Read Kivunjo New Testament 1999 2 Timoteo 2 Bible Online

2 Timoteo 2 - Kivunjo New Testament 1999 bible

2 Timoteo 2

¹Kyasia iyoe, mono-ko, uwaṙe wukari isaṟienyi lyikyeri kyiiṙi kya Kristo Yesu.

²Na shindo shilya uleshiicho koko mbele ya waṟingyishi wafoi, isho ushiṙambikye wandu wasimiri wechiiṙima ilosha wengyi.

³Ulye wukyiwa hamwi na inyi, cha asikari mcha o Kristo Yesu.

⁴Kuwoṙe mndu ekyekapana shiṙa ekyekuwika shindonyi sha wuyana-pfo, kundu nachihiṟe ulya alemṟeia nawe asikari.

⁵Maa mndu kawingana temonyi ekyeenengo kyindo kyeloṟa nammbinzi, sile awingana kulawoṙe ngyeṟo-pfo.

⁶Kyiwaṟi mṙemi awoṙe wukyiwa wo maṟunda nawe o kuwooka iambilyia ṙombo lya ndunda.

⁷Manya mnu isho ngyigamba, cha kyipfa Mndumii nekuenenga wuṟango mbonyinyi tsoose.

⁸Kumbuo Yesu Kristo aleṟuka ko wapfu, o mbaṟe ya Dawidi chandu malosho gako ga Ndumi-i Ngyicha gaigamba.

⁹Na inyi kyiiṙi kyayo ngyiletuuro mṟasa ipfungo cha mndu awutie mawicho; kyaindi Ṙeṙo lya Ruwa lyekyepfungo-pfo.

¹⁰Kyipfa kya ikyo ngyikarishia mbonyi tsoose, kyipfa kya wasambuṟe, kundu nawo waambilyie wukyiṟo wulya wukyeri kyiiṙi kya Kristo Yesu, hamwi na mng'ano o mlungana.

¹¹Nyi mbonyi iwaṟi iiṙikyio, cha kyipfa kokooya lopfa hamwi na oe, lochiwaṙa moo hamwi na oe taa.

¹²Kokooya losimiria, lochichilyia hamwi na oe. Kokooya lomkana oe, na oe nelukana soe.

¹³Kokooya soe lulaiṙikyie, oe nekyeṙio ho kui iiṙikyio; cha kyipfa echiiṙima ikukana amonyi-pfo.

¹⁴Uwakumbuṟe mbonyi-tso, ochiwaikyimbia mbele ya Ruwa, walawaṙe iwingana kui maṙeṙo, galawoṙe kyiira, indi gekyenyamaṟa walya wekyegaicho.

¹⁵Pfuṟukana iloṟa kye numwiṙikyie nyi Ruwa, mṟundi alawoṙe kyitewe kyerigo nyi sonu, na ilosha necha Ndumi Ngyicha.

¹⁶Kaa kuleshi na mbonyi tsilawoṙe kyiira, tsilakyeri tsa mwiṙikyie o india Ruwa; kyipfa wechiengyeṟika ngoseṟa kyiiṙi kya iwuta shiwicho

¹⁷na mbonyi tsawo tseṙunganana cha pee lyilekyechia. Kyiiṙi kya iwo kuwoṙe Himenayo na Fileto,

¹⁸waleguṟa wuloi wulya wo Ndumi Ngyicha wechigamba kye mfiri o furumia ulemcha, mṟasa iilacha iiṙikyia lya wandu wafoi.

¹⁹Kyaindi urende lo Ruwa luluikare, na mbonyi tsa Ndumi Ngyicha tsingyiṟeie wuye yalo: “Mndumii naichi wai wakye na lyingyi-se, orio mndu ekyesenda Rina lya Mndumii naṙe wunyamaṟi.”

²⁰Kyasia numbenyi kuwoṙe shindo sha sahapu na heleri tikyi-pfo, indi na sha shiṙi, na sha teri. Shingyi shiwoṙe kyiṟumi, shingyi shiwoṙe-pfo.

²¹Kyasia kokooya mndu nakuilyisha kui ikushowa na isho, nechiwa kyindo kyewona kyiṟumi, kyikyisanje, kyiwoṙie Mndumii kyiira, kyikyiachikyie kui orio iṟunda lyicha.

²²Kyaindi ṙicha lango tsa wundakyenyi, undeosha wusumganyi, na iiṙikyia, na ikunda, na ufoṟo, hamwi na walya wekyeindia Mndumii kui mrima mmbaṙami.

²³Kyaindi ulege maṙeṙo gesoruo-soruo ga kyitondo, galawoṙe wuṟango, ochimanya kye gekyeende maluyano.

²⁴Lyingyi-se kyiwaṟi mṟundi o Mndumii iwa mndu moluyana-pfo; indi iwa muoloru ko wandu woose, eiṙima ilosha, aichi ikarishia;

²⁵echiikyimbia kui wuoloru iwo waiwingana na oe, kundu kokooya kyaiṙimika, Ruwa nawaenengye iṙumbuya wunyamaṟi na imanya wuloi wo Ndumi Ngyicha.

²⁶Waiṙime-se iwiyiṟio makusaṟo mecha, na ikuashuo mṙegonyi o Mokyiriinzi, walya waleṙego nyi Mokyiriinzi, mṟasa iwuta shilya akundi.