Read Kivunjo New Testament 1999 Waebrania 5 Bible Online

Waebrania 5 - Kivunjo New Testament 1999 bible

Waebrania 5

¹Kyipfa orio Mkohanyi ang'anyi kuta woose amsambuṟe iwuka ko wandu nammbikye kyipfa kya wandu mbonyinyi tsa Ruwa, kundu nawute shienengo kyipfa kya ngyuunyamaṟi.

²Echiiṙima iṙuana kui wuhoo na walya walaichi na walya waiṙeka, cha kyipfa oe amonyi nawoṙe mbaṟe ya wufofo;

³na kyipfa kya ikyo kyimmbaṟi, cha kyipfa kya wandu, wuṙo kyipfa kya mrima okye amonyi, iwuta shienengo kyipfa kya ngyuunyamaṟi.

⁴Na kuwoṙe mndu eiṙima ikuenenga amonyi kyiṟumi-kyi-pfo, sile ulya ekyelago nyi Ruwa, cha Aron.

⁵Na wuṙo Kristo na oe alekuṙosa mrimenyi kokye na iṙuo kyiṟumi kya iwa Mkohanyi ang'anyi kuta woose-pfo, kyaindi nyi Ruwa alemmbia, “Iyoe nyi Mono-ko inu ngawa Awu opfo.”

⁶Chandu agambie handu hengyi, “Nochiwa mkohanyi mlungana cha Melyikyisedekyi.”

⁷Yesu, mfiri-yo awei na moo, naleeṟeṟia Ruwa, echifiiṟa na itonyitsa mcheṟeṟe, Ruwa echiiṙima imkyiṟa na immbuta upfunyi, kaaṙanyio chandu awekyeri mndu aowuye na ikunda Ruwa;

⁸na, maa chandu akyeri Mana, nalekulosha iindia kui wukyiwa alelya.

⁹Na oe amṟingyishio kye naafutsio, kawa ulya ekyekyiṟa wandu mlungana ko wandu woose wekyemwindia.

¹⁰Numa ya iho namsende na Ruwa iwa Mkohanyi ang'anyi kuta woose cha Melyikyisedekyi.

¹¹Ulya luwoṙe shindo shifoi sheonguo kyipfa kyakye; na nyi kyindo kyuumu ishionguo cha kyipfa mowa wandu waṙoko iaṙanyia.

¹²Cha kyipfa, kokooya kyimmbaṟi iwa walosha, (kyipfa kyiyeri kying'anyi kyamwiṙa), muwaṟi ilosho na mndu malosho ga kuwooka ga mbonyi tsa Ruwa. Na nyoe kyipfa mukyeri cha wana wanangu muwewaṟi maruwa maa chi kyelya kyikari-pfo.

¹³Cha kyipfa orio mndu ekyenyo maruwa aichi mnu mbonyi tsa wusumganyi-pfo, cha kyipfa nyi mana mnangu.

¹⁴Kyaindi kyelya kyikari nyi ko wandu wapfulukyie kyiiṙikyia, walya wekyeiṙima imanya kyicha na kyiwicho.