Read Kivunjo New Testament 1999 Waebrania 10 Bible Online

Waebrania 10 - Kivunjo New Testament 1999 bible

Waebrania 10

¹Kyasia uwawaso, kyipfa nyi kyirinje kya mecha gechicha, maa chi fana ya mecha-go-pfo, kui shiṙaso shilya shilya waleenengyia orio maka, shechiiṙima kyiyeri kyoose igaluo walya wekyecha iindia na iana Ruwa iwa wandu waafutsie-pfo.

²Kokooya nyi wuṙo, ngyesa shiṙaso shechiṙa ienengyio; cha kyipfa waiindia na iana Ruwa wakamuilyisho lyimwi tupu, walawechikuwona-se wo wawenyi kye wawoṙe wunyamaṟi?

³Kyaindi kyiiṙi kya shiṙaso-sho kuwoṙe ikumbuo lya wunyamaṟi orio maka.

⁴Kyipfa kyeiṙimika samu ya mapung'a na mburu iwuta wunyamaṟi-pfo.

⁵Koikyo ilyi echicha na wuyanenyi, nagamba, “Shiṙaso na shienengo ulekunda-pfo; kyaindi mmbiu nulengyiṟeyeṟia;

⁶Shiṙaso shewuta alyitaṟenyi na shilya sheenengyia ngyuunyamaṟi ulechihiṟo nasho-pfo;

⁷Nyi lyo-ndu ngyilegamba, ambuya, ngacha (ngyimṟeie kyitapunyi kya mawawaso) ngyiwute shilya ukundi, Ruwa.”

⁸Iho mawookyionyi nalegamba, “Okyechihiṟo maa ikunda shiṙaso na shienengo shishienengyie alyitaṟenyi na shilya shewuta ngyuunyamaṟi-pfo” (shishienengyie chandu uwawaso lugambie).

⁹Nyi lyo-ndu alegamba, “Ambuya, ngacha ngyiwute shilya ukundi.” Naienengyia kyiṙaso kya kuwooka, kundu nawikye ho kyiṙaso kya kawi.

¹⁰Kyiiṙi kya shilya Ruwa akundi lowona iilyisho, kui iwuto mmbiu o Yesu Kristo lyimwi tupu.

¹¹Na orio mkohanyi nekyegoṟoka orio mfiri echiṟunda cha mkohanyi, na ienengyia shiṙaso shilya shilya kafong'ui; shiṙaso shilechiiṙima maa ale iwuta wunyamaṟi.

¹²Kyaindi ichu, kyiyeri amwenengyie kyipfa kya wunyamaṟi kyiṙaso kyimwi kyechikaa mṟasa mlungana, naleṙamia kuwoko ko kulyoe ko Ruwa;

¹³wookyia iho echiweṙelyia mṟasa nawingye washituwa wakye.

¹⁴Kyipfa kui kyiṙaso kyakye kyimwi nalewagaluo wandu waafutsie mlungana walya waiilyisho maṙeko gawo.

¹⁵Na Mumuyo Mweele na oe nailuṟingyishia; cha kyipfa numa ya igamba,

¹⁶“Ichu nyi mma ngyechiwika nawo numa ya mfiri iya, Ruwa nagamba, ‘Ngyechiwika mawawaso gako mrimenyi kowo, na igaṟeia makusaṟonyi gawo.’ ” Nyi lyo-ndu ekyegamba,

¹⁷“Ngyuunyamaṟi tsawo na mawuto gawo mawicho ngyechigakumbuo-se maa ale-pfo.”

¹⁸Kyasia ihooṟio lya isho lyikacha, kuwoṙe kyiṙaso-se kyipfa kya iwuta ngyuunyamaṟi-pfo.

¹⁹Kyasia, wana wa wama, kyipfa luwoṙe wukari wo iiṙa na handu Haele kui samu ya Yesu,

²⁰njia iya aleluwookyia ikyeri ngyihya, na ii na moo, njia iiṙie halya nguwonyi yeshingyia ikyeri nyi mmbiu okye;

²¹na iwaṙa Mkohanyi ang'anyi kuta woose achilyie hekalu lya Ruwa lya ruwewu;

²²lutikyirie Ruwa luwoṙe mrima mmbaṙami; kui imwiṙikyia nakamwi, luwailyishe mrima luṙe makusaṟo mawicho; luwasanje mmbiu kui mṟinga mcha.

²³Lukuwaṙe tapu na ikusuria lyaṙu, lyilailachikye; kyipfa ulya aleteṟia nekyeafutsia shilya ateṟia.

²⁴Luambuye chandu lochitaramana na iwutiana shindo shicha na itutumana kui ikunda na iṟunda lyicha.

²⁵Maa lulaṙe isanzia handu hamwi, chandu kyikyeri kyiṙo kya wandu wengyi; indi luikyimbiane; na iengyeṟa iwuta kuṙo, kui chandu muwonyi kye mfiri ulya o Yesu ianduya ukyeri kufui.

²⁶Kyipfa kokooya lowuta wunyamaṟi lukomuambilyia wuṟango wo wuloi wulya, kuwoṙe-se kyimaṙuma kya kyiṙaso kyipfa kya ngyuunyamaṟi-pfo.

²⁷Indi kuwoṙe iweṙelyia ianduyo lyioweshie, na wulang'a wo moṙo ukuṟeyeṟie irumatsa walya wakyeri washituwa wa Ruwa.

²⁸Mndu alemina mawawaso ga Mose nekyewoogo kulawoṙe iwonio wukyiwa, kyiyeri waṟingyishi wawi ang'u waṟaaṟu wagamba kye nammbicho.

²⁹Muwonyi kuṙa? Kyiwemmbaṟi ngapo ing'anyi ngoseṟa mndu ulya alemina Mono-Ruwa, na igamba kye samu iya ya mma ilemuilyisha chi kyindo-pfo, na ilahia Mumuyo o isaṟia-pfoe?

³⁰Kyipfa lumwichi ulya alegamba, “Itaa kyiṟaache nyi iṟunda lyako, inyi ngyechitaa.” Na lyingyi-se, “Mndumii nechianduya wandu wakye.”

³¹Nyi kyindo kyioweshie iolokyio nyi ngapo ya Ruwa ai na moo.

³²Kyaindi kumbuonyi mfiri ya mawookyionyi, iya kyiyeri mulewona ngyeela, mulekarishia iwingana lying'anyi lya fowa.

³³Shiyeri shingyi kulawoṙe iiṟikyiṟo mulekulunga na walya waweilahio na iwutio shindo shiwicho.

³⁴Kyipfa mulewonia wukyiwa walya wawewapfungye. Lyingyi-se mukoiṙikyia kui sia isoko masaa ganyu, muichi kye mrimenyi konyu kuwoṙe masaa gai mecha ngoseṟa, galekyesia.

³⁵Kyasia mulaṙe wukari maa wuṟango wonyu, cha kyipfa wuwoṙe wori wung'anyi.

³⁶Kyipfa muwaṟi iwaṙa wusimiri, kundu kye mukommbuta shilya Ruwa akundi muambilyie kyaasa kyilya.

³⁷“Cha kyipfa hatsugae kyiyeri kyifuhi mnu ulya aicha nechicha, maa echikyelyio-pfo.

³⁸Kyaindi msumganyi oko nechiwaṙa moo kui iiṙikyia. Na oe kaiya-iya mrima oko ochiwaṙa sia kyipfa kyakye-pfo.”

³⁹Kyaindi soe lukyeri kyiiṙi kya walya waiiya-iya na iṙeka-pfo, indi lukyeri kyiiṙi kya walya wawoṙe iiṙikyia na ikyiṟa mrima yaṙu.