Read Kivunjo New Testament 1999 1 Watesalonikye 4 Bible Online

1 Watesalonikye 4 - Kivunjo New Testament 1999 bible

1 Watesalonikye 4

¹Kyatsugaa ho, wana wa wama, luimuterewa na imuikyimbia kye muwaṙe mkaṟo iṙuṙanyi na shilya Mndumii Yesu akundi; chandu mulewona na ishiicho koṙu nyi wuṙo muwaṟi iwuta muchihiṟe Ruwa; chandu mokyewuta, wutenyi kuṙo na ngoseṟa.

²Cha kyipfa muichi nyi shindo shiha lulemmbia mushiwute kyiiṙi kya Mndumii Yesu.

³Kyipfa isho nyisho Ruwa akundi shiwutikye, iilyisho lyanyu, mukushowe na wuṟui.

⁴Orio umwi onyu naiṙime ichilyia lango tsa mmbiu okye wuelenyi na wuindi;

⁵chi kui mkaṟo ya lango ngyiwicho, cha wandu walaichi Ruwa-pfo.

⁶Mndu alalembe oṙoe maa imṙekyio kyiiṙi kya kyindo-kyi-pfo; cha kyipfa Mndumii nyi oe ekyetaa kyiṟaache kya ishi shoose; chandu lulemmbia kuwooka, lukoṟingyishia mnu.

⁷Kyipfa Ruwa alelulagia wuṟui-pfo, indi luwe wandu wawailyishe.

⁸Kyasia ulya ailega, ailega mndu-pfo indi Ruwa, ekyemuenenga nyoe Mumuyo okye Mweele.

⁹Ko mbonyi tsa ikundana, kuwoṙe kyimaṙuma kya imuṟeia-pfo; kyipfa nyoe muwenyi muwaloshe nyi Ruwa ikundana.

¹⁰Cha kyipfa mukundi wana wa wama woose wakyeri urukyenyi loose lo Makyedonia. Kyaindi lomuterewa, wana wa wama, muengyeṟe ikundana.

¹¹Lyingyi-se mutambagane iṙa iṙicha-ṙicha, na iṟunda maṟunda ganyu, na iṟunda kui mawoko ganyu muwenyi, chandu lulemmbia;

¹²kundu muwaṙe mkaṟo ngyicha mbele ya walya walakyeri poonyi lya walya waiṙikyie Yesu, maa mulatengye-tengye mochieṟeṟa.

¹³Kyaindi, wana wa wama, lukundi muṙe mulamanya mbonyi tsa iwo wapfiie-pfo, mulachewuta ho iwihiyo mrimenyi cha wengyi walawoṙe ikusuria.

¹⁴Kyipfa kokooya loiṙikyia kye Yesu nalepfa kaṟuka, na wuṙo walya wapfiie waiṙikyie Yesu, Ruwa nechiwaṟutsa cha Yesu.

¹⁵Koikyo lummbia ishi kui Ṙeṙo lya Mndumii, kye soe lui ho na moo, lochitsugaa ho mṟasa kyiyeri kya icha lya Mndumii; ny'kyaloi lochisongoya walya walempfa-pfo.

¹⁶Cha kyipfa Mndumii amonyi nechisoka iwuka ruwewu, na wandu wechiicho ṟui lying'anyi lyilaga, na ṟui lya msongoru o malaika, na iganda lya Ruwa; na walya walepfa waiṙikyie Kristo wechiṟutso kuwooka.

¹⁷Naaho-ng'u soe lui ho na moo, luletsugaa ho, Ruwa nechilurakuo na iluṙosia handu hamwi mapuchinyi; kundu luambilyie Mndumii ruwewu; na kuṙo lochikaa hamwi na Mndumii mlungana.

¹⁸Kyasia, wiyiṟianenyi moo kui maṙeṙo-ga.