Read Kivunjo New Testament 1999 Yakobo 5 Bible Online

Yakobo 5 - Kivunjo New Testament 1999 bible

Yakobo 5

¹Kyasia-ng'u, nyoe wanjama! Fiiṟenyi, mugambe kyelewui kyipfa kya matuuro gaicha na konyu.

²Masaa ganyu gamaporu, na nguwo tsanyu tsingyilye nyi mashinu.

³Sahapu tsanyu na shindo shanyu sha woguru wung'anyi shikyindie ukoe, na ukoe-lo lomuṟingyishia, na mmbiu yanyu yechinyamaṟika cha ilyi nyi ikoṟo nyi moṙo. Mulekooma kyiseyesoe mfirinyi ya mafurumionyi.

⁴Kumbuonyi wori wo waṟundi walesambuo shilyimu shanyu mulalewataa. Aṙanyienyi chandu waifiiṟa. Kyifiiṟo kyawo kyileaṙanyio nyi Ruwa.

⁵Ikaa lyanyu wuyanenyi nyi lya ichihiyo na ikushela. Mulekuwegia cha mfiri ulya Ruwa echianduya wandu woose.

⁶Muleanduya mndu msumganyi na immbaaga, maa chandu alaiwingana na nyoe.

⁷Koikyo, wana wa wama, karishienyi, mṟasa icha lya Mndumii. Ambuyenyi chandu mṙemi ekyeweṙelyia shilyimu sha woguru wung'anyi. Nekyekarishia kyipfa kyasho mṟasa mvuo tsa kuwooka na tsefurumia tsikape.

⁸Na nyoe karishienyi muṟingyishie mrima yanyu, cha kyipfa icha lya Mndumii lyatikyira kufuhi.

⁹Wana wa wama, maa mulanunuwiane, mulacheanduyo. Ambuyenyi moanduya nagoṟokyi mbele ya moongo.

¹⁰Wana wa wama wako, weonguo shisuku walya waleende ndumo ya Ruwa nyi mfano mcha o wandu walekarishia matuuro.

¹¹Ambuyenyi, lokyegamba wagusu walya walesimiria. Muleicho mbonyi tsa wusimiri wo Yobu, mulewona mafurumionyi ga Mndumii kye Mndumii nyi nawoṙe isaṟia na iwoṙo nyi fowa mrimenyi.

¹²Kyaindi ngoseṟa ya shoose, wana wa wama wako, mulalye nyamu, kui Ruwewu maa kui uruka; maa kui mbaṟe ingyi yoose; indi yee yanyu iwe yee, na ote yanyu iwe ote, kundu Ruwa alamuanduye.

¹³Kokooya mndu o konyu naolokyio nyi fowa naterewe ko Ruwa. Kokooya nawoṙe mrima mkyesi naimbe shiimbo sheana.

¹⁴Kokooya mndu o konyu naluoe nalage wameeku wa siṟi; wamterewie na imshia mafuṙa kui rina lya Mndumii.

¹⁵Kokooya wameeku-wo waiṙikyia kye Ruwa neaṙanyia kyiterewo kyawo, ulya aluoe nechikyiṟo. Ruwa nemmbiyiṟia pfinya maa kokooya anyamaṟie nechihooṟio.

¹⁶Tochianenyi ngyuunyamaṟi tsanyu nyoe wenyi ko wenyi, na iterewiana, muiṙime ikyiṟo. Iterewa lya mndu msumganyi lyiwoṙe kyiira mnu.

¹⁷Elyiya nawei mndu o mbaṟe imwi cha soe, kapfuṟukana iterewa ko loi kundu mvuo ilakape, na mvuo ilekapa ko maka iṟaṟu na mori iṟandaaṟu-pfo.

¹⁸Katerewa-se na mvuo tsikakapa na shilyimu shikaṙo.

¹⁹Wana wa wama wako, kokooya mndu o konyu aṙetsa njia ya wukyiṟo, na mndu ungyi kamtarama iwuya;

²⁰manyenyi kye ulya motarama mṙeko iwuka njienyi ya wuṙetsi, nechikyiṟa mrima okye na upfu, na ishikyia wuingyi wo ngyuunyamaṟi.