Read Kivunjo New Testament 1999 1 Watesalonikye 2 Bible Online

1 Watesalonikye 2 - Kivunjo New Testament 1999 bible

1 Watesalonikye 2

¹Kyipfa nyoe muwenyi, wana wa wama, muichi chandu lulecha na konyu, kye kulewa wulya-pfo.

²Kyaindi kuwooka lomulyiso wukyiwa na iinyalo, chandu muichi, kulya Filyipi, lulekaria kyiiṙi kya Ruwa imuongoya nyoe Ndumi Ngyicha ya Ruwa, kui iikapania mnu.

³Cha kyipfa imterewa lyaṙu muambilyie ulogo lokyeonguo chi lya wuṙetsi, maa chi lya ukoe, maa lya ngyeṟo-pfo;

⁴indi chandu luleenengo momu o ionguo Ndumi Ngyicha, nyi wuṙo luonguo. Chi cha wandu waichihiṟa wandu-pfo, indi waichihiṟa Ruwa ekyeluyeṟa mrimenyi koṙu.

⁵Kyipfa chandu muichi lulewaṙa maṙeṙo gepfula ikundo maa kyiyeri kyifuhi-pfo. Maa maṙeṙo gemuiring'ishia kya wongo gawewoṙe kyimaṙuma kyeṟika wuehi wo mrima yaṙu-pfo, na Ruwa nyi oe mṟingyishi.

⁶Lulepfula kyiṟumi ko wandu, maa konyu, maa ko wandu wengyi kyiyeri luwewoṙe wuiṙimi wo iwa ṟio konyu cha wasu wa Kristo-pfo.

⁷Indi luwekyeri wandu wahoo kyiyeri luwekyeri na nyoe, chandu mfee ekyeambuya wana wakye amonyi.

⁸Na wuṙo na soe lochiṙuana na nyoe kui ikunda lying'anyi, lulewoṙo nyi sia imuenenga, chi Ndumi Ngyicha tupu-pfo, indi na moo yaṙu taa, cha kyipfa mowa wakunde waṙu.

⁹Kyipfa wana wa wama, mukumburie wukyiwa woṙu na iṟaisho lyaṙu; cha kyipfa kyingoto na kyio luleṟunda lulacheewa ṟio ko mndu o konyu oose, lukomuongoya kuṙo Ndumi Ngyicha ya Ruwa.

¹⁰Nyoe nyi waṟingyishi, na Ruwa taa, chandu lulekaa konyu nyoe muiṙikyie Yesu, kui wuele, na kui wusumganyi, kulawoṙe igamba kye lowuta kyindo kyiwicho.

¹¹Na wuṙo, chandu muichi, chandu luleṙeṙia orio umwi onyu chandu Awu ekyeṙeṙia wana wakye amonyi, lochimukarisha na imuṟingyishia nyoe,

¹²kundu mkaṟo yanyu iṙuane na chandu Ruwa akundi, ulya ekyemulaga nyoe kundu muiṙe na Wumangyinyi wokye na kyiṟumi kyakye.

¹³Kyipfa kya ikyo na soe lokyeana Ruwa orio kyiyeri, cha kyipfa kyiyeri muleambilyia ndumo ya Ruwa muleiicho koṙu, muleiambilyia chi cha ulogo lo wandu-pfo, indi cha ulogo lo Ruwa; na nyi wuṙo ulogo-lo lukyeri; lokyeṟunda taa mrimenyi konyu nyoe muiṙikyie.

¹⁴Kyipfa nyoe, wana wa wama, muwekyeri wandu wa siṟi tsa Ruwa tsikyeri urukyenyi lo Uyuda, kyiiṙi kya Kristo Yesu; cha kyipfa mulelyiso wukyiwa wulya wulya iwuka ko wandu wa uruka lonyu muwenyi, wukyiwa mulelyiso nyi Wayuda.

¹⁵Walya walewaaga Mndumii Yesu, na weonguo shisuku, na ilulyisa soe wukyiwa; maa wekyechihiṟa Ruwa, maa iṙuana na wandu-pfo.

¹⁶Kunu wechilushingyia lulaṙeṙe na wandu walaiṙikyie Yesu waiṙime ikyiṟo; kundu waafutsie ngyuunyamaṟi tsawo mfiri yoose. Kyaindi Ruwa naiwaanduya kui nyashi.

¹⁷Kyaindi soe, wana wa wama, lulekanyi na nyoe kyiyeri kyifuhi, lulekanyi na nyoe kyimmbiu indi chi kyimrima-pfo, lulelanga mnu immbona nyoe.

¹⁸Koikyo lulekunda icha na konyu, yee, inyi Paulo, lya kuwooka na lya kawi Satana kalushingyia.

¹⁹Kyipfa ikusuria lyaṙu ang'u sia yaṙu, ang'u iṟikoso lya ikushela, nyi kyikyi? Ngyesa chi nyoe, mbele ya Mndumii oṙu Yesu kyiyeri kya icha lyakye-pfoe?

²⁰Kyipfa nyoe nyi kyiṟumi kyaṙu, na sia yaṙu.