Read Kivunjo New Testament 1999 1 Petiro 1 Bible Online

1 Petiro 1 - Kivunjo New Testament 1999 bible

1 Petiro 1

¹Inyi Petiro, ngyikyeri msu o Yesu Kristo, ngaṟeia paruo-i ko wasambuṟe wanyanyaṟikyie ipfo na ipfo, wekyekaa cha wayenu ngyuurukyenyi tsa Ponto, na Galatia, na Kapadokyia, na Asia, na Bitinia.

²Chandu Ruwa Awu alesonguo imumanya kui imuilyisha nyi Mumuyo, mṟasa mukoiṙima iindia na inyanyatsio samu ya Yesu Kristo. Isaṟia na ufoṟo shiengyeṟo konyu.

³Ruwa naṟumisho, Awu o Mndumii oṙu Yesu Kristo, ulya kui isaṟia lyakye alelufee lya kawi kundu luwone ikusuria lyiwoṙe moo kui iṟuka lya Yesu Kristo iwuka ko wapfu.

⁴Luwone na kyioṟa kyilekyenyamaṟika, kyilawoṙe ukoe, kyilekyesia, kyilekoomo ruwewu kyipfa kyanyu.

⁵Na nyoe mokyeringo nyi pfinya tsa Ruwa kui njia ya iiṙikyia mṟasa muiṙime iwona wukyiṟo wuwuṟeyeṟe wuloṟo kyiyeri kya mafurumionyi.

⁶Muichihiyo mnu kyiyeri-kyo, maa chandu wulalu ko kyiyeri kyifuhi, kokooya kyiwaṟi iwa kuṙo, mowoṙo nyi fowa mrimenyi kui shiyesho sha mbaṟe tsifoi.

⁷Kundu kye iyesho kui iiṙikyia lyanyu, lyilya lyiwoṙe woguru wung'anyi kuta sahapu yekyenyamaṟika, maa chandu sahapu-yo yekyeyeṟo kui moṙo; muambilyie iṟumisho na kyiṟumi mfiri ulya Yesu Kristo echiloṟo.

⁸Na oe mumkundi, maa chandu mulammbonyi; ulya maa chandu mulammbonyi wulalu, mumwiṙikyie; na ichihiyo mnu, kui sia ilekyewono, iwoṙe kyiṟumi.

⁹Kyiiṙi kya ichihiyo lyanyu wulalu Ruwa naimukyiṟa, ikyiṟo lyikyeri ndunda tsa iiṙikyia lyanyu lyikyeri kui Yesu Kristo.

¹⁰Ko mbonyi tsa wukyiṟo-wo weonguo shisuku walepfula-pfula na isoruo-soruo, walya waleonguo shisuku ko mbonyi tsa isaṟia lyechimukooya nyoe.

¹¹Wakapfula nyi kyiyeri kyiha, na nyi kyiyeri kya mbaṟe iha kyileikyimbo nyi Mumuyo o Kristo awekyeri mrimenyi kowo, ulya alesonguo iṟingyishia matuuro Kristo echienengo, na kyiṟumi kyekokyikyeri pfo numa ya isho.

¹²Wakaloṟo kye chi kyipfa kyawo wawenyi-pfo, indi kyipfa kyanyu waleṟunda ipfo shindonyi, shilya wulalu shalosho konyu na walya walemuongoya nyoe Ndumi Ngyicha kui Mumuyo Mweele aleṙumo iwuka ruwewu. Shindo-sho malaika walangyie ishimanya.

¹³Koikyo kuṟeyeṟenyi na iwaṙa meena; mochiweṙelyia nakamwi isaṟia lyilya mochiwona kyiyeri Yesu Kristo echiloṟo.

¹⁴Cha wana wa wuindi mulakufananyishe na lango tsanyu tsa mawookyionyi, tsa wutondo wonyu;

¹⁵indi chandu ulya alemulaga nyoe ai mweele, nyoe na nyoe wenyi waele mkaṟonyi onyu oose.

¹⁶Cha kyipfa kyikyiṟeie, “Mochiwa waele kyipfa inyi ngyimweele.”

¹⁷Na kokooya mokyemlaga Awu, ulya ekyeanduya wandu kulawoṙe ikundia, iṙuana na iṟunda lyakye, chumienyi kui wuowu kyiyeri kya ikaa lyanyu iha cha wayenu.

¹⁸Na nyoe manyenyi kye mulekyiṟo chi kui shindo shekyenyamaṟika cha heleri ang'u sahapu-pfo; muiṙime iwuka mkaṟonyi onyu ulawoṙe kyiira muleuambilyia ko waku wanyu;

¹⁹indi kui samu ya woguru, cha ya kyiondo kyilawoṙe tewe, ya Kristo.

²⁰Na oe nalemanyika loi wookyia mawookyionyi, wuyana wulandegumbo; kyaindi naleloṟo mafurumionyi ga shiyeri kyipfa kyanyu.

²¹Ulya kui oe mowa wandu waiṙikyie Ruwa, alemṟutsa iwuka ko wapfu kamuenenga kyiṟumi; mṟasa iiṙikyia lyanyu na ikusuria lyanyu lyiwe ko Ruwa.

²²Mukomuilyisha mrima yanyu kui iindia wuloi, mṟasa iwaṙa ikundana cha wana wa wama kulawoṙe wukulembecheṟi, kyasia pfuṟukanenyi ikundana kui mrima.

²³Cha kyipfa muwafee lya kawi; chi kui mbeu yekyenyamaṟika-pfo indi kui iya ilekyenyamaṟika; kui Ṙeṙo lya Ruwa lyiwoṙe moo, lyekyekaa ho mṟasa mlungana.

²⁴Kyipfa, “Mmbiu oose nyi cha maṟa, na mng'ano ocho nyi cha kyiwaṟo. Maṟa gekyeuma na shiwaṟo shekyeoloka.

²⁵Indi Ṙeṙo lya Mndumii lyechikaa mlungana.” Na Ṙeṙo-lyo nyi mbonyi tsilya ngyicha tsileongoyo konyu.