Read Kivunjo New Testament 1999 1 Watesalonikye 3 Bible Online

1 Watesalonikye 3 - Kivunjo New Testament 1999 bible

1 Watesalonikye 3

¹Kyasia kyiyeri lulaleiṙima ikarishia ngoseṟa, lulewona nyi kyicha iṙio Atene soe luwenyi.

²Lukoṙuma Timoteo mono-wama oṙu, mṟundi o Ruwa iṟundenyi lyeonguo Ndumi Ngyicha ya Kristo, kundu namukarishe nyoe na immbiyiṟia moo ko mbonyi tsa iiṙikyia lyanyu;

³mndu alaowesho nyi ngyuukyiwa-tsi; kyipfa nyoe muwenyi muichi kye luwaṟi ikooyana natso.

⁴Cha kyipfa kyiyeri luwekyeri konyu lulesonguo immbia kye lochilya wukyiwa, chandu kyilewutika, na nyoe muichi.

⁵Koikyo na inyi kyiyeri ngyilaleiṙima ikarishia-se, ngyileṙuma mndu kundu ngyimanye iiṙikyia lyanyu, Satana alache namuyeshe, na ilya wukyiwa lyanyu lyikawa lyiwoṙe kyiira-pfo.

⁶Kyaindi kyiyeri Timoteo alecha na koṙu iwuka konyu, naleluendie mbonyi ngyicha tsa iiṙikyia lyanyu na ikunda lyanyu na kye mokyelukumbuo necha mfiri yoose, mulangyie iluwona chandu soe lulangyie immbona.

⁷Kyipfa kya ikyo, wana wa wama, mbonyi tsanyu tsileluwiyiṟia moo, ngyuukyiwenyi tsaṙu tsoose, kui iiṙikyia lyanyu.

⁸Cha kyipfa wulalu luwoṙe moo, kokoooya nyoe mulaloloma kyiiṙi kya Mndumii.

⁹Kyipfa nyi kyikyi loiṙima iana nakyo Ruwa imtaa kyilya alemmbutia nyoe, kui sia iya luichihiyo kyipfa kyayo, kyipfa kyanyu mbele yanyu na mbele ya Ruwa;

¹⁰kyio na kyingoto kyiyeri lokyeterewa kui ipfuṟukana lying'anyi luiṙime immbona nyoe, na iichuṟia shilya iiṙikyia lyanyu lyilashiwoṙe?

¹¹Kyasia Ruwa amonyi, Awu oṙu, na Mndumii oṙu Yesu, nalusongoye njienyi lushikye konyu.

¹²Mndumii namusongoye nyoe na imuengyeṟia ikunda, nyoe wenyi ko wenyi, na ko wandu woose chandu na soe lumkundi nyoe.

¹³Naiṙime itarama mrima yanyu ilalolome ilawaṙe kyindo kyoose mndu eiṙima igamba kye ingyiwicho, wuelenyi mbele ya Ruwa, Awu oṙu, kyiyeri kya icha lya Mndumii oṙu Yesu hamwi na wandu wa Ruwa woose.