Read Kivunjo New Testament 1999 1 Timoteo 2 Bible Online

1 Timoteo 2 - Kivunjo New Testament 1999 bible

1 Timoteo 2

¹Kyasia kyindo kying'anyi kuta shoose nyi iterewiana, iterewa Ruwa shilya lukundi, na iana Ruwa kyipfa kya mboṟa tsakye. Isho shiwutikye kyipfa kya wandu woose;

²kyipfa kya wamangyi na wawoṙe wuchilyi, luwe wandu walakyeri ndengyenyi na wawoṙe ufoṟo, kyiiṙi kya iindia Ruwa na wandu woose.

³Ikyi nyi kyindo kyicha, nakyo nyi kyindo kyikyikunde mbele ya Ruwa Mkyiṟa oṙu,

⁴ulya akundi wandu woose wakyiṟo, na iiṙima imanya shikyeri sha loi.

⁵Cha kyipfa Ruwa nyi umwi, na ulya ekyesanza Ruwa na wandu nyi umwi, mndu ulya ai Kristo Yesu.

⁶Ulya alekuwuta amonyi kundu naendie wandu woose wukyiṟo; ikuwuta lyileloṟa kyiyeri Ruwa akundi ikyiṟa wandu woose.

⁷Na inyi kyipfa kya wukyiṟo-wo ngyilewiko ngyiwe moonguo Ṙeṙo lya Ruwa na msu (ngyiṙeṙa loi, ngyiṙeṙa wongo-pfo), mlosha o wandu walaiṙikyie Ruwa iiṙikyienyi na wuloi.

⁸Kyasia ngyikundi wasoṟo waloshe siṟinyi, wawoṙe mrima ngyiwaṙami. Waire mawoko ilyi waiterewa Ruwa, kulawoṙe ikapo nyi nyashi ang'u igaluana.

⁹Na wuṙo waka wakuchope kui nguwo, wakushikyie necha, hamwi na wupfereri wucha, na mrima uwoṙe meena; chi kui ioka njui, maa iṟaa shindo sha sahapu na lulu, maa nguwo tsa woguru wung'anyi-pfo;

¹⁰indi kui mawuto mecha, chandu kyiwaṟi waka wekyeloṟa kye waowuye na ikunda Ruwa.

¹¹Mndu mka nakuloshe alaiamtsa kyituṟu, echipfereria nakamwi.

¹²Ngyienenga mndu mka momu o ilosha maa o ichilyia mndu msoṟo-pfo, indi nawe mndu alaiamtsa kyituṟu.

¹³Cha kyipfa Adamu nyi oe alegumbo kuwooka, na Eva kagumbo numa.

¹⁴Maa Adamu alelembo-pfo, indi mndu mka nalelembo nakamwi kaṙeko.

¹⁵Kyaindi mndu mka nechikyiṟo kui iwaṙa wana, kokooya awaṙa iiṙikyia Yesu na ikunda na iilyisho, hamwi na mrima uwoṙe meena.