Read Kivunjo New Testament 1999 1 Yohane 4 Bible Online

1 Yohane 4 - Kivunjo New Testament 1999 bible

1 Yohane 4

¹Wakunde, mulaiṙikyie orio mndu agamba kye nawoṙe Mumuyo, indi wayeshenyi mumanye kokooya mumuyo-yo waigamba wawoṙe iwukyie ko Ruwa; cha kyipfa weonguo shisuku wa wongo wafoi wammboneka wuyanenyi.

²Kui ikyo muichi Mumuyo o Ruwa, orio mndu aiṙikyie kye Yesu Kristo nalecha ai cha mndu nawoṙe mumuyo uwukyie ko Ruwa.

³Na oṙio mndu alaiṙikyie Yesu awoṙe mumuyo uwukyie ko Ruwa-pfo. Na iyi nyiyo ngoo ya mowingana na Kristo, ngoo iya muleicho kye iicha; na wulalu yammbono wuyanenyi.

⁴Nyoe, wana watutu, muwoṙe mumuyo uwukyie ko Ruwa; na nyoe mowawinga; cha kyipfa ulya akyeri mrimenyi konyu nang'anyi kuta ulya akyeri wuyanenyi.

⁵Iwo nyi wa wuyana; koikyo wekyeṙeṙa shindo sha wuyana na wandu wa wuyana wekyewaaṙanyia.

⁶Soe luwoṙe mumuyo uwukyie ko Ruwa. Ulya aichi Ruwa nekyeluaṙanyia; ulya alawoṙe mumuyo uwukyie ko Ruwa ekyeluaṙanyia-pfo. Kyipfa kya ikyo luichi Mumuyo o loi, na mumuyo o wuṙetsi.

⁷Wakunde lukundane; cha kyipfa ikunda lyiwukyie ko Ruwa, na orio mndu awoṙe ikunda namfee nyi Ruwa; na oe naichi Ruwa.

⁸Oe alawoṙe ikunda, aichi Ruwa-pfo, cha kyipfa Ruwa nyi ikunda.

⁹Kyipfa kya ikyo ikunda lya Ruwa lyilewoneka koṙu, kye Ruwa naleṙuma Mono-kye kyimuumwi wuyanenyi, kundu luwaṙe moo kui oe.

¹⁰Ilyi nyilyo ikunda, chi kye soe lulekunda Ruwa-pfo, indi kye oe nalelukunda soe kaṙuma Mono-kye iwa mndu moluhooṟia ngyuunyamaṟi tsaṙu.

¹¹Wakunde, kokooya Ruwa nalelukunda soe kuṙi, kyiluwaṟi na soe ikundana.

¹²Kuwoṙe mndu alemmbona Ruwa kyiyeri kyoose-pfo. Lukokundana, Ruwa nekyekaa mrimenyi koṙu, na ikunda lyakye lying'anyi mnu mrimenyi koṙu.

¹³Kyipfa kya ikyo luichi kye lukyeri kokye, na oe nakyeri koṙu, cha kyipfa naluenengyie Mumuyo okye.

¹⁴Na soe lowona na iṟingyishia kye Awu naleṙuma Mana iwa Mkyiṟa o wuyana.

¹⁵Orio mndu aiṙikyie kye Yesu nyi Mono-Ruwa, Ruwa nekyekaa kokye, na oe nekyekaa ko Ruwa.

¹⁶Na soe lomanya ikunda Ruwa awoṙe koṙu soe, na ilyiiṙikyia. Ruwa nyi ikunda, na ulya ekyekaa ikundenyi, nekyekaa ko Ruwa, na Ruwa nekyekaa kokye.

¹⁷Kyipfa kya ikyo ikunda lying'anyi lyikyeri koṙu, kundu luwaṙe wukari na wuṟango mfiri ulya o ianduyo; cha kyipfa, chandu oe akyeri, nyi wuṙo lukyeri na soe kunu wuyanenyi.

¹⁸Ikundenyi kuwoṙe wuowu-pfo; kyaindi ikunda lya loi lyekyewiyitsa wuowu nja, cha kyipfa wuowu wuwoṙe ngapo; na awoṙe wuowu awoṙe ikunda lying'anyi-pfo.

¹⁹Soe lukundi cha kyipfa oe nalelukunda soe kuwooka.

²⁰Mndu kagamba, “Ngyikundi Ruwa,” na oe nasuuye mono-wama okye, nai moṙeṙa wongo; cha kyipfa alakundi mono-wama okye ulya ammbonyi, eiṙima ikunda Ruwa ulya alandemmbone-pfo.

²¹Na iwawaso-lyi luleenengo nyi Kristo, kye ulya akundi Ruwa, nakunde na mono-wama okye.