Read Kivunjo New Testament 1999 1 Yohane 3 Bible Online

1 Yohane 3 - Kivunjo New Testament 1999 bible

1 Yohane 3

¹Kumbuonyi nyi ikunda lya mbaṟe iha Awu aleluenenga, kye lulago wana wa Ruwa; na nyi wuṙo lukyeri. Kyipfa kya ikyo wandu wa wuyana waluichi-pfo, cha kyipfa walemanya Ruwa-pfo.

²Wakunde, wulalu lukyeri wana wa Ruwa, maa kyilandemanyikye chandu lochiwa-pfo; kyaindi luichi kye kyiyeri Kristo echiloṟo, lochiwa cha oe; cha kyipfa lochimmbona chandu akyeri.

³Na orio mndu awoṙe ikusuria-lyi kui Kristo nekyekuilyisha, chandu oe akyeri mweele.

⁴Orio mndu ekyewuta sha wunyamaṟi, nawuta kyindo kyiwicho; cha kyipfa wunyamaṟi nyi kyindo kyiwicho.

⁵Na nyoe muichi kye Kristo naleloṟo, kundu naluwute ngyuunyamaṟi; na wunyamaṟi wukyeri kokye-pfo.

⁶Orio mndu ekyekaa kokye ekyewuta kyindo kya wunyamaṟi-pfo; orio mndu ekyewuta kyindo kya wunyamaṟi, ammbonyi maa amwichi-pfo.

⁷Wana wako, mndu alamulembe. Mndu ekyewuta sha wusumganyi nawoṙe wusumganyi, chandu Kristo awoṙe wusumganyi.

⁸Mndu ekyewuta sha wunyamaṟi nyi o Satana; cha kyipfa Satana nekyewuta sha wunyamaṟi wookyia mawookyionyi. Kyipfa kya ikyo Mono-Ruwa naleloṟo, kundu nanyamaṟe maṟunda ga Mokyiriinzi.

⁹Orio mndu amfee nyi Ruwa ekyewuta sha wunyamaṟi-pfo, kyipfa kyishari kyakye kyikyeri kokye; maa echiiṙima iwuta sha wunyamaṟi-pfo kyipfa namfee iwuka ko Ruwa.

¹⁰Kyipfa kya ikyo wana wa Ruwa waichio na pata, na wana wa Mokyiriinzi taa. Mndu oose alekyewuta sha wusumganyi awukyie ko Ruwa-pfo, maa ulya alakundi mono-wama okye.

¹¹Kyipfa itsi nyitso mbonyi muletsiicho wookyia mawookyionyi, kye lukundane.

¹²Lulawe cha Kaini awekyeri o Satana, kawaaga mono-wama okye-pfo. Na oe nalemmbaaga kyipfa kya kyikyi? Cha kyipfa mawuto gakye gawemawicho, na galya ga mono-wamae gawei ga wusumganyi.

¹³Wana wa wama wako, mulaṟiyio, wandu wa wuyana wakamusuo.

¹⁴Soe luichi kye lomuiṙa iwuka upfunyi iiṙa na moonyi, cha kyipfa lukundi wana wa wama kyiiṙi kya Kristo. Ulya alakundi, nakyeri upfunyi.

¹⁵Orio mndu mosuo mono-wama okye nyi mmbaagi; na nyoe muichi kye orio mmbaagi awoṙe moo o mlungana mrimenyi kokye-pfo.

¹⁶Kui ikyo lomanya ikunda, cha kyipfa Kristo nalereka moo okye kyipfa kyaṙu. Kyiluwaṟi na soe ireka moo oṙu kyipfa kya wana wa wama-wo.

¹⁷Kyaindi mndu kawaṙa kando ka kunu wuyanenyi, naaho kawona mono-wama okye alawoṙe kyindo, alamtarame, ngyesa ikunda lya Ruwa lyakaa kuṙa mrimenyi ko mndu-cho?

¹⁸Wana wako, lulakunde kui ṙeṙo, maa kui ulumi-pfo, indi kui mawuto na wuloi.

¹⁹Kyipfa kya ikyo lochimanya kye lukyeri wa loi, na soe lochiwiyiṟia mrima yaṙu moo mbele yakye,

²⁰kokooya mrima yaṙu iluanduya; cha kyipfa Ruwa nang'anyi kuta mrima yaṙu na oe naichi shoose.

²¹Wakunde, mrima yaṙu ilandeluanduye, luwoṙe wukari na wuṟango ko Ruwa.

²²Na orio kyindo loterewa lochikyiambilyia kokye, cha kyipfa lokyeosha shilya mawawaso gakye gakundi, na iwuta shichihiṟie mbele yakye.

²³Na ilyi nyilyo iwawaso lyakye, kye luiṙikyie rina lya Mono-kye Yesu Kristo, na ikundana, chandu aleluenenga iwawaso.

²⁴Na oe ekyeosha shilya mawawaso gakye gagamba namlungye na Ruwa, na Ruwa namlungye na oe. Na kyipfa kya Mumuyo ulya Ruwa aleluenenga luichi kye Ruwa namlungye na soe.