Read Kivunjo New Testament 1999 1 Petiro 2 Bible Online

1 Petiro 2 - Kivunjo New Testament 1999 bible

1 Petiro 2

¹Kyasia, ṙenyi wuwicho na ngyeṟo, na wukulembecheṟi na wunyeng'i na iiria wengyi shindo sha wongo.

²Chandu wana waionga wakundi maruwa ga wamawo, muwaṟi orio mfiri ilanga kyelya kya mrima kyilakyisanze-sanze na kyindo kyingyi. Mukolya kyelya-kyo kya mrima moching'ana na ikyiṟo,

³kokooya mosonja kye Mndumii nyi monyi isaṟia.

⁴Yendenyi kokye oe, ai igoe lyiwoṙe moo, lyilelego nyi wandu, indi ko Ruwa nyi lyilyisambuṟe, lyiwaṟi iindio.

⁵Na nyoe, cha magoe Ruwa agaenengyie moo, muwawikye muwe numba ya Mumuyo, wukohanyi wuele, muwute shiṙaso sha mrima, shichihiṟie Ruwa, kui njia ya Yesu Kristo.

⁶Cha kyipfa kyikyiṟeie shiṟeionyi shiele, “Ngawika kulya Sion igoe lying'anyi lya ndumbenyi, lyilyisambuṟe, lyiwaṟi iindio, na orio mndu amwiṙikyie echirigo nyi sonu-pfo.”

⁷Kyasia, iindio-lyi nyi konyu nyoe muiṙikyie. Indi ko walya walaiṙikyie kyikyiṟeie, “Igoe lyilelego nyi wewika numba, lyawa igoe lying'anyi lya ndumbenyi.”

⁸Lyingyi-se, “Ilyi nyi igoe lyeenenga wandu ikapa ṙende, na iṟaṟa lyeolotsa wandu.” Cha kyipfa kui Ṙeṙo lyilya wekyekapa ṙende, walalyiiṙikyie nawo walewiko ho kundu waambilyie shindo sha mbaṟe-yo iyo.

⁹Indi nyoe nyi kyishari kyisambuṟe, wukohanyi wo kyimangyi, isanga lyiele, wandu wa wuchilyi wo Ruwa, muiṙime ionguo mbonyi tsa mawuto gakye ga maṟiyisho. Ulya alemulaga muwukye meemenyi muiṙe na ngyeelenyi yakye ya maṟiyisho.

¹⁰Nyoe ipfo mawookyionyi muwei chi isanga-pfo, kyaindi wulalu nyi isanga lya Ruwa; mukyeri wandu mulawoṙe isaṟia, indi wulalu mowona isaṟia.

¹¹Wakunde, ngyimuterewa cha wandu waiiṙa na wakyaro, lekanenyi na lango tsa mmbiu tsekyewingana na mrima.

¹²Muwaṙe mkaṟo mcha kyiyeri mukyeri na walya walaiṙikyie Yesu, kundu kokooya wekyemuiria kye mowuta shindo shiwicho, wakaambuya mawuto ganyu mecha, waṟumishe Ruwa kyiyeri-kyo Yesu echicha lya kawi.

¹³Oshenyi orio kyindo walya wawoṙe wuchilyi wagamba, kyipfa kya Mndumii. Kokooya nyi mangyi, muindienyi cha mndu awoṙe wuchilyi wung'anyi.

¹⁴Kokooya nyi wasongoru waindienyi cha wandu Ruwa awaṙumie itaa kyiṟaache walya wekyewuta shindo shiwicho na iṟumisha walya wekyewuta shindo shicha.

¹⁵Cha kyipfa nyisho shindo Ruwa akundi. Kye kui iwuta shindo shicha mushingye maṙumbu ya wutondo ga matondo.

¹⁶Cha wandu walawachilyie nyi kyindo, kyaindi walekyekusuria ikyo kui iṟika wuwicho, indi cha waṟundi wa Ruwa.

¹⁷Indienyi wandu woose. Kundenyi woose waiṙikyie Yesu. Terewenyi na iowuo Ruwa. Enengyenyi mangyi kyiṟumi.

¹⁸Lanyoe waṟundi, indienyi wandumii wanyu kui wuowu wung'anyi. Chi walya wawecha na wahoo tupu-pfo, indi maa walya walang'a.

¹⁹Kyipfa iwu nyiwo wucha wukundio, mndu echikarishia fowa kui ikumbuo Ruwa, kyiyeri alyiso wukyiwa kui ionio.

²⁰Cha kyipfa nyi kyiṟumi kyiha ikarishia? Nyi ilyi monyamaṟa na ikapo ngofi? Kyaindi ikarishia, kyiyeri mowuta shindo shicha na ilyiso wukyiwa, iwu nyiwo wucha wuwukunde mbele ya Ruwa.

²¹Cha kyipfa nyiwo mulelagio; kyipfa Kristo na oe nalelyiso wukyiwa kyipfa kyanyu, kamuṙeea mfano, muoshe ndifo tsakye.

²²Oe alenyamaṟa, maa iwaṙa ngyeṟo-pfo.

²³Oe kyiyeri alelahio, alelahia-pfo; kyiyeri alelyiso wukyiwa, aletaa kyiṟaache-pfo; indi nalekuṙambika ko ulya ekyeanduya kui wusumganyi.

²⁴Oe amonyi naleṙuo ngyuunyamaṟi tsaṙu mmbiunyi kokye msalabenyi o wunyamaṟi na ikaa chandu Ruwa akundi; kyipfa Kristo alekapio msalabenyi nyoe mowaṙa moo o kyimrima.

²⁵Cha kyipfa muweiṙeka cha moondo; kyaindi wulalu mowiyilyia Mlyisi na Moambuya mrima yanyu.