Read Kivunjo New Testament 1999 Wagalatia 6 Bible Online

Wagalatia 6 - Kivunjo New Testament 1999 bible

Wagalatia 6

¹Wana wa wama wako, mndu kaasha kyindonyi kyoose, nyoe mukyeri wa Mumuyo mmbiyiṟenyi kui ngoo ya wuhoo, ochikuringa mrima opfo ulacheyesho.

²Taramanenyi na iosha iwawaso lya Kristo.

³Kyipfa mndu kakuwona kye nyi kyindo, na oe chi kyindo-pfo, nakulemba mrimenyi kokye.

⁴Kyaindi orio mndu naeneng'ene iṟunda lyakye amonyi, nyi lyo-ndu eiṙima iwaṙa kyimaṙuma kyekushela mrimenyi kokye tupu, maa chi ko oṙoe-pfo.

⁵Kyipfa orio mndu nechikuṙika mlari okye amonyi.

⁶Manalosho naongoye mlosha okye shindo shicha shoose.

⁷Maa mulakulembe, Ruwa chi tondo-pfo; cha kyipfa kyilya mndu awaaya nyikyo echisambuo.

⁸Kyipfa ulya awaaya kui mmbiu okye, mmbiunyi okye nechisambuo wunyamaṟi; indi ulya awaaya kui Mumuyo, Mumuyonyi nechisambuo moo o mlungana.

⁹Lyingyi-se maa lulalemo iwuta shindo shicha; kyipfa lochisambuo ilyi kyiyeri kyechishika, lulandewine.

¹⁰Koikyo iṙuana na chandu lowona ṙaawa luwutie wandu shindo shicha; ngoseṟa walya waiṙikyie Yesu.

¹¹Chandu inyi ngyimonyi ngyimuṟeia paruo wulalu,

¹²woose wakundi iwono kye nyi wandu wecha ko mbonyi tsa mmbiu nyiwo waimuitika iṙino; kundu walalyiso wukyiwa nyi msalaba o Kristo tikyi.

¹³Cha kyipfa maa walya wawaṙine wekyeosha kyilya mawawaso gakundi-pfo; indi wakundi nyoe muṙino, waiṙime ikushelyia mmbiu yanyu.

¹⁴Kyaindi inyi, ote, ngyilakushelyie kyindo kyoose sile msalaba o Mndumii oṙu Yesu Kristo, ulya ulengyienenga inyi iṙa iosha mbonyi tsa wuyana.

¹⁵Cha kyipfa iṙino ang'u iṙa iṙino chi kyindo-pfo, indi kyindo kying'anyi nyi iwa mndu mhya.

¹⁶Na woose wechiwaṙa mkaṟo iṙuṙanyi na ikyo, ufoṟo lukae kowo na iwoniana wukyiwa, yee ko wandu woose wa Ruwa.

¹⁷Wookyia wulalu mndu alangyilyise wukyiwa; cha kyipfa ngyiṙuṙe ngoru tsa Kristo mmbiunyi koko.

¹⁸Wana wa wama wako, isaṟia lya Mndumii oṙu Yesu Kristo lyikae hamwi na mrima yanyu. Amen.