Read Kivunjo New Testament 1999 Waefeso 1 Bible Online

Waefeso 1 - Kivunjo New Testament 1999 bible

Waefeso 1

¹Paulo na Timoteo, waṟundi wa Kristo Yesu, lomuṟeia paruo nyoe wandu wa Ruwa moose kyiiṙi kya Kristo Yesu, mukyeri Filyipi, hamwi na maaskofu na mashemasi.

²Isaṟia lyiwe konyu na ufoṟo luwukyie ko Ruwa Awu oṙu na ko Mndumii Yesu Kristo.

³Ngyiana Ruwa oko orio kyiyeri ngyekyemukumbuo,

⁴mfiri yoose orio kyiyeri ngyekyemuterewia nyoe moose, ngyechiterewa kui sia,

⁵kyipfa kya iwaṙana lyanyu iṟundenyi lyeonguo Ndumi Ngyicha, wookyia mfiri ulya o kuwooka mṟasa inu.

⁶Na inyi ngyikyiiṙikyie nyikyo ikyi, kye ulya alewooka iṟunda lyicha mrimenyi konyu nechilyiafutsia mṟasa mfiri Yesu Kristo echiwuya.

⁷Wuṙo wuṙo chandu kyikyeri iṟunda lyako ikusaṟa ishi kyipfa kyanyu moose; cha kyipfa nyoe mukyeri mrimenyi koko; cha kyipfa kyipfungonyi kyako na iṟundenyi lyeringa kyiṟumi kya Ndumi Ngyicha, na iiṟingyishia, nyoe moose muleambilyia isaṟia-lyi hamwi na inyi.

⁸Kyipfa Ruwa nyi mṟingyishi oko, ngyimkundi nyoe chandu Yesu Kristo amkundi.

⁹Na ikyi nyikyo kyiterewo kyako, kye ikunda lyiengyeṟikye, wuṟangonyi na imanya lyoose;

¹⁰muiṙime iambilyia gai mecha; kundu muiṙime iwaṙa mrima ilawoṙe ukoe, kulawoṙe ṙeko, mṟasa mfiri ulya Yesu Kristo echiwuya;

¹¹muwaichuṟe shindo shicha shilya Yesu tikyi eiṙima imuenenga wuiṙimi wo ishiwuta, kui mng'ano na kyiṟumi kya Ruwa.

¹²Kyaindi, wana wa wama wako, ngyikundi mumanye kye shindo shoose shilengyiwutikyia nyi kyipfa kya ionguo Ndumi Ngyicha.

¹³Kyipfa kya ikyo, maa asikari woose wekyeringa numba iya Kaisari ekyekaa ilyi ai maṟundenyi na wandu wengyi woose waichi kye inyi ngyikyeri kyipfungonyi kyipfa ngyii mṟundi o Kristo.

¹⁴Na wana wa wama wengyi wakyeri kyiiṙi kya Kristo, wechikarisho nyi iwiko lyako kyipfungonyi, waleengyeṟa mnu ionguo Ṙeṙo lya Ruwa kulawoṙe wuowu.

¹⁵Wengyi waionguo mbonyi tsa Kristo, kyipfa kya wunyeng'i na wuṟiingyi; na wengyi kui makusaṟo mecha.

¹⁶Iwa wekyeonguo mbonyi tsa Kristo kui ikunda, waichi kye ngyimmbikye ngyiringye kyiṟumi kya Ndumi Ngyicha.

¹⁷Indi wengyi wekyeonguo mbonyi tsa Kristo kui wuṟiingyi, maa chi kui mrima mwilyi-pfo, wakusaṟie kye kui iwuta kuṙo wechiengyeṟa ngyuukyiwa tsa iwiko lyako kyipfungonyi.

¹⁸Ikyo wakundi ingyiwutia koko chi kyindo-pfo. Kyaindi ko orio njia, kokooya nyi kui ngyeṟo, ang'u kokooya nyi kui wuloi, mbonyi tsa Kristo tsigambo; koikyo ngyichihiyo, yee, na inyi ngyechichihiyo.

¹⁹Kyipfa ngyiichi kye ishi shengyigalukyia shiwe wukyiṟo woko, kyipfa kya shiterewo shanyu na kyitarama kyiwukyie ko Mumuyo o Yesu Kristo ngyechiwa mndu alamchilyie nyi kyindo;

²⁰chandu ngyileweṙelyia mnu, na ikusuria, kye ngyechirigo nyi sonu maa ale-pfo, indi kui wusimiri woose, cha mfiri yoose, na wulalu nyi wuṙo Kristo echienengo kyiṟumi mmbiunyi koko; kokooya ngyii na moo, ang'u ngyipfiie.

²¹Cha kyipfa koko inyi iwaṙa moo nyi Kristo, na ipfa nyi kyiira.

²²Indi kokooya iengyeṟa iwaṙa moo kyimmbiu koko inyi nyi ndunda tsa iṟunda lyicha, kyasia, ngyiichi nyi kyindo kyiha ngyesambuṟa-pfo.

²³Kuwoṙe shindo shiwi shingyikuruo. Ngyikundi iyenda ngyikae na Kristo; kyipfa nyi necha ngoseṟa.

²⁴Indi iengyeṟa ikaa iha wuyanenyi nyi kyindo kying'anyi ngoseṟa kyipfa kyanyu.

²⁵Na inyi ngyikusurie isho, ngyiichi kye ngyechikaa hamwi na nyoe, kundu muiṙime ichihiyo iiṙikyienyi;

²⁶mṟasa muengyeṟe ikushela kyiiṙi kya Kristo kyipfa kyako, kyipfa kya ikaa lyako hamwi na nyoe-se.

²⁷Kyaindi mkaṟo yanyu iwe chandu malosho ga Ndumi Ngyicha ya Kristo gakundi, kundu ngacha na immbona nyoe, maa ngyilakyeri ho, ngyiicho mbonyi tsanyu, kulawoṙe iloloma kye mugoṟokyi Mumuyonyi umwi, kui mrima umwi mochikapania iiṙikyia lya Ndumi Ngyicha;

²⁸maa muowuye washituwa wanyu kyindonyi kyoose-pfo. Kowo iwo nyi kyiṟingyishio kya iṙeka, indi konyu nyoe nyi kyiṟingyishio kya wukyiṟo, wulya wuwukyie ko Ruwa.

²⁹Kyipfa muwaenengye kyipfa kya Kristo, chi imwiṙikyia tupu-pfo, kyaindi na ilyiso wukyiwa kyipfa kyakye;

³⁰mochiwaṙa iwingana lyilya lyilya mulelyiwona koko, na iicho kye ngyiwoṙe mṟasa wulalu.