Read Kivunjo New Testament 1999 1 Yohane 2 Bible Online

1 Yohane 2 - Kivunjo New Testament 1999 bible

1 Yohane 2

¹Wana wako, ngyimuṟeia ishi kundu mulawute sha wunyamaṟi. Na kokooya mndu awuta kya wunyamaṟi luwoṙe Moluterewia ko Awu, Yesu Kristo awoṙe wusumganyi.

²Na oe nyi oe moluwuta ngyuunyamaṟi tsaṙu; chi ngyuunyamaṟi tsaṙu tupu-pfo indi na tsa wandu wa wuyanenyi koose.

³Na kyipfa kya ikyo luichi kye lomanya Ruwa, kokooya loosha shilya mawawaso gakye gagamba.

⁴Ulya aigamba, “Ngyimwichi,” kyaindi alaoshe shilya mawawaso gakye gagamba, nekyeṙeṙa wongo, maa wuloi wukyeri mrimenyi kokye-pfo.

⁵Kyaindi ulya ekyeosha malosho ga Ṙeṙo lyakye, icho mrimenyi kokye ikunda lya Ruwa lyikyeri pfo loi. Kyipfa kya ikyo luichi kye luwalungye na oe.

⁶Ulya aigamba kye namlungye na Ruwa, kyimmbaṟi iwuta kuṙo chandu Yesu alewuta.

⁷Wakunde, ngyimuṟeia iwawaso lyihya-pfo, kyaindi iwawaso lya kacha muwekyeri nalyo wookyia mawookyionyi. Na iwawaso-lyo lya kacha nyi mbonyi tsilya muleicho.

⁸Lyingyi-se ngamuṟeia iwawaso lyihya; mbonyi tsikyeri loi kokye na konyu; kyipfa meema uiṙa na ngyeela iya ya loi yamlyimika.

⁹Ulya aigamba kye nakyeri ngyeelenyi, na oe nasuuye mono-wama okye, nakyeri meemenyi mṟasa wulalu.

¹⁰Ulya akundi mono-wama okye, nekyekaa ngyeelenyi, maa mrimenyi kokye kuwoṙe kyindo kyetewe-pfo.

¹¹Indi ulya asuuye mono-wama okye nakyeri meemenyi, lyingyi-se naichumia meemenyi, maa aichi kundu aiyenda-pfo, cha kyipfa meema omgaluo kyipfupfuṟe.

¹²Ngyimuṟeia nyoe wana wako, cha kyipfa mohooṟio ngyuunyamaṟi tsanyu kyipfa kya rina lyakye.

¹³Ngyimuṟeia nyoe waawu, cha kyipfa momanya ulya akyeri pfo wookyia mawookyionyi. Ngyimuṟeia nyoe wanakye, cha kyipfa mowinga ulya mmbicho. Ngamuṟeia nyoe wana, cha kyipfa momanya Awu.

¹⁴Ngamuṟeia nyoe waawu, cha kyipfa muichi ulya akyeri pfo wookyia mawookyionyi. Ngamuṟeia nyoe wanakye, cha kyipfa muwoṙe pfinya, na Ṙeṙo lya Ruwa lyikeri mrimenyi konyu, na nyoe mowinga ulya mmbicho.

¹⁵Maa mulakunde wuyana, maa shindo shikyeri wuyanenyi. Mndu kakunda wuyana, ikunda Ruwa kukyeri mrimenyi kokye-pfo.

¹⁶Orio kyindo kyikyeri wuyanenyi, lango tsa mmbiu, na lango tsa meso, na moo okyeenenga wandu ikushela, shekyewuka ko Awu-pfo, indi shekyewuka wuyanenyi.

¹⁷Na wuyana wuisia, hamwi na lango tsa wuyana-wo, indi ulya ekyewuta shilya Ruwa akundi nechikaa ho mṟasa mlungana.

¹⁸Wana wako, nyi kyiyeri kya mafurumionyi; na chandu muleicho kye mowingana na Kristo naicha, maa wulalu wewingana na Kristo wafoi wamuwoneka. Kyipfa kya ikyo luichi kye nyi kyiyeri kya mafurumionyi.

¹⁹Walewuka koṙu, indi wawei wa koṙu-pfo. Kyipfa kokooya wawei wa koṙu, wawekaa hamwi na soe. Kyaindi walecha kundu waloṟo kye chi woose wai wa koṙu-pfo.

²⁰Muwapusie Mumuyo Mweele na nyoe moose muichi.

²¹Ngyilemuṟeia nyoe kyipfa mulaichi kyikyeri loi-pfo, indi cha kyipfa muichi kyilya kyikyeri loi, lyingyi-se kye kuwoṙe kyoose kya wongo kyekyewuka ipfo kyindonyi kyikyeri loi-pfo.

²²Nyi wui ai moṙeṙa wongo sile ulya ekyekana kye Yesu nyi Kristo? Icho nyi oe mowingana na Kristo, ulya ekyekana Awu na Mana.

²³Orio mokana Mana awoṙe Awu-pfo. Moiṙikyia Mana nawoṙe Awu taa.

²⁴Kyasia nyoe, ikyo mulekyiicho wookyia mawookyionyi, kyikae mrimenyi konyu. Kokooya ikyo mulekyiicho wookyia mawookyionyi kyikyeri mrimenyi konyu na nyoe mochikaa ko Mana, na ko Awu.

²⁵Na ikyi nyikyo kyaasa aleluenenga, moo o mlungana.

²⁶Ngamuṟeia ishi ko mbonyi tsa wandu walya wakundi imuṙetsa nyoe.

²⁷Na nyoe, Mumuyo Mweele muleambilyia kokye ukyeri mrimenyi konyu, maa kuwoṙe kyimaṙuma kya mndu imulosha nyoe-pfo; kyaindi chandu Mumuyo okye uimulosha mbonyi tsa shindo shoose, lyingyi-se nyi loi maa chi wongo-pfo, na chandu ulemulosha, kaenyi kokye.

²⁸Na wulalu, wana wako, kaenyi kokye, kundu ilyi echiloṟo, luwaṙe wukari na wuṟango, maa lularigo nyi sonu mbele yakye kyiyeri kya icha lyakye lya kawi.

²⁹Kokooya momanya kye oe nyi msumganyi, manyenyi kye orio mndu ekyewuta shindo sha wusumganyi namfee nyi oe.