Read Kivunjo New Testament 1999 Yakobo 2 Bible Online

Yakobo 2 - Kivunjo New Testament 1999 bible

Yakobo 2

¹Wana wa wama wako, iiṙikyia lya Mndumii oṙu Yesu Kristo, Mndumii o mng'ano, maa mulawe nalyo kui ikundia wandu.

²Kyipfa mndu aṟee peti ya sahapu na nguwo ngyicha kaiṙa na sinagoginyi lyanyu na numa ya iho mkyiwa aṟee masaṟa kaiṙa;

³na nyoe mukokundia ulya aṟee nguwo ngyicha, na immbia, “Ṙamia iha handu hecha;” na iwia mkyiwa ulya, “Goṟoka halya,” ang'u “Ṙamia maṙendenyi gako,”

⁴ngyesa mowuta uwicho mrimenyi konyu mukowa weanduya wawoṙe makusaṟo mawicho-pfoe?

⁵Wana wa wama wako wakunde, aṙanyienyi, “Ngyesa Ruwa alesambuṟa wakyiwa wa wuyana wawe wanjama wa iiṙikyia na weoṟa Wumangyi aleteṟia wamkundi-pfoe?”

⁶Indi nyoe mulemina mkyiwa. Ngyesa wanjama chiwo waimulyisa wukyiwa na imuṙuo kyianduyonyi-pfoe?

⁷Chiwo wailahia rina lyilya lyicha muleenengo-pfoe?

⁸Kyaindi mukoafutsia iwawaso lyilya lya Wumangyi chandu kyikyiṟeie, “Kunda momṟasa opfo cha iyoe kumonyi,” muiwuta necha.

⁹Indi mukokundia wandu, muiwuta wunyamaṟi na ianduyo nyi uwawaso kye mui wanyamaṟi.

¹⁰Kyipfa mndu oose echiosha mawawaso goose, indi kakapa ṙende kyindonyi kyimwi, naṙeko kyiiṙi kya goose.

¹¹Cha kyipfa icho alegamba, “Ulaṟuguye na Ulaṟuguyo,” nalewegamba taa, “Ulawaage.” Kyasia kokooya ulaṟuguya ang'u iṟuguyo, kyaindi kowaaga, nofunja uwawaso.

¹²Ṙeṙenyi na iwuta cha wandu wechianduyo kui uwawaso lulawoṙe wutumo.

¹³Kyipfa Ruwa echiwoṙo nyi fowa mrimenyi kyiyeri aianduya mndu alekyewoṙo nyi fowa mrimenyi-pfo. Kyipfa iwoṙo nyi fowa mrimenyi lying'anyi kuta ianduya.

¹⁴Wana wa wama wako, kuwoṙe kyiira kyiha, mndu kagamba nawoṙe iiṙikyia, kyaindi awoṙe mawuto-pfo? Ngyesa iiṙikyia lyilya lyechiiṙima imkyiṟa?

¹⁵Kokooya mono-wama o kyisoṟo ang'u o kyika namkuuye na awoṙe kyindo kyelyio-pfo,

¹⁶na mndu o konyu kawawia, “Yendenyi na ufoṟo, mundeoṙa moṙo na iiguṙa,” kyaindi alawaenengye sha mmbiu, kyawaṙa kyiira kyiha?

¹⁷Nyi wuṙo na iiṙikyia, lyilandewaṙe mawuto, lyapfa kyiiṙi kyalyo.

¹⁸Kyaindi mndu negamba, “Iyoe nuwoṙe iiṙikyia, na inyi ngyiwoṙe mawuto. Ngyiloṟa iiṙikyia lyapfo kulawoṙe mawuto, na inyi ngyekuloṟa iiṙikyia lyako kui mawuto gako.”

¹⁹Iyoe nuiṙikyie kye Ruwa nyi umwi; nowuta necha. Masatana nago gaiṙikyie na iṙeṙema.

²⁰Kyaindi nukundi imanya, iyoe mndu ulai kyindo, kye iiṙikyia lyilawoṙe mawuto lyiwoṙe ndunda-pfo?

²¹Ngyesa awu oṙu Abrahamu aletalyio kye nawoṙe wusumganyi kui mawuto, lyilya alewuta Isakyi mono-kye mesenyi ya Mndumii-pfoe?

²²Ommbona kye iiṙikyia lyilewuta maṟunda hamwi na mawuto gakye, na kye iiṙikyia lyilya lyileafutsio kui njia ya mawuto galya.

²³Shiṟeio shilya shikaafutsio; shiṟeio shilegamba, “Abrahamu naleiṙikyia Ruwa, kyikatalo kokye kye nyi wusumganyi;” na oe nalelago mbuya ya Ruwa.

²⁴Muwonyi kye mndu nekyetalo kye nawoṙe wusumganyi kui mawuto gakye; chi kui iiṙikyia lyimonyi-pfo.

²⁵Nyi wuṙo na Rahabu ulya awei iṟai. Ngyesa aletalo kye nawoṙe wusumganyi kui mawuto, lyilya aleambilyia wandu walya waweowelyia mbonyi tsa Waisiraelyi, kawafumiṟia nja kui njia ingyi-pfoe?

²⁶Kyipfa chandu kyikyeri kye mmbiu ulawoṙe mrima upfiie, nyi wuṙo na iiṙikyia lyilawoṙe mawuto lyipfiie.