Read Kivunjo New Testament 1999 Yakobo 1 Bible Online

Yakobo 1 - Kivunjo New Testament 1999 bible

Yakobo 1

¹Yakobo, mtumo o Ruwa, na o Mndumii Yesu Kristo, ko wandu woose wa Ruwa wanyanyaṟikyie ipfo na ipfo; ngamuiṟikyiṟa.

²Wana wa wama wako, talenyi kye nyi sia tikyi, mukooloka shiyeshonyi sha orio mbaṟe;

³mochimanya kye iyesho lya iiṙikyia lyanyu lyekyeende wusimiri.

⁴Wusimiri wuwaṙe iṟunda lyiafukyie, muiṙime iwa wandu muafutsie kui maṟunda na wuyendelyi wucha.

⁵Kyaindi mndu o konyu kauṟa wuṟango, naterewe ko Ruwa, ekyeenenga woose kui ilekyia, maa ekyeṟoṟoma-pfo; na oe nechienengo.

⁶Indi naterewe kui iiṙikyia, kulawoṙe ikapa kawi maa ale, kyipfa mokapa kawi nyi kyimwi na mṟinga oiṙa ipalyipalyinyi ukoṙoo nyi mkuma, na iwiyitso kunu na kunu.

⁷Kyipfa mndu cha icho alakusaṟe kye neambilyia kyindo ko Mndumii.

⁸Mndu o makusaṟo galagoṟokyi nekyekapa kawi njienyi tsakye tsoose.

⁹Kyaindi mono-wama alawoṙe kyiṟumi kya maṟunda nachihiyo cha kyipfa naenengo kyiṟumi;

¹⁰na mnjama nachihiyo kyipfa nasotso; cha kyipfa nechiṙeka cha kyiwaṟo kya maṟa.

¹¹Kyipfa mnengyeṟi okyeṙo na mrikye, ukoumiṟa iṟa, na kyiwaṟo kya iṟa-lyo kyekyeoloka, na wucha wolyo woose wokyenyamaṟika. Nyi wuṙo mnjama echirumatso njienyi tsakye tsoose.

¹²Agusu mndu ekyekarishia shiyesho; cha kyipfa kamwiṙikyio neambilyia wori wo moo, wulya Mndumii aṟeyeṟie walya wamkundi.

¹³Kyiyeri mndu ayesho, alagambe, “Ngyiyesho nyi Mndumii;” kyipfa Ruwa eiṙima iyesho nyi wunyamaṟi, maa oe amonyi ekyeyesha mndu-pfo.

¹⁴Kyaindi orio umwi nekyeyesho nyi lango tsakye amonyi na kunu tsechimkuruo na imlemba.

¹⁵Numa ya iho lango ngyiwicho tsekyeende wunyamaṟi, na wunyamaṟi wukomng'ana wokyeende upfu.

¹⁶Wana wa wama wako wakunde, mulalembo.

¹⁷Orio ienengyia lyikyeri lyicha, na orio kyindo kyekyewuto kyiafutsie, kyekyewuka wuye, kyekyesoka ko Awu agumbie mnengyeṟi, mori na nyenyeri. Kokye kuwoṙe iilachika lyekyeende meema-pfo.

¹⁸Kui ikunda lyakye amonyi nalelufee kui Ṙeṙo lya loi, luwe cha wana wawagumbe nyi oe.

¹⁹Isho muichi, wana wa wama wako wakunde. Kyasia orio mndu nawe mwanguhu iaṙanyia indi chi mwanguhu iṙeṙa maa ikapo nyi nyashi-pfo; maa moṙeṙa-pfo.

²⁰Cha kyipfa nyashi ya mndu yekyeṟunda wusumganyi wo Ruwa-pfo.

²¹Koikyo wikyienyi kuleshi ukoe loose na wuwicho wuingyikyie, na iambilyia kui wuhoo Ṙeṙo lyilya lyilewooyo konyu, lyechiiṙima ikyiṟa mrima yanyu.

²²Kyaindi wenyi wandu mokyewuta kyilya mokyeicho, maa chi wandu weaṙanyia tikyi kunu mochikulemba muwenyi-pfo.

²³Cha kyipfa mndu kawa moaṙanyia tikyi maa ekyewuta kyilya aiicho-pfo, mndu-cho nyi kyimwi na mndu aikuambuya kyiyewonyi.

²⁴Kyipfa nekyekuambuya, numa kayenda, cha ilyi kawaṙima chandu akyeri.

²⁵Kyaindi mndu moambuya mawawaso gaafutsie galakyeri ga wutumo, na ikaa kyiiṙi kyago, alawe mndu ekyeaṙanyia na iwaṙima indi mowuta kyilya aiicho, icho nechiwa agusu kyiiṙi kya iwuta lyakye.

²⁶Mndu kakusaṟa kye nawoṙe mwiṙikyie, indi ekyeringa ulumi lokye-pfo, kunu echilemba mrima okye, mwiṙikyie o mndu-cho chi kyindo-pfo.

²⁷Mwiṙikyie mcha ulawoṙe kyindo kyifanyi mbele ya Mndumii Ruwa nyi ichu: indesaia ngoṙa na wakusu wukyiwenyi wowo, na ikushowa na wuyana kulawoṙe wunyamaṟi.