Read Kivunjo New Testament 1999 Filemon 1 Bible Online

Filemon 1 - Kivunjo New Testament 1999 bible

Filemon 1

¹Inyi Paulo, mpfungo o Kristo Yesu, na Timoteo akyeri mono-wama oṙu, ngaṟeia paruo-i ko Filemon, mkunde oṙu, mṟundi hamwi na soe,

²na ko Afia, mono-wama oṙu, na ko Arikyipo, asikari oṙiaṙu, na ko siṟi ikyeri numbenyi yapfo.

³Isaṟia lyikae konyu, na ufoṟo, shiwukyie ko Ruwa, Awu oṙu, na ko Mndumii Yesu Kristo.

⁴Ngyiana Ruwa oko mfiri yoose, ngyechikukumbuo shiterewonyi shako;

⁵ngyechiicho mbonyi tsa ikunda lyapfo na iiṙikyia uwoṙe ko Mndumii Yesu na ko wandu wa Ruwa woose;

⁶kundu kui iwaṙana lya iiṙikyia lyaṙu na iyoe luṟunde iṟunda lyakye; kyiiṙi kya orio imanya kyindo kyicha kyikyeri koṙu, kyiiṙi kya Kristo.

⁷Kyipfa ngyiwewoṙe sia ing'anyi na iwiyiṟio moo kyipfa kya ikunda lyapfo, cha kyipfa mrima ya wandu wa Ruwa ilewiyiṟio moo nyi iyoe, mono-wama oṙu.

⁸Koikyo, maa chandu ngyiwoṙe wukari kyiiṙi kya Kristo ikuwia kyikuwaṟi;

⁹kyaindi kyipfa kya ikunda ngyikuterewa, cha kyipfa nyi chandu ngyikyeri, Paulo ngyikyeri meeku, na wulalu mpfungo o Kristo Yesu taa.

¹⁰Ngyikuterewa kyipfa kya mono-ko kyiiṙi kya Kristo, Onesimo;

¹¹akyeri kye kacha awewoṙe kyiira kopfo-pfo, indi wulalu nawoṙe kyiira mnu kopfo, iyoe na inyi taa.

¹²Ngyilemṙuma kopfo, oe amonyi, kyipfa ngyimkundi mnu.

¹³Inyi ngyiwekundi nakae koko, naiṙime ingyiṟundia handu hapfo kyiiṙi kya iwiko kyipfungonyi kyipfa kya ionguo Ndumi Ngyicha.

¹⁴Kyaindi ngyilekunda iwuta kyindo kyoose ulakyikundi iyoe-pfo, kundu kye wuindi wopfo wulacheewa wuitiko, indi kui iiṙikyia kumonyi.

¹⁵Kyipfa, kofia nyikyo kyitewe alewiko kuleshi na iyoe ko mfiri ngyaangu, kundu ukae na oe-se mlungana.

¹⁶Wookyia wulalu, chi cha mtumo-pfo, indi ngoseṟa ya mtumo, mono-wama mkunde; koko inyi mnu, na kopfo iyoe ngoseṟa mnu, mmbiunyi na kyiiṙi kya Mndumii.

¹⁷Kyasia kokooya ongyiwona inyi ngyiwoṙe iwaṙana na iyoe, ambilyia ichu kyimwi na inyi ngyimonyi.

¹⁸Na kokooya nakuwutia kyindo kyiwicho, ang'u nuimrika kyindo, ungyiwese inyi.

¹⁹Inyi Paulo ngaṟeia kui kuwoko koko ngyimonyi, inyi ngyechitaa. Ngyikuwia kye nuwoṙe sile yako kyipfa ngyilekukyiṟa kyimrima-pfo.

²⁰Yee, mono-wama oko, ngyiwone kyiira kopfo kyiiṙi kya Mndumii; uwiyiṟie moo mrima oko kyiiṙi kya Kristo.

²¹Kyipfa kya ilyi ngyiiṙikyie wuindi wopfo ny'kyo kyimaṙuma ngakuṟeia, ngyiichi kye nochiwuta ngoseṟa ya isho ngyigamba.

²²Na hamwi na isho ungyiṟeyeṟie handu hekaa; kyipfa ngyikusurie kye kui shiterewo shanyu mochitaramo ingyiwona.

²³Epafura, ampfungye hamwi na inyi kyiiṙi kya Kristo Yesu, nakuiṟikyiṟa;

²⁴na Mariko, Aristariko, Dema, na Luka, wekyeṟunda hamwi na inyi.

²⁵Isaṟia lya Mndumii Yesu Kristo lyikae hamwi na mrima yanyu.