Read Kivunjo New Testament 1999 Ulogo 15 Bible Online

Ulogo 15 - Kivunjo New Testament 1999 bible

Ulogo 15

¹Numa ya iho ngawona kyiṟingyishio kyingyi ruwewu, kying'anyi; malaika mfungaaṙe wawoṙe ngapo tsa mafurumionyi; kyipfa ipfo ngaponyi nyashi ya Ruwa yaafukyia.

²Lyingyi-se ngawona kyindo kyikyeri cha ipalyipalyi lya kyiyewo lyilonganyi na moṙo, na walya wawingyie indo lyilya, na ifano lyalyo, lyilya rina lyalyo lyilyisende nyi itala lyilya, wawegoṟokyi mbai ya ipalyipalyi-lyo lya kyiyewo, wawoṙe ngyuuṙa tsa ndusu tsa Ruwa.

³Nawo waiimba kyiimbo kya Mose, mṟundi o Ruwa, na kyiimbo kya Kyiondo kya Ruwa, wechigamba, “Mawuto gapfo nyi gang'anyi, na ga maṟiyisho, iyoe Mndumii Ruwa Mopfinya; njia tsapfo nyi tsa wusumganyi na tsa loi, iyoe Mangyi o masanga.

⁴Nyi wui alekyekuowuo na ikuindia, Iyoe Mndumii, na iṟumisha rina lyapfo? Cha kyipfa iyoe kumonyi nukyeri Mweele; cha kyipfa masanga goose gechicha gaterewe na iindia mbele yapfo; cha kyipfa mawuto gapfo ga wusumganyi gamloṟo.”

⁵Na numa ya iho ngawona hekalu lya hema lya wuṟingyishi ruwewu lyechiṟuguka.

⁶Na malaika walya mfungaaṙe, wawoṙe ngapo mfungaaṙe, wakafuma hekalunyi, wawaṟikye nguwo ngyiilyi peṟu, tsiaka-aka, wawainewe mkanda ya sahapu shipootenyi shawo.

⁷Na umwi o walya waana wai na moo kaenenga malaika walya mfungaaṙe pakulyi mfungaaṙe tsa sahapu, tsiichuo nyashi ya Ruwa, ai na moo mṟasa mlungana na mlungana.

⁸Hekalu lyikaichuṟo mtsu ulewuka kyiṟuminyi kya Ruwa na mng'ano okye. Maa kuwoṙe mndu aleiṙima iiṙa na hekalunyi, mṟasa ngapo mfungaaṙe tsa malaika walya mfungaaṙe tsaafukyia-pfo.