Read Kivunjo New Testament 1999 Wafilyipi 4 Bible Online

Wafilyipi 4 - Kivunjo New Testament 1999 bible

Wafilyipi 4

¹Koikyo ngyimuterewa, inyi ngikyeri mpfungo kyiiṙi kya Mndumii, mukae chandu kyiwaṟi kyilya mulelagio.

²Kui wuindi woose na wuhoo, kui wusimiri, mochiwanzana ikundenyi;

³na ipfuṟukana iwa mbumbu imwi kui iwaṙana kui ufoṟo.

⁴Mmbiu umwi, na Mumuyo umwi, chandu mulewelago ikusurienyi lyimwi lya kyilya mulelagio.

⁵Mndumii umwi, iiṙikyia lyimwi, wupatiso wumwi.

⁶Ruwa umwi, na oe nyi Awu o wandu woose, akyeri Mndumii o shoose, ekyeṟunda kyiiṙi kya shoose na akyeri shindonyi shoose.

⁷Kyaindi orio umwi oṙu naleenengo isaṟia iṙuana na kyiyeṟo kya kyisumbo kya Kristo.

⁸Chandu shiṟeio shiele shigambie, “Lyilya aleṙo na ruwewu, nalewinga na isoka Satana walya awewachilyie kaenenga wandu shienengo.”

⁹Kyasia ṙeṙo-lyo, “Iṙo na ruwewu,” lyagamba-kyi kokooya sile nyi igamba kye na oe taa nalesoka mṟasa wanda ya uruka?

¹⁰Na icho alesoka nyi oe aleirio wuye mnu kuta ngyina tsoose, kundu naichuṟe shindo shoose.

¹¹Na oe nalesambuṟa wengyi iwa wasu; na wengyi iwa weonguo shisuku; na wengyi iwa wainjilisti; na wengyi iwa walyisi na walosha;

¹²kyipfa kya iafutsia wandu wa Ruwa, kundu maṟunda getaramana gaṟundikye, mṟasa mmbiu o Kristo ukarisho.

¹³Mṟasa na soe loose luiṙime iwa mbumbu imwi kui iiṙikyia na imanya mnu Mana o Ruwa, mṟasa iwa wandu waafutsie kyiiṙikyia, na wapfulukyie cha Kristo.

¹⁴Kundu lulawe-se wana watutu, lochiwiyitso ipfo na ipfo, na iṙoo nyi orio mkuma o malosho geṙetsa, kui ngyeṟo tsa wandu, kui mbiṟi, lochiosha njia tsa wulembi.

¹⁵Kyaindi luṙeṙe loi ikundenyi na ing'ana mṟasa lumkooye shindonyi shoose, oe akyeri mṙoe, Kristo.

¹⁶Kui oe mmbiu oose ochilungo na iwaṙana kui wutarami wo orio kyiwungo, iṙuana na iṟunda lya orio kyiwungo; iṟunda lyekyeṙosa mmbiu uiṙime ikukarisha umonyi ikundenyi.

¹⁷Kyasia ngyigamba kuṙi, lyingyi-se ngyiṟingyishia kyiiṙi kya Mndumii, wookyia wulalu maa mulawute chandu wandu wekyewuta, wuwichonyi wo makusaṟo gawo.

¹⁸Walya ngyuuṟango tsawo tsilewiko meema, nawo walewiko kuleshi na moo o Ruwa, kyipfa kya wutondo wukyeri mrimenyi kowo, kyipfa kya wuumu wo mrima yawo.

¹⁹Wakyeri kye wakampfa ngapfu wekyekuwika mbonyinyi tsa ukoe waiṙime iwuta orio kyindo kya wunyamaṟi kui ilanga.

²⁰Indi nyoe, chi wuṙo mulekulosha ko Kristo-pfo.

²¹Mulemuicho mukolosho kyiiṙi kyakye, chandu loi ikyeri kyiiṙi kya Yesu.

²²Ṙenyi mbonyi tsa mchumie o kuwooka o mndu o kacha, okyenyamaṟika kui iosha lango tsekyelemba.

²³Mugalutso muwe wandu wahya ikusurienyi lya mrima yanyu.

²⁴Muwaṙe mchumie o mndu mhya, ulegumbo kui mbaṟe ya Ruwa wusumganyinyi na wuelenyi wo loi.

²⁵Kyasia ṙenyi wongo, muṙeṙe loi orio mndu na momṟasa okye; kyipfa soe lukyeri shiwungo, orio umwi kyiwungo kya oṙoe.

²⁶Kaponyi nyi nyashi, indi mulanyamaṟe; mnengyeṟi ulaolokyie nyashi ilandesie.

²⁷Maa mulaenengye Mokyiriinzi ṙaawa.

²⁸Mwiwi alaiwe-se; indi nanga apfuṟukana, echiwika wuragari wo iṟunda lyicha kui mawoko gakye amonyi, nawaṙe kyindo kyetarama mndu alawoṙe.

²⁹Ṙeṙo lyoose lyiwicho lyilawukye maṙumbunyi ganyu, indi lyilyicha lyeiṙima itarama ulya alangyie ṙeṙo lyicha, kundu lyienengye isaṟia walya wechilyiicho.

³⁰Maa mulaenengye ikuinaṙia Mumuyo ulya Mweele o Ruwa; akyeri kye kokye mulewiko fana yeṟingyishia mṟasa mfiri o ikyiṟo.

³¹Isuo lyoose lying'anyi na nyashi tsoose na ikalagatsa na shilahio shilakae konyu, hamwi na wuwicho wo orio mbaṟe.

³²Lyingyi-se taramanenyi nyoe wenyi ko wenyi mochiwoniana fowa mrimenyi, muhooṟiane chandu na Ruwa kyiiṙi kya Kristo alemuhooṟia nyoe.