Read Kivunjo New Testament 1999 1 Petiro 4 Bible Online

1 Petiro 4 - Kivunjo New Testament 1999 bible

1 Petiro 4

¹Kyasia kyipfa mmbiu o Kristo ulelyiso wukyiwa, na nyoe ṟaenyi shisha sha makusaṟo galya galya awewoṙe; cha kyipfa oe mmbiu okye ulelyiso wukyiwa nalekana na wunyamaṟi.

²Wookyia wulalu mulaengyeṟe iosha lango tsa mmbiu, indi oshenyi shilya Ruwa akundi, kyiyeri kyanyu kyitsugai kyekaa iha wuyanenyi.

³Kyipfa kyiyeri kya moo yaṙu kyileiṙa kyishikyie iwuta shilya wandu walaiṙikyie Ruwa wekyewuta; iwuta shindo shiwoṙe ukoe, na lango, na wunanzi, na shelya sha ilya na ielewetsa, na shindo shekyenanza, hamwi na iindia na iterewa mafano chandu kyilakyeri kya sungusinyi.

⁴Shindo shekyeenenga wandu-wo walaiṙikyie iṟiyio chandu mulekyepfuṟukana iwuta shindo shilya shilya sha ukoe wung'anyi, wechimulahia.

⁵Nawo wechionguo shindo walewuta ko ulya akuṟeyeṟie ianduya wai na moo na wapfu.

⁶Kyipfa kya ikyo maa walya wapfiie waleongoyo Ndumi Ngyicha, kundu kye waanduyo kyimmbiu chandu wandu wekyeanduyo; indi wawaṙe moo kyimrima chandu Ruwa ai na moo.

⁷Kyaindi mafurumionyi ga shindo shoose gakyeri kufuhi. Kyasia ṟanguonyi, mulae kyiṙombo mochiterewa.

⁸Ngoseṟa ya isho shoose pfuṟukanenyi nakamwi ikundana; kyipfa ikunda lyekyeshikyia ngyuunyamaṟi tsifoi.

⁹Muambilyiane nyoe wenyi ko wenyi kulawoṙe inuṟia;

¹⁰orio umwi iṙuana na chandu aleambilyia kyisumbo, ṟundianenyi nakyo; cha waringyi wecha wa isaṟia lya mbaṟe tsifoi lya Ruwa.

¹¹Mndu kaṙeṙa, naṙeṙe chandu Ruwa akundi; mndu kaṟunda, naṟunde kui pfinya amwenengye nyi Ruwa; kundu Ruwa naṟumisho shindonyi shoose kui Yesu Kristo. Kyiṟumi na pfinya shikae na oe mlungana na mlungana. Amen.

¹²Wakunde, mulaṟiyio kya wukyiwa wulya wukyeri konyu, wokyemukoṟa nyoe cha moṙo imuyesha, cha ilyi nyi kyindo kyiyenu kyacha na konyu.

¹³Kyaindi chandu mulelya wukyiwa wo Kristo, chihiyonyi; kundu na kyiyeri kyiṟumi kyakye kyechiloṟo muchihiyo kui ikapa ngulyilyi na ngoru.

¹⁴Mukowio kye mowuta shiwicho kyipfa kya rina lya Kristo nyi nanga; cha kyipfa Mumuyo o kyiṟumi na o Ruwa nakyeri na nyoe.

¹⁵Mndu o konyu alalyiso wukyiwa cha mmbaagi, ang'u mbafu, ang'u mndu ekyewuta shindo shiwicho, ang'u cha mndu ekyekuwinisha na shindo sha wandu wengyi.

¹⁶Kyaindi kyipfa nyi Mkristiano alarigo nyi sonu, indi naṟumishe Ruwa kui rina-lyo.

¹⁷Cha kyipfa kyiyeri kyamshika kya ianduyo iwooka wandunyi wa Ruwa; na ianduyo lyikawooka koṙu soe, mafurumionyi ga walya walekyeaṙanyia Ndumi Ngyicha ya Ruwa gechiwa kuṙa?

¹⁸Na kokooya kyechiwa kyuumu ko mndu msumganyi ikyia, ulya alaowuye na iindia Ruwa na mnyamaṟi nechiwono kwi?

¹⁹Kyasia walya wailyiso wukyiwa kui shilya Ruwa akundi waṙambikye mrima yawo ko Ruwa, kyiiṙi kya iwuta shindo shicha, cha ilyi nyi ko ulya agumbie shindo, ekyeafutsia shilya ateṟia.