Read Kivunjo New Testament 1999 Wagalatia 3 Bible Online

Wagalatia 3 - Kivunjo New Testament 1999 bible

Wagalatia 3

¹Lanyoe Wagalatia mulawoṙe wuṟango, nyi wui alemloga, nyoe walya Yesu Kristo alemuloṟa na pata kye nalekapio msalabenyi?

²Ngyikundi ikulosha kyindo kyimwi konyu. Ngyesa muleambilyia Mumuyo Mweele kui mawuto ga mawawaso ang'u kui iicho Ndumi Ngyicha na iiṙikyia Yesu?

³Ngyesa mulewa matondo mbaṟe-i iyi? Mommbookye kui Mumuyo, mukundi iafutsia kui pfinya tsanyu muwenyi?

⁴Ngyesa molya wukyiwa wung'anyi kuṙi wulya? Loi chi wulya-pfo. Kyilya kyilemmbutikyia kyiwaṟi imuenenga ikusaṟa chandu kyiweng'anyi.

⁵Kyasia, ulya ekyemuenenga Mumuyo na iwuta shindo sha maṟiyisho kyiiṙi kyanyu, ngyesa nekyewuta kuṙo kui mawuto ga mawawaso, ang'u kui iicho Ndumi Ngyicha yekyeende iiṙikyia Yesu?

⁶Chandu Abrahamu aleiṙikyia Ruwa katalyio wusumganyi.

⁷Kyasia manyenyi-ng'u kye walya wawoṙe iiṙikyia, iwo nyiwo wana wa Abrahamu.

⁸Na kyiṟeio kyiele, chandu kyilewona wookyia kacha kye Ruwa nechitalyia wusumganyi walya walaiṙikyie Yesu kui iiṙikyia, kyileongoya Abrahamu Mbonyi Ngyicha kyiyeri kya kacha igamba, “Kyiiṙi kyapfo iyoe walya walaiṙikyie Yesu wechiwona mboṟa.”

⁹Kyasia iwo wakyeri wa iiṙikyia wekyewona mboṟa hamwi na Abrahamu awekyeri mndu awoṙe iiṙikyia.

¹⁰Cha kyipfa woose wakyeri wa mawuto ga mawawaso, wakyeri kyisesonyi; kyipfa kyikyiṟeie, “Namsese ulya alekyeosha shindo shoose shikyeri kyitapunyi kya uwawaso.”

¹¹Nyi kyindo kyiichio na pata kye kuwoṙe mndu ekyetalyio wusumganyi mbele ya Ruwa kui mawawaso-pfo; cha kyipfa, “Mndu msumganyi nechiwaṙa moo kui iiṙikyia.”

¹²Na uwawaso lulecha kui iiṙikyia-pfo, indi, “Ekyewuta isho nechiwaṙa moo kyiiṙi kya isho.”

¹³Kristo naleluwuta kyisesonyi kya uwawaso, cha kyipfa naleseso kyipfa kyaṙu; kyipfa kyikyiṟeie, “Orio mndu amkapie msalabenyi namsese.”

¹⁴Kundu kye mboṟa ya Abrahamu ikooye walya walaiṙikyie Yesu kyiiṙi kya Yesu Kristo, luiṙime iambilyia kyaasa kya Mumuyo kui njia ya iiṙikyia.

¹⁵Wana wa wama wako, ngyiṙeṙa kyimndu. Maa chandu kyikyeri nyi kyaasa kya wandu, kyaasa kyikammbiko, kuwoṙe mokyiilacha ang'u ikyiengyeṟa-pfo.

¹⁶Kyasia Abrahamu naleenengo shaasa hamwi na ulya alemfee. Aigamba, “Ko walya alefee” cha ilyi nyi wafoi-pfo, indi cha ilyi nyi umwi, “Ko ulya ochimfee,” kyimwi na igamba Kristo.

¹⁷Kyindo ngyigamba nyi ikyi, kyaasa kyilewiko mawookyionyi nyi Ruwa, uwawaso lulecha maka magana gaana na makumi gaṟaaṟu numa ya kyaasa-kyo loiṙima iilacha kyaasa-kyo-pfo.

¹⁸Cha kyipfa kyioṟa kyikawa nyi kui mawawaso, kyikyewa-se kyaasa-pfo; kyaindi Ruwa nalesaṟia Abrahamu kui njia ya kyaasa.

¹⁹Kyasia uwawaso nyi kyikyi-ng'u? Uwawaso luleṙiko kyipfa kya maṙeko, mṟasa nache icho amwenengye kyaasa-kyo; kyaasa kyileendo nyi malaika kyiyeri Mose alewa mndu Ruwa alemṙuma ko wandu.

²⁰Kyasia ulya akyeri moṙumo chi moṙumo ko mndu umwi-pfo; indi Ruwa nyi umwi.

²¹Kyasia, ngyesa uwawaso lokyewingana na shaasa sha Ruwa? Ote! Cha kyipfa kokooya mawawaso gekyeende moo galaleṙiko, loi wusumganyi wuwechiwono kui mawawaso.

²²Kyaindi kyiṟeio kyiele kyagamba kye wuyana woose wuwuchilyie nyi wunyamaṟi kundu iwo waiṙikyie waenengo kyaasa kui iiṙikyia waenengo kyaasa-kyo kui iiṙikyia Yesu Kristo.

²³Kyaindi kyiyeri iiṙikyia lyilya lyilawendeche luwewachilyie nyi mawawaso, lukowa cha wandu wakyeri kyipfungonyi, mṟasa kyiyeri kyeiṙikyia Yesu kyechicha, kyiyeri Ruwa echiloṟa.

²⁴Koikyo uwawaso lowa msongoru moluende na ko Kristo, kundu lutalyio wusumganyi kui iiṙikyia.

²⁵Kyaindi kokooya iiṙikyia lyilemcha, lukyeri-se wanda ya msongoru-pfo.

²⁶Cha kyipfa nyoe moose mowa wana wa Ruwa kui njia ya iiṙikyia Kristo Yesu.

²⁷Kyipfa nyoe moose muwapatise kyiiṙi kya Kristo muṟee Kristo.

²⁸Kuwoṙe-se Myuda maa Mkyiṟikyi-pfo. Kuwoṙe-se mtumo ang'u alakyeri mtumo-pfo. Kuwoṙe-se mndu msoṟo maa mndu mka-pfo. Kyipfa nyoe moose mowa kyindo kyimwi kyiiṙi kya Kristo Yesu.

²⁹Na kokooya nyoe nyi wandu wa Kristo, kyasia mowa wana wa Abrahamu, na weoṟa iṙuana na kyaasa.