Read Kivunjo New Testament 1999 Tito 1 Bible Online

Tito 1 - Kivunjo New Testament 1999 bible

Tito 1

¹Inyi Paulo, mṟundi o Ruwa, na msu o Yesu Kristo; kyipfa kya ionguo iiṙikyia lya wasambuṟe wa Ruwa, na wuṟango wo wuloi wulya wokyeende iowuo na ikunda Ruwa.

²Kyiiṙi kya ikusuria lya moo o mlungana, ulya Ruwa alekyeṙeṙa wongo aleluteṟia wookyia wuyana wulagumbo.

³Kashukuo Ṙeṙo lyakye kui kyiyeri kyakye kyiiṙi kya ulogo lulya ngyileṙambiko inyi kui iwawaso lya Mkyiṟa oṙu Ruwa.

⁴Ngaṟeia paruo-i ko Tito, mono-ko nakamwi iiṙikyienyi lyaṙu. Isaṟia lyikae kopfo na ufoṟo shiwukyie ko Ruwa Awu na Kristo Yesu Mkyiṟa oṙu.

⁵Kyipfa kya ikyo ngyilekuṙa Kyirete, kundu uachikyie shindo shilya shiwewaṟi iachikyio, na iwika wameeku wa siṟi kyiiṙi kya orio mṟi chandu ngyilekuwia,

⁶kokooya mndu alalegambo kye nawoṙe wuwicho woose, na oe nyi mii o mka umwi, nawoṙe wana waiṙikyie, walekyegambo kye nyi waṟui ang'u walawoṙe wuindi.

⁷Kyipfa kyiwaṟi askofu nawe nyi mndu alekyegambo kye nawoṙe wuwicho woose. Alawe mndu mokushela, cha kyipfa nyi mndu ekyeringa iṟunda lya Ruwa. Alawe mndu ekyepfula ichihiṟa mrima okye. Alawe mwanguhu ikapo nyi nyashi, alawe mnanzi ang'u mndu moluyana. Alawe mndu awoṙe wulanga wo sonu wo masaa ga sonu.

⁸Indi nawe mndu ekyeambilyia wandu, akundi iwuta kyilya kyikyicha, awoṙe meena, awoṙe wusumganyi, mweele, aichi ichilyia lango tsa mrima okye.

⁹Iiṙikyia chandu amloshe naiṙime ikarisha wandu kui malosho gawoṙe moo, na iwinga walya wekyekana ulogo-lo.

¹⁰Cha kyipfa kuwoṙe wandu wafoi walawoṙe wuindi, wawoṙe mbonyi tsa wutondo, walembi, na ngoseṟa Wayuda waiṙikyie Yesu.

¹¹Wawaṟi iimo walaṙeṙe. Iwo wekyefoga-foga woose wa kanyi ko wandu, wechilosha shindo shilawawaṟi kyipfa kya ipfula masaa ga sonu.

¹²Mndu awukyie kowo, moonguo shisuku owo wawenyi, nagambie, “Wakyirete nyi wandu wekyeṙeṙa wongo mfiri yoose, mando mawicho ga saka, wawang'anyie ndewu na wawaṙoko.”

¹³Wuṟingyishi-wo nyi loi. Kyipfa kya ikyo uwaṙeṙie kui wulang'a, kundu wawe wandu wapfulukyie iiṙikyienyi;

¹⁴walaaṙanyie malosho ga Kyiyuda, maa mawawaso ga wandu wekyekaa kuleshi na shilya shikyeri sha loi.

¹⁵Shindo shoose shishicha ko walya wawecha; kyaindi kuwoṙe kyindo kyikyicha ko walya wafanyi kyimṟumoe-pfo, walya walawoṙe iiṙikyia; indi ngyuuṟango tsawo tsifanyi kyimṟumoe, na makusaṟo gawo taa.

¹⁶Waigamba kye waichi Ruwa, indi mawuto gawo gaimkana. Wawoṙe shindo shekyesuiṟa, wawoṙe wuindi-pfo, maa wawoṙe kyiira kyindonyi kyoose-pfo.