Read Kivunjo New Testament 1999 Wagalatia 5 Bible Online

Wagalatia 5 - Kivunjo New Testament 1999 bible

Wagalatia 5

¹Kyiiṙi kya iwa wana wa mka o wolyi Kristo nalelugaluo wandu walakyeri wuchilyinyi wo kyindo kyoose. Koikyo maa mulalolome, maa ichilyio-se nyi wutumo.

²Inyi Paulo ngammbia nyoe kye, mukoṙino, Kristo echiwaṙa kyiira konyu-pfo.

³Lyingyi-se ngyiṟingyishia orio mndu ekyeṙino kye nyi iṟunda lyakye iafutsia uwawaso loose.

⁴Muwasaangye nyi Kristo, nyoe mukundi italyio wusumganyi kui mawawaso, mooloka na iwuka isaṟienyi.

⁵Kyipfa soe kui Mumuyo luiweṙelyia ikusuria lya wusumganyi kui njia ya iiṙikyia.

⁶Kyipfa kyiiṙi kya Kristo Yesu iṙino, maa iṙa iṙino lyiwoṙe kyiira kyoose-pfo, indi iiṙikyia lyekyeṟunda kui ikunda.

⁷Muweitambagana necha; nyi wui alemushingyia mulaindie wuloi?

⁸Chi Ruwa alemushingyia-pfo, kyipfa nyi oe ekyemlaga muyende kokye.

⁹Chachu kyitung'tu yekyetarang'isha itongye lyoose.

¹⁰Kyiiṙi kya Mndumii ngyikusaṟie kye moiṙima iwaṙa makusaṟo ga mbaṟe ingyi-pfo. Kyaindi mndu oose aimuenenga wuowu nechianduyo.

¹¹Na inyi, wana wa wama wako, kokooya ngyionguo mbonyi tsa iṙino, ny'kyilyi ngyilyiso wukyiwa mṟasa wulalu? Kokooya ngyiweionguo kuṙo ilosha lyako kye Kristo nalepfa msalabenyi lyiwewa lya wulya.

¹²Ngyiwechihiyo mnu kokooya iwo waimfoga-foga wawekuletsana na nyoe nakamwi.

¹³Kyipfa nyoe, wana wa wama, mulelago muwe wandu mulawachilyie nyi kyindo. Kyaindi kulya iwa wandu walawachilyie nyi kyindo kulawe kyimaṙuma kyeosha lango tsa mmbiu, indi ṟundianenyi kui ikunda.

¹⁴Kyipfa uwawaso loose lukyeri kyindonyi kyimwi tupu, nakyo nyi ikyi, “Ukunde momṟasa opfo chandu ukukundi kumonyi.”

¹⁵Kyaindi mukowika cha mando ga saka, ambuyenyi mularumatsane.

¹⁶Kyasia ngagamba, chilyionyi nyi Mumuyo Mweele; maa mulawute kyilya mrima yanyu ikundi tupu.

¹⁷Cha kyipfa mmbiu okyelanga ochiwingana na Mumuyo, na Mumuyo iwingana na mmbiu; kyipfa ishi shekyeṙuana-pfo, na moiṙima iwuta shilya mukundi-pfo.

¹⁸Kyaindi mukosongoyo nyi Mumuyo, mukyeri wuchilyinyi wo mawawaso-pfo.

¹⁹Kyasia mawuto ga mmbiu gai na pata, nyigo iga: wuṟui, ukoe na lango tsa sonu,

²⁰iindia mafano, wusawi, isuana, iluyana, wunyeng'i, nyashi, wuṟiingyi, nduutsano, iṙeṙa wongo.

²¹Wunanzi, ilya na ielewetsa, na shindo shifananyi na isho; kyiiṙi kya isho ngammbia kulawoṙe ikyelyio, chandu ngyilemummbia kye wandu wekyewuta shindo sha mbaṟe-yo wechioṟa Wumangyi wo Ruwa-pfo.

²²Kyaindi ndunda tsa Mumuyo nyi ikunda, sia, ufoṟo, ikarishia, kyiṙo kyicha, itarama wakyeri wukyiwenyi, iwuta kyilya mndu ateṟia,

²³wuhoo, iwaṙa meena. Kuwoṙe iwawaso lya mbonyi tsa shindo cha isho-pfo.

²⁴Na iwo wakyeri wa Kristo Yesu wekyechilyio-se nyi lango tsa mmbiu yawo-pfo.

²⁵Mumuyo naluenengyie moo, koikyo lumwenengye momu o iluchilyia.

²⁶Maa lulakushele wulya, lochisouana na iwoniana wunyeng'i.