Read Kivunjo New Testament 1999 1 Watesalonikye 5 Bible Online

1 Watesalonikye 5 - Kivunjo New Testament 1999 bible

1 Watesalonikye 5

¹Kyaindi, wana wa wama, ko mbonyi tsa shiyeri, kuwoṙe kyimaṙuma kyemuṟeia-pfo.

²Kyipfa nyoe muwenyi muichi na pata kye Mndumii nechicha kyiyeri mulakusaṟie chandu mbafu yekyecha kyio.

³Kyiyeri wandu waigamba, “Kuwoṙe ufoṟo na kuwoṙe ndenga-pfo,” nyi lyo-ndu irumatso lyechicha kulawoṙe mndu akusaṟie, chandu fowa yekyecha na ko mndu mka mnene, na kya loi wechikyia-pfo.

⁴Indi nyoe, wana wa wama, mukyeri meemenyi, mṟasa Yesu nache kyiyeri mulakyikusaṟie chandu mbafu yekyewuta-pfo.

⁵Cha kyipfa nyoe moose mowa wandu wekyewuta shindo cha ilyi orio kyindo kyekyeṟundo ngyeelenyi; soe chi wandu wekyewuta shindo meemenyi-pfo.

⁶Kyasia lulalae maṙoe cha wandu wengyi, indi lulae kyiṙombo, na iwaṙa meena.

⁷Kyipfa walya wekyelaa maṙoe wekyelaa kyio, na walya wekyenango taa wekyenango kyio.

⁸Kyaindi soe lokyewuta shindo cha ilyi orio kyindo kyekyewuto ngyeelenyi, luwaṙe meena, kunu lochiwaṙa iiṙikyia na ikunda na lukusurie nakamwi ikyiṟo nyi Ruwa, na ikyo kyechiwa kyindo kyeringa mṙoe yaṙu ilakapo nyi kyindo.

⁹Cha kyipfa Ruwa alalekunda ilukapa kui nyashi yakye, indi luwone wukyiṟo, kui Mndumii oṙu Yesu Kristo;

¹⁰ulya alepfa kyipfa kyaṙu, kundu luwaṙe moo hamwi na oe, kokooya lulee kyiṙombo ang'u kokooya lulee maṙoe.

¹¹Kyasia, wiyiṟianenyi moo na iloshana orio mndu na oṙoe, chandu muiwuta.

¹²Kyaindi, wana wa wama, lukundi mumanye walya wekyekutuura kyipfa kyanyu, na imugoṟokyia nyoe kyiiṙi kya Mndumii, na imuikyimbia;

¹³muwaindie mnu ikundenyi, kyipfa kya maṟunda gawo. Waṙenyi ufoṟo nyoe wenyi ko wenyi.

¹⁴Wana wa wama, lomuterewa, ṙeṙienyi walya walawoṙe wuyendelyi wucha; karishenyi wafofo, iṟichenyi wafafa; karishienyi wandu woose.

¹⁵Kuringyenyi mndu oose alatae oṙoe kyiwicho awutio; indi mfiri yoose oshenyi kyilya kyikyicha, nyoe wenyi ko wenyi na ko wandu woose.

¹⁶Chihiyonyi mfiri yoose;

¹⁷terewenyi kulawoṙe itsitsia;

¹⁸anenyi kyipfa kya orio kyindo; kyipfa isho nyisho shilya Ruwa akundi shiwutikye konyu kyiiṙi kya Kristo Yesu.

¹⁹Mularumishe Mumuyo Mweele;

²⁰mulamine ionguo shisuku;

²¹yeshenyi shindo shoose; wutenyi kyilya kyikyicha.

²²Kushowenyi na wuwicho wa orio mbaṟe.

²³Ruwa o ufoṟo amonyi namuilyishe nakamwi, na nyoe mrima yanyu na ngoo tsanyu na mmbiu yanyu, muwe wandu mulawoṙe ṙeko, kyiyeri kya icha lya Mndumii oṙu Yesu Kristo.

²⁴Ulya alemulaga nyoe nechiwuta, kyipfa nekyewuta shilya ateṟia.

²⁵Wana wa wama, luterewienyi.

²⁶Iṟikyiṟenyi wana wa wama chandu walya waiṙikyie Yesu wekyeiṟikyiṟana.

²⁷Ngammbia kui wuchilyi wo Mndumii, woose waiṙikyie Yesu wasomio paruo-i.

²⁸Isaṟia lya Mndumii oṙu Yesu Kristo lyikae hamwi na nyoe.