawachilyie nyi kyindo kyiiṙi kya Kristo Yesu, kundu ilyi numa waluwikye wusingyenyi.

⁵Kyaindi kyipfa kya iringa ulogo lo Ndumi Ngyicha luleiṙikyia waluchilyie maa ale-pfo, kundu wuloi wo Ndumi Ngyicha wukae na nyoe.

⁶Kyaindi walya wawoṙe kyiṟumi na kye wawoṙe rina (ngyilesaṟa wawei kuṙa-pfo kyipfa koko shilyingananyi shoose; na Ruwa ekyeambuya kyaam kya mndu-pfo); ngagamba iwo wawoṙe kyiṟumi walengyiengyeṟia kyindo-pfo.

⁷Indi kyilaṙuṙanyi na isho, kyiyeri walewona kye ngyimṙambikye Ndumi Ngyicha ya wandu walakyeri Wayuda, chandu Petiro aleṙambiko Ndumi Ngyicha ya Wayuda;

⁸(kyipfa ulya aleenenga Petiro wuiṙimi wo iwa Msu o Wayuda nyi oe alengyienenga na inyi wuiṙimi wo iyenda ko walya walakyeri Wayuda.)

⁹Lyingyi-se kyiyeri walemanya isaṟia lyilya ngyileenengo; Yakobo, na Kyefa, na Yohane, wawoṙe kyiṟumi kye nyi ngoe, waleiṙikyia iṟunda hamwi na inyi na Barinaba; kundu soe luyende ko walya walakyeri Wayuda, nawo wayende ko Wayuda.

¹⁰Indi waleluwia luwute kyindo kyimwi, lutarame wakyiwa, na ikyo ngyilekyiṟunda kui wuragari.

¹¹Kyaindi kyiyeri Kyefa alecha na Antiokyia, ngyilegaluana na oe ushangu kui ushangu, kyipfa nawewaṟi ianduyo.

¹²Cha kyipfa kyiyeri wandu waata wawukyie ko Yakobo walawendeche, naweilya handu hamwi na wandu walaiṙikyie Yesu; kyaindi kyiyeri wo walecha, kawuya na numa, kalekana nawo, kunu echiowuo Wayuda.

¹³Na Wayuda-wo, wengyi wakaowuo hamwi na oe, mṟasa na Barinaba kawaṙa wukulembecheṟi chawo.

¹⁴Kyaindi, kyiyeri ngyilewona kye mkaṟo yawo iṙuṙanyi necha na wuloi wo Ndumi Ngyicha-pfo, ngyilewia Kyefa mbele ya wandu woose, “Kokooya iyoe ukyeri Myuda nuosha miichiwie ya wandu walaiṙikyie Yesu, maa chi ya Wayuda-pfo, ny'kyilyi uitika wandu walaiṙikyie Yesu iosha miichiwie ya Wayuda?”

¹⁵Soe lukyeri Wayuda kui ifeo, maa chi waṙeko wawukyie ko walya walakyeri Wayuda-pfo,

¹⁶luichi kye mndu ekyetalyio wusumganyi kui mawuto ga mawawaso-pfo, indi kui iwaṙa iiṙikyia kyiiṙi kya Kristo Yesu. Soe luleiṙikyia Kristo Yesu kundu lutalyio wusumganyi kui iiṙikyia Kristo, maa chi kui mawuto ga mawawaso-pfo; kyipfa kui mawuto ga mawawaso kuwoṙe mndu echitalyio wusumganyi-pfo.

¹⁷Kyaindi kokooya soe luwenyi, kui ipfula italyio wusumganyi kyiiṙi kya Kristo, lulewono kye luwanyamaṟi, ngyesa Kristo nawa mṟundi o wunyamaṟi? Ote!

¹⁸Kyipfa ngawika-se shilya ngyilemshiunduo, ngaloṟa kye inyi ngyimonyi nyi mṙeko.

¹⁹Kyipfa inyi ko mbonyi tsa mawawaso ngyipfiie kundu ngyiwaṙe moo kyipfa kya Ruwa.

²⁰Ngyilekapio msalabenyi hamwi na Kristo; kyaindi ngyiwoṙe moo; maa chi inyi-se-pfo, indi Kristo nai na moo mrimenyi koko. Na moo ngyiwoṙe wulalu mmbiunyi ngyiuwoṙe kyiiṙi kya iiṙikyia Mana o Ruwa, ulya alengyikunda kareka moo okye kyipfa kyako.

²¹Ngyikundi iwiyitsa kuleshi ikunda lya Ruwa ko wandu-pfo; kyipfa kokooya wusumganyi wokyewono kui njia ya mawawaso, kyasia Kristo nalepfa wulya.