Read Kivunjo New Testament 1999 Ulogo 10 Bible Online

Ulogo 10 - Kivunjo New Testament 1999 bible

Ulogo 10

¹Numa ya iho ngawona malaika ungyi awoṙe pfinya echisoka iwuka ruwewu, amṟikye ipuchi; na mkoṟi o mvuo wuye ya mṙoe okye na kyaam kyakye kyiwekyeri cha mnengyeṟi, na maṙende gakye cha ngoe tsa moṙo.

²Na kuwokonyi nawewoṙe kyitapu kyitutu kyikyipfunguoe. Kawikyia kuṙende kokye ko kulyoe wuye ya ipalyipalyi, na ko kumoso wuye ya uruka.

³Na oe kafiiṟa na ṟui lying'anyi, chandu simba yekyesepfuo. Na kyiyeri alefiiṟa, makuṟuṟuma galya mfungaaṙe gakaṙeṙa.

⁴Na makuṟuṟuma mfungaaṙe gamṙeṙe, ngyiwekuṟeyeṟie iṟeia. Na inyi ngaicho ṟui iwuka ruwewu, lyechigamba, “Wika mbonyi-tsi tsingyiṙeṙe nyi makuṟuṟuma galya mfungaaṙe kyindo kyeloṟa kye nyi tsako; ulatsiṟeie.”

⁵Na malaika ulya ngyilemmbona, agoṟokyi ipalyipalyinyi na urukyenyi, kairia kuwoko kokye ko kulyoe ruwewu.

⁶Kalya nyamu kye ulya ai na moo mṟasa mlungana na mlungana, ulya agumbie ruwewu na shindo shoose shikyeri pfo, na uruka na shindo shoose shikyeri pfo, na ipalyipalyi na shindo shoose shikyeri pfo, kye kochiwaṙa kyiyeri numa ya ishi-pfo;

⁷sile mfiri iya ya ṟui lya malaika o mfungaaṙe kyiyeri echikuṟeyeṟa ikapa iganda. Iho nyilyo Ruwa echiafutsia wuṟikyi wokye, chandu aleongoya waṟundi wakye weonguo shisuku.

⁸Na ṟui lyilya ngyilelyiicho iwuka ruwewu lyileṙeṙa na inyi-se, lyechigamba, “Yenda, uire kyitapu kyilya kyikyipfunguoe kuwokonyi ko malaika ulya agoṟokyi wuye ya ipalyipalyi na uruka.”

⁹Ngayenda ko malaika ulya ngammbia nangyienengye kyitapu kyilya kyitutu. Kangyiwia, “Kyiire ukyilye, nakyo kyechikuenenga mawawio ndewunyi kopfo, indi ṙumbunyi kopfo kyechiloṙa cha wukyi.”

¹⁰Ngaambilyia kyitapu kyilya iwuka kuwokonyi ko malaika ulya, ngakyilya. Nakyo kyikaloṙa cha wukyi ṙumbunyi koko, na ngamkyilye ndewu yako ikawawa.

¹¹Wakangyiwia, “Kyikuwaṟi ionguo shisuku-se ko wandu na isanga na mṙeṙie na wamangyi wafoi.”