Read Kivunjo New Testament 1999 Yakobo 3 Bible Online

Yakobo 3 - Kivunjo New Testament 1999 bible

Yakobo 3

¹Wana wa wama wako, mulawe walosha wafoi, muichi kye soe walosha lochiambilyia ianduyo lying'anyi kuta.

²Kyipfa lokyekapa ṙende soe loose shindonyi shifoi. Mndu alekyekapa ṙende kyiiṙi kya iṙeṙa, icho nyi mndu aafutsie, echiiṙima itirimisha mmbiu okye oose cha kui kyindo kyilya kyekyetirimisha shindo.

³Ambuyenyi, lokyewika kyindo kyetirimisha shindo maṙumbunyi ga farasi, kundu tsiluindie, na kuṙo lukoweṟuo mmbiu yatso yoose.

⁴Lyingyi-se ambuyenyi ngalawa; maa chandu tsing'anyi cha kyikyi, na iṙoo nyi shiwiṟi shing'anyi, tsekyeweṟutso nyi kyindo kyitung'tu kyeweṟutsa shindo, tsikayenda kundu koose ulya ekyetsiṙuo akunda tsiyende.

⁵Na wuṙo taa ulumi nyi kyiwungo kyitutu, nalo lokyekushela ikushela lying'anyi. Ambuyenyi chandu moṙo mtung'tu okyekoṟa nguṙu ing'anyi mnu.

⁶Na ulumi nyi moṙo; wuyana wulya wo wunyamaṟi, ulumi lulya, lulewiko shiwungonyi shaṙu, nalo nyilo lokyefanyiṟa mmbiu oose. Lokyeatsa moṙo ulya uwukyie Ngyehenenyi na ilurumatsa piu.

⁷Kyipfa orio mbaṟe ya indo lya saka, na ya shileye, na ya shindo shekyekukuruo na ndewu, na ya shindo shikyeri ipalyipalyinyi, shekyeiṙima ichilyio, nasho shilemchilyio nyi wandu.

⁸Indi ulumi kuwoṙe mndu eiṙima iluchilyia-pfo; nyi wuwicho wulekyetsia, wuichuo wuṟoi wokyeende upfu.

⁹Kui ulumi lokyeṟumisha Ruwa Awu oṙu, na kui ulumi lokyesesa wandu walegumbo kui fana ya Ruwa.

¹⁰Kyiiṙi kya ṙumbu lyilya lyilya kokyewuka mboṟa na seso. Wana wa wama wako, kyiwaṟi mbonyi-tso tsiwe kuṙo-pfo.

¹¹Ngyesa, shoka ṟukonyi lyimwi yechiiṙima iwuta mṟinga okyeloṙa na mṟinga okyesuka?

¹²Wana wa wama wako, ngyesa, mfumu ochiiṙima iwika seituni, ang'u msabibu iwika nduo? Nyi wuṙo shoka yechiiṙima iwuta mṟinga okyesuka na mṟinga okyeloṙa-pfo.

¹³Nyi wui awoṙe wuṟango na imanya konyu? Naloṟe maṟunda gakye kui wuyendelyi wokye mcha, wuhoonyi wo wuṟango.

¹⁴Kyaindi mukowaṙa wunyeng'i wo nyashi na maluyano mrimenyi konyu, maa mulakuiring'ishe, maa mulaṙeṙe wongo kui iwingana na loi.

¹⁵Wuṟango-wo chi wulya wuwukyie wuye-pfo, indi nyi wo wuyana, wo mbaṟe ya kyimndu na Satana.

¹⁶Kyipfa handu hawoṙe wunyeng'i na maluyano, nyi ho-ndu hawoṙe kyituṟu, na orio kyindo kyiwicho.

¹⁷Kyaindi wuṟango wuwukyie wuye, kya kuwooka wuwucha, ngoseṟa nyi wo ufoṟo, nyi wo wuhoo, wukuṟeyeṟie iaṙanyia maṙeṙo ga wandu, wuichuo isaṟia na ndunda ngyicha, wuwoṙe wuṟiingyi maa wuwoṙe wukulembecheṟi-pfo.

¹⁸Na ndunda tsa wusumganyi tsekyeṙongo ufoṟonyi na walya wekyewuta sha ufoṟo.