Read Kivunjo New Testament 1999 Wafilyipi 2 Bible Online

Wafilyipi 2 - Kivunjo New Testament 1999 bible

Wafilyipi 2

¹Na nyoe muwewapfu kyipfa kya iuṟa wuindi na ngyuunyamaṟi tsanyu.

²Ngyuunyamaṟi muletsiwuta kacha kui iosha mchilyi ang'anyi o waṟufui wa ngyinenyi, mṟufui ulya o Satana aiṟunda maṟunda wulalu kyiiṙi kya walya waiwingana na Ruwa;

³wakyeri kye kacha, soe loose luleweṟunda kui isanza nawo, langonyi tsa mmbiu yaṙu, kyiyeri luleosha lango tsa mmbiu na makusaṟo gaṙu, lukowa kui mwichiwie oṙu wana wa nyashi kyimwi na iwo wengyi.

⁴Kyaindi Ruwa kyipfa akyeri o isaṟia lying'anyi, kui ikunda lyakye lying'anyi alelukunda;

⁵mṟasa kyiyeri kyilya luwekyeri wapfu kyipfa kya maṙeko gaṙu; naleluṟutsa hamwi na Kristo; kyimwi na igamba kye, mulekyiṟo kui isaṟia.

⁶Kaluṟutsa hamwi na oe, kaluṟamiṟa hamwi na oe wuyanenyi wo ruwewu, kyiiṙi kya Kristo Yesu.

⁷Kundu kyiiṙi kya shiyeri-sho shiicha naloṟe ielewetsa lya isaṟia lyakye kui wucha wokye koṙu soe kyiiṙi kya Kristo Yesu.

⁸Cha kyipfa mulekyiṟo kui isaṟia, kui njia ya iiṙikyia; chi kui ipfuṟukana lyanyu-pfo, nyi kyisumbo kya Ruwa;

⁹maa chi kui mawuto-pfo, mndu oose alachekushela.

¹⁰Kyipfa nyi wuṙo luwagumbe, lulegumbo kyiiṙi kya Kristo Yesu, luwute mawuto mecha, igo wookyia kacha Ruwa alegaṟeyeṟa kundu luwute luṙo.

¹¹Kyipfa kya ikyo kumbuonyi kye kacha nyoe, muwewafee cha wandu walaiṙikyie Ruwa. Wayuda wekyemulaga, “Wandu walawaṙine,” Wayuda walya wekyegamba kye wo nyi “Wandu waṙine,” kyimwi na igamba kye, nyi iṙino lya mmbiu lyilyiwute kui mawoko.

¹²Kyiyeri-kyo kya kacha mulawewoṙe Kristo, muwelekanyi na mbaṟe ya Isiraelyi, wayenu walawoṙe shiteṟio sha kyaasa kyilya. Muwewoṙe ikusuria-pfo, maa muweichi Ruwa-pfo.

¹³Kyaindi wulalu, kyiiṙi kya Kristo Yesu, nyoe muwekyeri kuleshi iho mawookyionyi, mowa kufuhi kui samu ya Kristo.

¹⁴Kyipfa oe nyi oe ufoṟo loṙu, aleluwutia soe luwekyeri wawi lukowa umwi; kafunja kyiambasa kya makyiṙi-gawi kyiweluletsanie.

¹⁵Na oe ammbute kyituwa kyilya kui mmbiu okye; nyigo mawawaso ga shindo wandu wawaṟi iwuta na walawaṟi iwuta; kundu nawikye iwo wawi wawe mndu umwi mhya kyiiṙi kyakye; kaende ufoṟo.

¹⁶Kawasanza woose wewawi na Ruwa mmbiunyi umwi, kui njia ya msalaba, amrumatse kyituwa kyilya kui msalaba-cho.

¹⁷Kacha kacheonguo ufoṟo konyu nyoe muwekyeri kuleshi, na ufoṟo ko walya wawekyeri kufuhi.

¹⁸Cha kyipfa kokye soe loose lulewona njia yetikyira kufuhi na Awu Mumuyonyi umwi.

¹⁹Kyasia wookyia wulalu nyoe chi wayenu maa wandu waikuiṙia-pfo, indi nyoe nyi wandu walakyeri wayenu hamwi na wandu wa Ruwa, wandu wa kanyi ko Ruwa.

²⁰Muwawikye urendenyi lo wasu na weonguo shisuku, na Kristo Yesu amonyi nyi igoe lying'anyi lya ndumbenyi.

²¹Kyiiṙi kyakye numba yoose iwaṙanyi necha na ing'ana mṟasa iwe hekalu lyiele kyiiṙi kya Mndumii.

²²Kyiiṙi kyakye nyoe muwawikye handu hamwi ikaa kanyi ko Ruwa Mumuyonyi.