Read Kivunjo New Testament 1999 1 Timoteo 1 Bible Online

1 Timoteo 1 - Kivunjo New Testament 1999 bible

1 Timoteo 1

¹Inyi Paulo, msu o Kristo Yesu, kui iwawaso lya Ruwa Mkyiṟa oṙu na Kristo Yesu, ulya lukuwoṙe na oe tapu;

²ngaṟeia paruo-i ko Timoteo, mana oko mkunde iiṙikyienyi. Isaṟia lyikae kopfo, na ihooṟia, na ufoṟo, shiwukyie ko Ruwa Awu na ko Kristo Yesu Mndumii oṙu.

³Ngyilekuterewa ukae Efeso, kyiyeri ngyiweiyenda Makyedonia, kundu uime wandu wengyi walaloshe shindo shingyi.

⁴Walaṙetsie shiyeri shawo mbonyinyi tsa wongo na marinenyi gafoi ga waku wawo, shekyeenenga wandu iwesa shindo shifoi sha wutondo. Shindo-sho shiwoṙe ṙaawa kyindonyi Ruwa aluṟeyeṟie-pfo, kyindo lukyiichi kui iiṙikyia.

⁵Kyaindi kyimaṙuma kya iwawaso-lyo nyi ikunda lyiwukyie mrimenyi mwilyi na makusaṟonyi mecha, na iiṙikyia lyilawoṙe wukulembecheṟi.

⁶Wengyi walaichi isho waleosha shindo shiwicho;

⁷wakundi iwa walosha wa mawawaso, maa chandu walaichi shilya waigamba maa shindo shilya waionguo kulawoṙe wuowu.

⁸Kyaindi luichi kye mawawaso nyi kyindo kyicha, kokooya mndu agakusuria kui njia ikyeri ya sungusinyi.

⁹Aichi kyindo-kyi kye mawawaso chi galeṙiko kyipfa kya wandu wasumganyi-pfo indi kyipfa kya wanyamaṟi, na walakyeri wayendelyi, na wekyefunja mawawaso ga Ruwa, na walya walekyeindia shindo shiele, na wekyewaaga wafee wawo, na wawaagi.

¹⁰Na waṟui, na wekyelaa na wandu wa nguwo tsawo, na wekyeiwa wandu, na wekyeṙeṙa wongo, na wekyelya nyamu kui wongo; na kuwoṙe kyindo kyingyi kyoose kyilaṙuṙanyi na malosho gawoṙe moo.

¹¹Chandu kyikyionguoe Nduminyi Ngyicha ya kyiṟumi kya Ruwa ekyeṟumisho, Ndumi Ngyicha ngyileenengo iṟunda lyeionguo.

¹²Na inyi ngyiana Kristo Yesu Mndumii oṙu, alengyienenga pfinya cha kyipfa alengyiwona kye ngyekyeafutsia shilya ngateṟia, kangyiwika iṟundenyi lyakye.

¹³Maa chandu ipfo mawookyionyi ngyiwekyelahia, mndu ekyelyisa wandu wukyiwa, ngyilekyeaṙanyia shilya ngyiwio; kyaindi ngyileenengo isaṟia cha kyipfa ngyilewuta kuṙo kui wutondo, na kyipfa kya iuṟa iiṙikyia.

¹⁴Na isaṟia lya Mndumii oṙu lyileengyeṟika mnu, hamwi na iiṙikyia na ikunda lyikyeri kyiiṙi kya Kristo Yesu.

¹⁵Nyi kyindo kya loi, na kyiwaṟi iiṙikyio nakamwi, kye Kristo Yesu nalecha na wuyanenyi nakyiṟe wanyamaṟi; walya o kuwooka ai nyi inyi.

¹⁶Kyaindi kyipfa kya ikyo ngyilewona isaṟia, kundu mrimenyi koko inyi o kuwooka, Yesu Kristo naṟingyishie wucha wokye wulekyesia; ngyiwe kyindo walya wechimwiṙikyia wechikyiambuya, wawone moo o mlungana.

¹⁷Wulalu ko Mangyi o shiyeri shoose, alekyerumatso, alekyewono na meso, Ruwa alawoṙe ungyi ai cha oe, kokye kuwaṙe wuindi na kyiṟumi mlungana na mlungana. Amen.

¹⁸Mono-ko, Timoteo, gakuenenga iwawaso-lyi lyiwe kyiseyesoe, kyipfa kya mbonyi tsapfo tsa ionguo shisuku, kundu kyiiṙi kya isho ukapane shiṙa shilya shicha.

¹⁹Uwe mndu awoṙe iiṙikyia na makusaṟo mecha, galya wandu wengyi walegatakulyia kuleshi, wakarumara ko mbonyi tsa iiṙikyia.

²⁰Kyiiṙi kya iwo kuwoṙe Himenayo na Iskanda, walya ngyilewaṙambika Satana, kundu nawakape, na kui iwutio kuṙo wakuloshe walalahie Ruwa.