Read Kivunjo New Testament 1999 3 Yohane 1 Bible Online

3 Yohane 1 - Kivunjo New Testament 1999 bible

3 Yohane 1

¹Inyi meeku ngyikuṟeia paruo-i iyoe Gayo mkunde, ngyikukundi mnu.

²Mkunde, ngyiterewa uwone kyiira shindonyi shoose na iwaṙa wukyesi wo mmbiu, chandu uwoṙe wukyesi wo mrima.

³Kyipfa ngyilechihiyo mnu kyiyeri wana wa wama waiṙikyie Ruwa waleṟingyishia chandu okyeafutsia shilya oteṟia na chandu okyewuta shindo sha wuloi.

⁴Ngyiwoṙe sia ing'anyi kuta iicho kye walya wakyeri cha wana wako waiwuta shindo sha wuloi-pfo.

⁵Mkunde, kyindo-kyo uwutia wana wa wama-wo waiṙikyie Ruwa na wayenu taa nyi kyindo kyilawoṙe ngyeṟo;

⁶wandu waleṟingyishia ikunda lyapfo mbele ya siṟi. Nochiwuta necha kokooya owatarama kyaronyi chandu kyiwaṟi ko Ruwa.

⁷Cha kyipfa, kyipfa kya Rina-lyo, walefuma, walaambilyie kyindo ko walya walaiṙikyie Yesu.

⁸Kyasia kyiluwaṟi soe iambilyia wandu cha iwo, kundu luwe waṟundi hamwi na wuloi.

⁹Ngyileṟeia siṟi paruo, kyaindi Diotirefe, akundi iwa o kuwooka kyiiṙi kyawo, aleluaṙanyia-pfo.

¹⁰Koikyo ngacha ngyechikumbuo mawuto gakye, chandu awoṙe maṙeṙo mawicho galawoṙe kyiira; maa isho shekyemshika-pfo, kyipfa oe amonyi ekyeambilyia wana wa wama-wo waiṙikyie Ruwa-pfo; na walya wakundi iwaambilyia nekyewashingyia, na iwawuta siṟinyi.

¹¹Mkunde, ulakunde wuwicho, indi kunda wucha. Ulya ekyewuta wucha nyi o Ruwa, indi ulya ekyewuta mawicho alandewone Ruwa-pfo.

¹²Demetirio naṟingyishio nyi wandu woose, lyingyi-se na wuloi wulya wumonyi. Na soe taa loṟingyishia, na iyoe nuichi kye wuṟingyishi woṙu nyi loi.

¹³Ngyiwewoṙe shindo shifoi shekuṟeia kyaindi ngyikundi ikuṟeia kui wiino na kalamu-pfo.

¹⁴Kyaindi ngyikusaṟie ichekuwona mfiri ya kufuhi, na soe lochiṙeṙa ṙumbu kui ṙumbu.

¹⁵Ufoṟo kopfo. Mbuya tsaṙu tsakuiṟikyiṟa. Iṟikyiṟa mbuya-tso tsaṙu, orio mndu kui rina lyakye.