Read Kivunjo New Testament 1999 2 Watesalonikye 3 Bible Online

2 Watesalonikye 3 - Kivunjo New Testament 1999 bible

2 Watesalonikye 3

¹Lyefurumia, wana wa wama, luterewienyi, Ṙeṙo lya Mndumii lyiengyeṟikye na ing'anyiso chandu kyikyeri konyu.

²Lundekyiṟo iwuka ko wandu wulawoṙe wusumganyi, wawicho, kyipfa chi woose wawoṙe iiṙikyia-pfo.

³Kyaindi Mndumii nekyeafutsia shilya ateṟia, echimukarisha na imuringa mulatewo nyi mmbicho ulya.

⁴Na soe lukusurie Mndumii ko mbonyi tsanyu, kye muiwuta shilya lulemmbia, lyingyi-se kye mochishiwuta.

⁵Mndumii namusongoye mrima yanyu muambilyie ikunda lya Ruwa na wusimiri wo Kristo.

⁶Wana wa wama waṙu, lummbia rinenyi lya Mndumii Yesu Kristo, kaenyi kuleshi na mono-wama alaiosha kyilya muleambilyia koṙu.

⁷Muichi muwenyi chandu kyimmbaṟi iluosha; cha kyipfa lulewaṙa mkaṟo mmbicho konyu-pfo.

⁸Maa lulelya kyelya ko mndu oose kui imteng'elyia-pfo indi kui wukyiwa na matuuro, kyio na kyingoto luleṟunda, kundu mndu oose o konyu alaluenengye kyindo kulawoṙe imtaa.

⁹Chi kye lulawewoṙe pfinya ya imuitika muluenengye shindo-pfo, kundu nyoe mukuloshie koṙu, muluoshe.

¹⁰Cha kyipfa maa kyiyeri kyilya luwekyeri konyu lulemmbia kyindo-kyi, kye kokooya mndu alakundi iṟunda kyindo, kyasia, alalye kyelya.

¹¹Kyipfa luichuoe kye kuwoṙe wandu konyu walawoṙe mkaṟo mcha, wawoṙe maṟunda-pfo, kyaindi wekyekuwinisha na mbonyi tsa wandu wengyi.

¹²Kyasia luwia iwo na iwatutuma kyiiṙi kya Mndumii Yesu Kristo, waṟunde maṟunda kui wuramiri na ilya kyelya kya msino owo wawenyi.

¹³Kyaindi nyoe, wana wa wama, maa mulapfiiyo nyi mṙoe kyiiṙi kya iwuta shindo shicha.

¹⁴Na kokooya mndu oose alaosha malosho gaṙu gakyeri iha paruonyi kushowenyi na mndu-cho, maa mulaṙeṙe na oe, naiṙime irigo nyi sonu;

¹⁵kyaindi mulamtale cha mokyituwa, kyaindi mtutumenyi cha mono-wama.

¹⁶Wulalu, Mndumii o ufoṟo amonyi namuenengye ufoṟo kyiyeri kyoose kui njia tsoose. Mndumii nawe hamwi na nyoe moose.

¹⁷Shiiṟikyiṟo shako inyi Paulo, inyi ngyimonyi. Ikyi nyikyo kyindo kyeloṟa orio paruo; nyi kuṙo ngyekyeṟeia.

¹⁸Isaṟia lya Mndumii oṙu Yesu Kristo lyikae na nyoe moose.