Read Kivunjo New Testament 1999 Waebrania 9 Bible Online

Waebrania 9 - Kivunjo New Testament 1999 bible

Waebrania 9

¹Kyasia, maa mma o kuwooka uwewoṙe mawawaso ga mbonyi tsa iindia na iana Ruwa, na handu ha kyiwuyana heterewa Ruwa.

²Kyipfa tengo lyileachikyio, lyilya lya ipfo kyanja, handu hawewoṙe handu heyekyia taa, na mesa, na mkate ngyiele; nyiho halelago “Haele.”

³Na numa ya mkoṟoṟi o kawi o ishingyia handu, tengo lyilya lyekyelago “Haele ha haele,”

⁴lyiwoṙe alyitaṟe ya sahapu, na sanduku ya mma ingyishikyie nyi sahapu ngyuura tsoose, sanduku iwewoṙe ikopo lya sahapu lyiwoṙe manna iya, na upoi lulya lo Aron lulekolooṟia maṟa, na shibau shilya sha mma;

⁵na wuye yasho makyerubi ga kyiṟumi, gechiwikyia kyirinje halya-ndu Ruwa ekyehooṟia ngyuunyamaṟi. Kyasia luwoṙe ṙaawa wulalu lyeonguo mbonyi tsa shindo-shi kyimwi kyimwi-pfo.

⁶Kyasia, shindo-shi shikamuachikyio kuṙo, makohanyi wekyeiṙa na ipfo tengonyi lya ipfo kyanja mfiri yoose, wechiwuta shindo sha iindia na iana Ruwa.

⁷Kyaindi kyiiṙi kya tengo-lyo lya kawi Mkohanyi ang'anyi kuta woose nekyeiṙa napfo amonyi, lyimwi orio maka; aṙuṙe samu iwukyie kyindonyi kya kyiṙaso kyipfa kya wunyamaṟi wokye amonyi na wo wandu wengyi kyiyeri walalemanya kye kyilya waweiwuta nyi wunyamaṟi.

⁸Mumuyo Mweele kaloṟa kyindo-kyi, kye njia ya iiṙa na halya-ndu haele ilekoyammanyika-pfo, kyiyeri-kyo tengo lya ipfo kyanja lyilalekolyammbuka ho.

⁹Lyilya lyikyeri mfano o kyiyeri-kyi kyikyeri pfo wulalu; kyiyeri-kyo shienengo sheṙasa shiwuto, shilechiiṙima kui chandu mndu akuichuoe mrimenyi kokye iafutsia mndu aiindia na iterewa Ruwa.

¹⁰Kyipfa nyi mawawaso ga mbaṟe ya mmbiu tupu, shelya na shindo shenyo na mbaṟe tsesamba kyimṟumoe, shilegambo kye shiṟundo mṟasa kyiyeri-kyo Ruwa echiilacha shindo shoose shiwe shihya.

¹¹Kyaindi Kristo kamcha, akyeri Mkohanyi ang'anyi kuta woose o mbonyi tsicha tsechicha, ko tengo lyilya lying'anyi ngoseṟa na lyiafutsie, lyilalyiachikyie nyi wandu, kyimwi na igamba lyilakyeri lya wuyana-wu,

¹²maa chi kui samu ya mburu na magache-pfo, indi kui samu yakye ulya aleiṙa lyimwi tupu na handu Haele, na iluwuta wusingyenyi mlungana.

¹³Cha kyipfa kokooya samu ya mburu na mapung'a na ifui lya igache lya umbe walya wafanyi kyimṟumoe walepusio yekyeilyisha mṟasa mmbiu ukowuka ukoe;

¹⁴kyasia chi ngoseṟa samu ya Kristo, ulya kye kui Mumuyo o mlungana alereka moo ko Ruwa iwa kyienengo kyilawoṙe tewe, kyechisanja shilya mukusaṟie mrimenyi konyu na mṟumoe ilawoṙe kyiira, muiṙime iindia na iterewa Ruwa ai na moo?

¹⁵Na kyipfa kya ikyo nyi ulya ekyeende Mma Mhya, Yesu ulya alepfa, na ipfa lyakye lyilewuta wandu maṙekonyi ga mma ulya o kuwooka, wandu walelago waambilyie kyaasa kya kyioṟa kya mlungana.

¹⁶Kyipfa handu mma o kyioṟa ukyeri, hawaṟi hakae na upfu lo ulya alewika mma-cho.

¹⁷Cha kyipfa mma o kyioṟa uwoṙe pfinya handu halewaṙa ipfa lya mndu; cha kyipfa lyiwoṙe pfinya maa ale kokooya ulya aleuwika ai na moo-pfo.

¹⁸Koikyo maa mma ulya o kuwooka ulewooko kulawoṙe samu-pfo.

¹⁹Kyipfa kyiyeri orio iwawaso lyilegambo nyi Mose ko wandu-wo woose, chandu mawawaso gawekundi, nalewuta samu ya magache na mburu, hamwi na mṟinga na kyiṙi kya hisopo kyikyipfungyie mamberi ga kyimaande ga moondo, kanyanyatsia kyitapu kyilya kya mawawaso, na wandu woose,

²⁰echigamba, “Iyi nyi samu yamlunga nyoe na mma ulya Ruwa alemmbia mumwindie.”

²¹Na tengo lyilya nalyo na shindo shoose sha iindia na iterewa Ruwa aleshinyanyatsia samu wuṙo.

²²Na Uwawasonyi shindo shoose shilesanjo kui samu, na kulawoṙe ipusuo samu kuwoṙe iwuto wunyamaṟi-pfo.

²³Kyasia, kyiwewaṟi nakala tsa shindo shikyeri ruwewu tsisanjo chandu kyamugambo, kyaindi shindo sha ruwewu imonyi shisanjo kui shiṙaso shishicha kuta isho.

²⁴Cha kyipfa Kristo aleiṙa na handu haele haleachikyio nyi wandu-pfo, nyicho mfano o handu haele ha loi; indi naleiṙa na ruwewu ya loi nawono wulalu mbele ya Ruwa kyipfa kyaṙu.

²⁵Maa chi kye nakuwute kafoi, chandu Mkohanyi ang'anyi kuta woose ekyeiṙa na handu haele orio maka kui samu ilakyeri yakye-pfo.

²⁶Kokooya nyi wuṙo, kyiwemmbaṟi ilyiso wukyiwa kafoi wookyia wuyana wulagumbo. Kyaindi wulalu, lyimwi tupu, mafurumionyi ga shiyeri, nawoneka lya kuwooka na lya mafurumionyi, ihooṟia ngyuunyamaṟi kui kyiṙaso kya mrima okye.

²⁷Na chandu wandu wekyeṟeyeṟio ipfa lyimwi tupu, na numa ya ipfa ianduyo;

²⁸na wuṙo Kristo na oe, ammbuto iwa kyiṙaso lyimwi tupu na iṙuo ngyuunyamaṟi tsa wandu wafoi; nechicha-se lya kawi, kulawoṙe wunyamaṟi, ko walya waimmbeṙelyia nachewakyiṟa.