Read Kivunjo New Testament 1999 2 Watesalonikye 2 Bible Online

2 Watesalonikye 2 - Kivunjo New Testament 1999 bible

2 Watesalonikye 2

¹Kyasia, wana wa wama, lumuterewa, ko mbonyi tsa icha lya Mndumii oṙu Yesu Kristo, na ikuumbia lyaṙu mbele yakye,

²kye maa mulaiṟewe iwinyi mṟasa iṙa iwuta kyilya mukundi, maa mulaowesho, kui mumuyo, maa kui ṙeṙo, maa kui paruo ikusaṟo kye nyi yaṙu, cha ilyi kye mfiri Mndumii aicha lya kawi ulemcha.

³Mndu oose ulamulembe kui mbaṟe yoose; kyipfa mfiri-cho uicha-pfo, mṟasa kuche kuwooka Ikana Ruwa, kaloṟo na pata mndu ulya molega kilya Ruwa awawasie, mana ekyekana Ruwa.

⁴Ulya ekyewingana, ekyekuiria oe amonyi wuye ya orio kyindo kyekyelago Ruwa ang'u ikundo na iindio; mṟasa oe amonyi iṙamia hekalunyi lya Ruwa, kakuloṟa oe amonyi cha ilyi kye oe nyi oe Ruwa.

⁵Ngyesa mukumburie kye kyiyeri ngyiwekyeri hamwi na nyoe ngyilemmbia isho-pfoe?

⁶Na wulalu kyishingyie mukyiichi, ulya naiṙime iloṟo na pata kyiyeri kyakye.

⁷Kyipfa wuṟikyi wulya wo iwingana wuiṟunda wulalu; kyaindi kuwoṙe ashingyie wulalu mṟasa kyiyeri ewuto ho.

⁸Iho nyi ho-ndu eloṟo-ng'u ulya alewie Ruwa, ulya Mndumii Yesu emmbaaga kui mṟufui o ṙumbu lyakye, na imrumatsa kui iloṟo lya oe ikaa pfo.

⁹Ulya akyeri kye icha lyakye nyi kui pfinya ya Satana, kui wuiṙimi woose, na shiṟingyishio na maṟiyisho ga wongo.

¹⁰Na wulembinyi woose wo wunyamaṟi ko iwo waiṙeka; cha kyipfa waleiṙikyia ikunda loi iya waiṙime ikyiṟo-pfo.

¹¹Koikyo Ruwa naiwaendie pfinya ya iṙeka, waiṙikyie wongo;

¹²kundu waanduyo woose walaleiṙikyia loi, indi wawechihiyo kyipfa kya iwuta wunyamaṟi.

¹³Kyaindi kyalukooya soe iana Ruwa mfiri yoose kyipfa kyanyu, wana wa wama mulekundo nyi Mndumii, cha kyipfa Ruwa nalemusambuṟa wookyia mawookyionyi muambilyie wukyiṟo, kyiiṙi kya iilyisho nyi Mumuyo, na iiṙikyia loi;

¹⁴alemulagia nyoe kui Ndumi Ngyicha yaṙu, kundu luambilyie mng'ano o Mndumii oṙu Yesu Kristo.

¹⁵Kyasia, wana wa wama waṙu, goṟokyenyi kulawoṙe iloloma, muoshe shilya muleambilyia kui malosho gaṙu, kokooya nyi kui maṙeṙo, ang'u kui paruo yaṙu.

¹⁶Na Mndumii oṙu Yesu Kristo amonyi, na Ruwa Awu oṙu, alelukunda kaluenenga iwiyiṟio moo lya mlungana na ikusuria lyicha, isaṟienyi,

¹⁷namuwiyiṟie moo na imukarisha orio ṙeṙonyi na iṟundenyi lyicha.