Read Kivunjo New Testament 1999 1 Timoteo 4 Bible Online

1 Timoteo 4 - Kivunjo New Testament 1999 bible

1 Timoteo 4

¹Kyasia Mumuyo naiṙeṙa na pata kye shiyeri sha mafurumionyi wandu wengyi wechikuletsana na iiṙikyia, wechiaṙanyia mumuyo ngyiwicho yekyelemba, na malosho ga wandu waikuloṟa cha ilyi wawoṙe Mumuyo o Ruwa kyaindi wawachilyie nyi Satana.

²Kui wukulembecheṟi wo wandu wekyeṙeṙa wongo, na mrima ipfiie ngapfu kyipfa ingyichilyie nyi Satana.

³Wechilosha kye wandu walaalyikye ang'u ialyiko, na iwawia walalye shelya shilyiwe, shilya Ruwa aleshigumba, na soe luiṙikyie Yesu imanya wuloi kye luwaṟi iana Ruwa kyiyeri loambilyia shindo-sho.

⁴Cha kyipfa orio kyindo Ruwa agumbie kyikyicha, maa kuwoṙe kyiwaṟi ilego-pfo, kokooya kyaambilyio kui iana.

⁵Kyipfa kyikyiilyishe kui Ṙeṙo lya Ruwa na kui iterewa.

⁶Ukumbuṟe wandu shindo-sho, na iyoe nochiwa mṟundi mcha o Kristo Yesu, na mndu uichiwie mbonyi tsa iiṙikyia, na malosho mecha galya uleosha.

⁷Indi malosho galaṙuṙanyi na galya ya Ndumi Ngyicha ugalege, na iyoe ukuichiwiṟe iwaṙa iowuo na ikunda Ruwa.

⁸Cha kyipfa ikuichiwiṟa iwaṙa pfinya tsa mmbiu kuwoṙe kyiira kyitutu, kyaindi iowuo na ikunda Ruwa shindonyi shoose nyi kyindo kyicha. Kyimwi na igamba, nuwoṙe kyiteṟio kya moo o wulalu, na ulya ochikouipfo mfiri-yo iicha.

⁹Nyi kyindo kya loi nakamwi, na kyiwaṟi iiṙikyio nyi woose wekyeosha Yesu,

¹⁰kye lokyekulyisa wukyiwa na itambagana kyipfa kya ikyo, na luwikyie ikusuria lyaṙu ko Ruwa ai na moo, akyeri Mkyiṟa o wandu woose, ngoseṟa o walya waiṙikyie.

¹¹Shindo-sho ushigambe na ishilosha.

¹²Mndu oose alamine wundaka wopfo, indi uwaṙe mkaṟo mcha mbele ya walya waiṙikyie Yesu, kyiiṙi kya iṙeṙa na ikundenyi na ufoṟo na mkaṟonyi ulawoṙe ukoe lo wuṟui.

¹³Mṟasa kyiyeri ngyechicha, upfuṟukane kyiiṙi kya ikulosha shiṟeio shiele na iikyimba na ilosha.

¹⁴Ulaṙe iṟunda na kyisumbo kyilya uwoṙe, umwenengye kui ionguo shisuku na kui iyekyio mawoko nyi wameeku wa siṟi.

¹⁵Isho ukusaṟe kyipfa kyasho; ushioshe; kundu wandu woose wamanye handu ushikyie.

¹⁶Ringa mrima opfo, na malosho gapfo. Ulalekane na shindo-sho; kyipfa kui iwuta kuṙo nochikyiṟa mrima opfo na mrima ya walya wechiicho shilya uilosha.