Read Kivunjo New Testament 1999 2 Petiro 3 Bible Online

2 Petiro 3 - Kivunjo New Testament 1999 bible

2 Petiro 3

¹Wakunde, paruo-i nyi ya kawi ngyimuṟeia nyoe. Ipfo paruonyi tsiwi ngyilepfuṟukana iamtsa makusaṟo mecha mṙoenyi konyu kui imukumbuṟa mbonyi-tsi.

²Ngyikundi muiṙime ikumbuo shindo shilya shileṙeṙo kacha nyi weonguo shisuku waele; na iwawaso lyilya lya Mndumii na Mkyiṟa lyileendo nyi wasu wanyu.

³Mochimanya kuwooka kyindo-kyi kye mfirinyi yefurumia wandu wekyetaluo wechicha na italuo lyawo, wekyeosha lango tsawo wawenyi,

⁴na igamba, “Nyi kwi kyikyeri kyaasa kyilya kya icha lyakye? Cha kyipfa wookyia kyiyeri-kyo waku waṙu walepfa, shindo shoose shikyeri chandu shiwei, wookyia wuyana wulegumbo.”

⁵Kyipfa wekyeshinga meso gawo walawone kyindo-kyi kye kuwewoṙe ngyina wookyia kacha, na uruka taa, lulugumbe iwuka mṟingyenyi, kui Ṙeṙo lya Ruwa.

⁶Ko isho wuyana wulya wo kyiyeri kyilya wulenyamaṟo nyi mṟinga, wukorumara.

⁷Kyaindi ngyina tsa wulalu na uruka shingyikoome kyiseyesoe kui moṙo, kui Ṙeṙo-lyo ilyo, shechiringo mṟasa mfiri o ianduyo, na kui irumara lya wandu walaiṙikyie Ruwa.

⁸Kyaindi, wakunde, mulawaṙime kyindo-kyi, kye ko Mndumii mfiri umwi nyi kyimwi na maka kyiku, na maka kyiku nyi kyimwi na mfiri umwi.

⁹Mndumii ekyekyelyio iafutsia kyaasa kyakye, chandu wandu wengyi wekyekusaṟa kya ikyelyio-pfo, kyaindi nekyesimiria konyu, kyipfa akundi mndu oose naṙekye-pfo, indi woose waiṙime iwona iṙumbuya wunyamaṟi.

¹⁰Kyaindi mfiri o Mndumii ochicha cha mbafu. Mfiri-cho ngyina tsechirumatso kui ndiṟimo tsing'anyi, na orio kyindo kya wuyana kyechikoṟo na irumatso, na wuyana na shoose shikyeri pfo shesenekyia.

¹¹Kyasia, cha kyipfa shindo-shi shoose sherumatso kuṙo, kyamukooya nyoe muwe wandu wa mkaṟo ya mbaṟe iha kyiiṙi kya ichumia lyanyu lya wuele na iowuo na ikunda Ruwa,

¹²mochiweṙelyia mṟasa mfiri ulya o Ruwa uche, mochiuitika, na kyiiṙi kya mfiri-cho ngyina tserumatso tsechiunguo, na shindo sha wuyana shechisenekyia na isalaa?

¹³Kyaindi chandu kyikyeri kyaasa kyakye, luiweṙelyia ruwewu ngyihya na uruka luhya, shikyeri kye wusumganyi wochikaa kyiiṙi kyasho.

¹⁴Koikyo, wakunde, kyipfa muiweṙelyia mbonyi-tso, pfuṟukanenyi kundu muwono ufoṟonyi kye muwoṙe ṙeko maa sonu mbele yakye-pfo.

¹⁵Na nyoe talenyi wusimiri wo Mndumii oṙu kye nyi wukyiṟo, chandu na mono-wama oṙu mkunde Paulo aleṟeia kui wuṟango aleenengo.

¹⁶Na wuṙo paruonyi tsakye taa, echionguo pfo mbonyi-tso. Kyiiṙi kya paruo-tso kuwoṙe mbonyi tsikyeri kye nyi kyuumu itsimanya, na mbonyi-tso wandu walawoṙe wuṟango, walagoṟokyi sungusinyi, wekyetsionguo mbaṟe ingyi, chandu wekyeweonguo mbaṟe ingyi shiṟeio shingyi, kui irumatso lyawo wawenyi.

¹⁷Kyasia, wakunde, mukosonguo imanya isho, kuringyenyi mrima yanyu, mulacheṙoo nyi maṙeko ga wanyamaṟi-wo, mukooloka na iṙa kyilya muiṙikyie.

¹⁸Kyaindi ng'anenyi isaṟienyi, na kyiiṙi kya imanya Mndumii oṙu na Mkyiṟa Yesu Kristo. Mng'ano ui kokye wulalu na mlungana.