Read Kivunjo New Testament 1999 Waebrania 4 Bible Online

Waebrania 4 - Kivunjo New Testament 1999 bible

Waebrania 4

¹Kyasia, kokooya kuwoṙe kyaasa kya iiṙa na handu ha Ruwa heonyonyia, luowuoe, maa umwi oṙu alechewono kye nawuṟa kyaasa-kyo.

²Kyipfa nyi loi, maa soe taa luleongoyo mbonyi ngyicha chawo. Kyaindi mbonyi-tso wandu waleicho tsilewatarama kyindo-pfo kyipfa tsileṙuana na iiṙikyia lya mrimenyi ko walya waleicho-pfo.

³Kyipfa soe luiṙikyie luiṙa na handu ho heonyonyia; chandu alegamba, “Chandu ngyilelya nyamu kui nyashi, wechiiṙa na handu hako heonyonyia-pfo.” Maa chandu maṟunda galya galemarisika wookyia kyiyeri ngyuurende tsa wuyana tsilewiko.

⁴Cha kyipfa handu halyiwe nagambie kuṙi ko mbonyi tsa mfiri o mfungaaṙe, “Mfiri o mfungaaṙe naleonyonya, kaṙa maṟunda gakye goose.”

⁵Na iho naho taa, “Wechiiṙa na handu hako heonyonyia-pfo.”

⁶Kyasia kyipfa ṙeṙo-lyi lyatsugaa ho kye kuwoṙe wandu wechiiṙa na handu-ho heonyonyia, na walya waleongoyo mbonyi-tso kyiyeri kya kacha, walelemo iiṙa na handu ho heonyonyia kyipfa kya wunyamaṟi wowo,

⁷nawika-se mfiri mlyiwe, echigamba, kyiiṙi kya Dawidi numa ya kyiyeri kyileshi kuṙi, “Inu; chandu kyikyigambe wookyia kacha, ‘Inu kokooya moicho ṟui lyakye, Maa mulaumiṟe mrima yanyu.’ ”

⁸Kyipfa kokooya Yosua alewaenenga sia, awechiionguo-se mfiri ungyi kyiyeri kya numa-pfo.

⁹Kyasia, hatsugae sia ya mfiri o onyonya ko wandu wa Ruwa.

¹⁰Kyipfa oe aleiṙa na halya-ndu heonyonyia naonyonya amonyi iṟundenyi lyakye, chandu Ruwa aleonyonya iṟundenyi lyakye.

¹¹Kyasia, lupfuṟukane iiṙa na kyiiṙi kya sia-yo, kundu kye mndu oose alacheoloka cha wandu-wo walaleindia Ruwa.

¹²Kyipfa Ṙeṙo lya Ruwa lyiwoṙe moo, lyingyi-se lyiwoṙe pfinya; lyingyi-se lyilyiohi kuta ushu loose lo mmbega kuwi; lyingyi-se lyekyekoṟa mṟasa lyikaiṙima iletsana mrima na ngoo, na shiwungo na mafuṙa gakyeri ipfo shiwungonyi; lyingyi-se lyilyianguhu imanya makusaṟo na kyilya mrima ukundi.

¹³Maa kuwoṙe kyindo kyikyeri na moo kyilakyishukuoe mbele ya Ṙeṙo-lyo-pfo, kyaindi shindo shoose shikyeri kyiṟanguoe na shishishukuoe mesonyi gakye ulya awoṙe shindo shaṙu.

¹⁴Kyasia, kokooya luwoṙe Mkohanyi ang'anyi kuta woose aleiṙa na ruwewu, Yesu Mono-Ruwa, luoshe mnu shilya lokyeṟingyishia.

¹⁵Cha kyipfa luwoṙe mkohanyi alechiiṙima iṙuana na soe shindonyi shaṙu sha wufofo-pfo; kyaindi oe naleyesho kyimwi na soe shindonyi shoose, indi alewuta kya wunyamaṟi-pfo.

¹⁶Kyasia, lutikyire kyitimenyi kya isaṟia kulawoṙe wuowu, kundu luenengo isaṟia, na iwona isaṟia lyelutarama kyiyeri lulawoṙe shindo shilushikyie.