Read Kivunjo New Testament 1999 Waebrania 1 Bible Online

Waebrania 1 - Kivunjo New Testament 1999 bible

Waebrania 1

¹Kyiyeri kya kacha Ruwa naleṙeṙa na waku waṙu kafong'ui na kundu kufong'ui, iiṙia ko weonguo shisuku;

²mafurumionyi ga mfiri-i naleṙeṙa na soe kyiiṙi kya Mono-kye alemmbika nawe mokyioṟa o shindo shoose, lyingyi-se kui oe nalegumba wuyana.

³Oe nekyeloṟa chandu Ruwa awoṙe mng'ano, fana ya mrima okye, echiṙuo shindo shoose kui iwawaso lya wuiṙimi wokye, amwende ihooṟio lya ngyuunyamaṟi tsa wandu, naleṙamia ura lo kulyoe lo ulya ang'anyi kuta woose.

⁴Ruwa nalesambuṟa Mono-kye nawe ang'anyi kuta malaika, chandu rina lyilya Ruwa alemwenenga lying'anyi kuta lya malaika.

⁵Cha kyipfa nalewia malaika uha kyiyeri kyoose, “Iyoe nyi mono-ko, inyi inu ngakufee?” Na lyingyi-se, “Inyi ngyechiwa awu kokye, na oe nechiwa mana koko?”

⁶Na lyingyi-se, kyiyeri aende Mono-kye o kuwooka na wuyanenyi nagamba, “Malaika woose wa Ruwa wampfirie ndi.”

⁷Na ko mbonyi tsa malaika nagamba, “Ekyegaluo malaika wakye iwa cha shiwiṟi, na waṟundi wakye iwa cha moṙo mlang'a.”

⁸Kyaindi ko mbonyi tsa Mana nagamba, “Kyitima kyapfo kya wuchilyi, hoi Ruwa, nyi kya mlungana na mlungana. Na upoi lo Wumangyi wopfo nyi upoi lo wusumganyi.

⁹Nukundi wusumganyi nosuo shituṟu koikyo Ruwa, Ruwa opfo, nakushumbuo, kakuenenga kyiṟumi kying'anyi kuta woṙoo.”

¹⁰Na lyingyi-se, “Iyoe, Mndumii, ipfo mawookyionyi nulewika ngyuurende tsa uruka, na ruwewu nyi iṟunda lya mawoko gapfo.

¹¹Isho shechinyamaṟika, Indi iyoe nochikaa mlungana. Na shoose shechikuo cha nguwo.

¹²Na cha nguwo nochishilema-lema, natso tsechiilachika. Kyaindi iyoe nyi ulya ulya na mfiri yapfo yechisia-pfo.”

¹³Ngyesa kuwoṙe malaika alemmbia kyiyeri kyoose “Uṙamie kuwoko koko ko kulyoe, mṟasa kyiyeri ngyechiwika washituwa wapfo wuchilyinyi wopfo?”

¹⁴Ngyesa malaika nyi wakyi? Chi walya wekyeṙumo iṟundia walya wekyeoṟa wukyiṟo-pfoe?