Read Kivunjo New Testament 1999 Wagalatia 4 Bible Online

Wagalatia 4 - Kivunjo New Testament 1999 bible

Wagalatia 4

¹Kyaindi ngagamba kye mokyioṟa, kyiyeri kyoose ai mana, nakyeri cha mtumo, kyiyeri awuye ammbiie kyindo echioṟa.

²Indi nakyeri wuchilyinyi wo walya wawawikye wamwambuye na imwenenga shilya akundi mṟasa kyiyeri awuye echigamba kye kuwoṙe-se kyimaṙuma kyewika wandu weambuya mokyioṟa-cho-pfo.

³Na wuṙo na soe, kyiyeri luwekyeri wana watutu, lukowa watumo wa mumuyo ichilyie wuyana.

⁴Na lyilya kyiyeri kyilya kyiwekyikunde kyileafukyia, Ruwa naleṙuma Mono-kye, ulya alefeo nyi mndu mka, nafeo wuchilyinyi wo mawawaso,

⁵kundu nakyiṟe walya wawewachilyie nyi mawawaso, kundu soe luiṙime iambilyia iwa wana.

⁶Na kyipfa nyoe mowa wana, Ruwa naleṙuma Mumuyo o Mono-kye mrimenyi konyu, ekyegamba, “Aba,” kyimwi na igamba Awu.

⁷Kokooya nyi wuṙo, iyoe chi mtumo-se-pfo indi nukyeri mana; na kokooya nukyeri mana, kyasia nukyeri mokyioṟa ko Ruwa.

⁸Kyaindi kyiyeri kyilya, kyipfa mulaweichi Ruwa, muleṟundia shindo shilakyeri waruwa.

⁹Indi wulalu mommanye Ruwa, ang'u ngoseṟa Ruwa imumanya nyoe, nyi kyikyi kyitewe kyewiyilyia malosho ga mawookyionyi gamafofo, gai mti, galya mukundi igaṟundia-se?

¹⁰Mokyekuwinisha na mfiri, na mori, na shiyeri, na maka.

¹¹Ngyikusaṟa mnu kyipfa kyanyu, kyilawe kofia ngyilekuwinisha wulya kyipfa kyanyu.

¹²Wana wa wama wako, ngamterewa, muwe cha inyi, kyipfa inyi nyi cha nyoe. Mulengyilyiia mbaka kyindonyi kyoose-pfo.

¹³Kyaindi muichi kye ngyilemuongoya Ndumi Ngyicha lya kuwooka kyipfa kya wufafa wo mmbiu.

¹⁴Na kyiyesho kyilempaaya nyoe mmbiunyi oko mulekyimina maa ikyilega-pfo, indi mulengyiambilyia cha malaika o Ruwa, cha Kristo Yesu.

¹⁵Kyasia, nyi kyikyi kyammbutikye kyeiṙima igaluo ishi shoose? Kyipfa ngyiṟingyishia kye, kokooya kyiwechiiṙimika, muwekuluo meso ganyu, mungyienengye inyi.

¹⁶Ngyesa ngawa mokyituwa onyu kyipfa ngyimmbia shikyeri sha loi?

¹⁷Iwo wawoṙe ilanga lying'anyi kyipfa kyanyu, kyaindi chi kui njia ngyicha-pfo, indi wakundi imshingyia nja, kundu kye nyoe muwalangye wo.

¹⁸Na nyi kyindo kyicha iwaṙa wunyeng'i kyipfa kya kyindo kyicha mfiri yoose, maa chi kyiyeri ngyikyeri na nyoe tupu-pfo.

¹⁹Mbuya tsako wakunde, walya kyipfa kyawo ngyiwoṙe iwawio lying'anyi mrimenyi mṟasa muwe cha Kristo;

²⁰ngyilangyie kui mrima oko oose ikaa halya-ndu mukyeri wulalu, kundu ngyiilachikye na iloṟa lyako chandu ngyimukundi.

²¹Ngyiwienyi, nyoe mukundi ichilyio nyi mawawaso. Ngyesa mokyeicho kyindo mawawaso gagamba-pfoe?

²²Cha kyipfa kyikyiṟeie kye Abrahamu nawewoṙe wana wawi, umwi alefee na kyisinga, na umwi na mka o wolyi.

²³Kyaindi mana ulya o kyisinga nalefeo kui mmbiu, na ulya o mka o wolyi kui kyaasa.

²⁴Shindo-shi shekyeṙeṙo kui mfano; cha kyipfa iwa wawi nyi cha mma ya mbaṟe tsiwi; mma umwi iwuka fumvu lya Sinai, okyewaṙa wana kui wusinga, na mma-cho nyi Hajiri.

²⁵Kyipfa Hajiri nyi cha fumvu lya Sinai lyikyeri urukyenyi lo Waarabu, lyilyingananyi na Yerusalemu ya wulalu; cha kyipfa nekyeṟunda hamwi na wana.

²⁶Indi Yerusalemu ya wuye nyi mka ulya o wolyi, na oe nyi oe wama oṙu soe.

²⁷Cha kyipfa kyikyiṟeie, “Chihiyo, iyoe muumba, ulekyewaṙa wana; kuilengye na ṟui lying'anyi, ufiiṟe, iyoe ulawoṙe fowa cha ya mndu mka aienengo mana. Kyipfa wana wa ulya amṙe amonyi nyi wafoi kuta wa ulya awoṙe mii.”

²⁸Kyasia, wana wa wama wako, cha Isakyi, soe nyi wana wa kyaasa.

²⁹Kyaindi chandu kyiyeri kyilya ulya alefeo kui mmbiu alelyisa wukyiwa ulya alefeo kui Mumuyo, nyi wuṙo kyikyeri maa wulalu.

³⁰Kyaindi kyiṟeio kyiele kyagamba kuṙa? “Funa kyisinga na mono-kyo, cha kyipfa mana o kyisinga echioṟa maa ale hamwi na mana o mka o wolyi-pfo.”

³¹Koikyo, wana wa wama wako, soe chi wana wa kyisinga-pfo indi nyi wana wa ulya ai mka o wolyi.