Read Kivunjo New Testament 1999 2 Timoteo 1 Bible Online

2 Timoteo 1 - Kivunjo New Testament 1999 bible

2 Timoteo 1

¹Inyi Paulo, msu o Kristo Yesu, iṙuana na chandu Ruwa akundi, kyipfa kya kyaasa kya moo ukyeri kyiiṙi kya Kristo Yesu;

²ngaṟeia paruo-i ko Timoteo, mono-ko mkunde. Isaṟia lyikae kopfo, na ufoṟo, shiwukyie ko Ruwa Awu na ko Kristo Yesu Mndumii oṙu.

³Ngyiana Ruwa, ngyekyemwindia na imterewa kui mrima mmbaṙami wookyia kacha lya waku wako, chandu ngyekyekukumbuo iyoe kyiyeri kyoose, kyiiṙi kya iterewa lyako kyio na kyingoto.

⁴Na inyi ngyilangyie mnu ikuwona, ngyechikumbuo mcheṟeṟe yapfo, kundu ngiichuo sia;

⁵ngyechikumbuo iiṙikyia uwoṙe lyilawoṙe wukulembecheṟi lyiwekyeri kuwooka ko wakyekuyo ekyelago Loisi, na ko womoo ekyelago Eunikye, na inyi ngyiichi kye maa iyoe nulyiwoṙe.

⁶Kyipfa kya ikyo ngyikukumbuṟa, ulanyamaṟe kyisumbo kya Ruwa, kyikyeri mrimenyi kopfo kui iyekyio mawoko gako.

⁷Kyipfa Ruwa aleluenenga mrima o wuowu-pfo, indi o pfinya na o ikunda na uwoṙe meena.

⁸Kyasia ularigo nyi sonu kyipfa kya iṟingyishia lyaṙu. Ularigo nyi sonu kyipfa kyako inyi mpfungo okye, indi ukarishie mawicho hamwi na inyi kyipfa kya Ndumi Ngyicha, iṙuana na pfinya ya Ruwa.

⁹Ulya alelukyiṟa kalulaga kui ndago ngyiele; chi iṙuana na mawuto gaṙu soe-pfo; indi na kyilya oe akundi na isaṟia lyakye. Isaṟia-lyo luleenengo kyiiṙi kya Kristo Yesu wookyia mlungana.

¹⁰Na wulalu lyiṟingyishio kui iloṟo lya Mkyiṟa oṙu Kristo Yesu; alegalutsa upfu, na ishukuo moo na kulawoṙe inyamaṟika, kui Ndumi iya Ngyicha;

¹¹ikyeri kye kyipfa kyayo ngyilewiko ngyiwe moonguo mbonyi na msu na mlosha.

¹²Kyipfa kya ikyo ngyileolokyio matuuro-ga maa ngyirigo nyi sonu-pfo; kyipfa ngyiichi icho ngyimwiṙikyie, na imanya piu kye neiṙima iringa kyilya ngyilekooma kokye mṟasa mfiri ulya.

¹³Osha necha kui wuragari mbonyi tsiwoṙe moo uletsiicho koko, iiṙikyienyi lya ikunda lyikyeri kyiiri kya Kristo Yesu.

¹⁴Ringa kyindo kyilya kyicha kui Mumuyo Mweele ekyekaa mrimenyi koṙu.

¹⁵Nuichi kyindo-kyi, kye woose wakyeri wa Asia walengyiṙicha. Kyiiṙi kyawo kuwoṙe Fikyelo na Herimokyene.

¹⁶Mndumii naenengye isaṟia walya wa ura lo Onesifoṟo, kyipfa kafoi nalengyichihiṟa, maa alerigo sonu nyi kyipfa kya ilyi ngyiwempfungye-pfo,

¹⁷indi kyiyeri awekyeri iha Roma, nalengyipfula kui wuragari kangyiwona.

¹⁸Mndumii namwenengye iwona isaṟia mbele ya Mndumii mfiri ulya o ianduyo. Na chandu alengyiṟundia kulya Efeso, iyoe nuichi mnu.