Read Kivunjo New Testament 1999 Waefeso 4 Bible Online

Waefeso 4 - Kivunjo New Testament 1999 bible

Waefeso 4

¹Kyasia, wana wa wama wako, wakunde wako, ngyiwoṙe ilanga lying'anyi kyipfa kyanyu, sia yako na iṟikoso lyako, koikyo goṟokyenyi kyiiṙi kya Mndumii kulawoṙe iloloma, wakunde wako.

²Ngaterewa Euodia, ngaterewa na Sintikye, wawaṙe makusaṟo gamwi kyiiṙi kya Mndumii.

³Yee, ngyikundi na iyoe taa, mongari o loi, utarame waka-wo; cha kyipfa walepfuṟukana hamwi na inyi ionguo Ndumi Ngyicha, na Kyilementi, na walya wengyi waleṟunda hamwi na inyi, walya marina gawo gakyeri kyitapunyi kyiwoṙe marina ga walya wawoṙe moo o loi uwukyie ko Ruwa.

⁴Chihiyonyi kyiiṙi kya Mndumii mfiri yoose; lyingyi-se ngagamba, chihiyonyi.

⁵Wuhoo wonyu wumanyikye ko wandu woose. Mndumii nakyeri kufuhi.

⁶Maa mulakuwinishe kyipfa kya kyindo kyoose; indi kyiyeri muiterewa Ruwa kyilya mukundi wutenyi kuṙo muwoṙe mrima iwoṙe iana.

⁷Na ufoṟo lo Ruwa, luiṟie wuṟango woose lochiringa mrima yanyu na makusaṟo ganyu kyipfa muwalungye na Kristo Yesu.

⁸Naaho-ng'u, wana wa wama, kyindo kyoose kyikyeri kya loi, kyoose kyilai kya sonu, kyoose kyikyeri kya wusumganyi, kyoose kyilawoṙe ukoe, kyoose kyechihiṟa, kyoose kyiwoṙe kyiṟumi kyicha; kokooya kuwoṙe wucha woose, kukowaṙa kyiṟumi kyoose kyicha, kusaṟenyi kyipfa kya shindo sha mbaṟe-yo.

⁹Shindo mulekulosha koko na ishiambilyia, na ishiicho na ishiwona koko, shiwutenyi; na Ruwa o ufoṟo nechikaa hamwi na nyoe.

¹⁰Ngyilechihiyo mnu kyipfa kya Mndumii, cha kyipfa mafurumionyi mowiyiṟa-se makusaṟo ganyu kyipfa kyako, chandu muwekyekusaṟa mbonyi tsako; kyaindi mulawone ṙaawa.

¹¹Chi ngyigamba kuṙo kyipfa ngyiuṟie kyindo-pfo; kyipfa ngyikuloshie ishiko na shilya ngyiwoṙe.

¹²Ngyiichi iuṟa nyi kyikyi na ngyiichi iwaṙa nyi kyikyi. Kyiiṙi kya shindo shoose ngyilelosho iiguṙa na iicho njaa, iwaṙa shindo shifoi na iuṟa.

¹³Ngyekyeiṙima shindo shoose kyiiṙi kya ulya ekyengyienenga pfinya.

¹⁴Kyaindi mulewuta necha, kyiyeri mulelya wukyiwa hamwi na inyi.

¹⁵Na nyoe taa, nyoe muwenyi muichi, lanyoe Wafilyipi, kye mawookyionyi ga Ndumi ngyicha, kyiyeri ngyilewuka Makyedonia, kuwoṙe siṟi ingyi ilekaa hamwi na inyi kyiiṙi kya ienengyia na iambilyia, sile nyoe-pfo.

¹⁶Cha kyipfa maa kulya Tesalonikye mulengyiendie shindo shengyitarama kafong'ui.

¹⁷Chi kye ngyikundi iambilyia shisumbo tikyi-pfo indi ngyikundi iwona ngoseṟa ya shindo shilya shicha mulemmbuta.

¹⁸Kyaindi ngyiwoṙe shindo shoose na ielewetsa; lyingyi-se ngyiichuo pacha. Ngyileambilyia ko Epafurodito shindo shoose shilewuka konyu, mpfaamo o shindo shekyepfaama necha, kyienengo kyikyiiṙikyie na kyichihiṟie Ruwa.

¹⁹Na Ruwa oko nechimuenenga na imuichuṟia pacha orio kyindo muuṟie iṙuana na wunjama wokye, kyiṟuminyi kya Yesu Kristo.

²⁰Wulalu Ruwa naṟumisho, Awu oṙu, mlungana na mlungana. Amen.

²¹Kyiiṙi kya Kristo Yesu iṟikyiṟenyi orio mndu o Ruwa. Walya waiṙikyie Yesu wakyeri hamwi na inyi wamuiṟikyiṟa.

²²Wandu wa Ruwa woose wamuiṟikyiṟa, ngoseṟa walya wa kanyi ko Kaisari.

²³Isaṟia lya Mndumii Yesu Kristo lyikae na mrima yanyu.