Read Kivunjo New Testament 1999 Ulogo 18 Bible Online

Ulogo 18 - Kivunjo New Testament 1999 bible

Ulogo 18

¹Numa ya iho ngawona malaika ungyi, echisoka iwuka ruwewu, awoṙe wuchilyi wung'anyi; na uruka lukowaṙa ngyeela kyipfa kya kyiṟumi kyakye.

²Kafiiṟa na ṟui lying'anyi, echigamba, “Nooloka, nooloka Babelyi ung'anyi, nowa kanyi ko masatana, na moombo o orio mumuyo mmbicho, na moombo o orio kyileye kyiwicho kyekyeenenga wandu isuo;

³cha kyipfa masanga goose ganyo mpfinyo ya nyashi ya wuṟui wokye, na wamangyi wa uruka wamṟuguya, na wekapa mbucha wa uruka wawona masaa kui pfinya tsa wulanga wokye.”

⁴Numa ya iho ngaicho ṟui lyingyi iwuka ruwewu, lyechigamba, “Wukyenyi kokye, lanyoe wandu wako, mulawute ngyuunyamaṟi tsakye, maa mulaambilyie ngapo tsakye.

⁵Cha kyipfa ngyuunyamaṟi tsakye tsashika mṟasa ruwewu, na Ruwa nakumbuo mawicho ga Babelyi.

⁶Taenyi chandu oe aletaa, mundemtaa kawi iṙuana na mawuto gakye. Ichuṟenyi kyiṙoo kyakye kawi na kyindo kyenyo kyiwoṙe pfinya cha kyilya alerutsa wandu wengyi.

⁷Iṙuana na chandu alekuṙosa na iwuta shindo sha sia tsa wuyana, muenengyenyi mawawio na fowa wuṙo. Cha kyipfa nekyegamba mrimenyi kokye, ‘Ngyikyeri mangyi o kyika, maa chi mkusu-pfo, maa ngyechiwona fowa maa ale-pfo.’

⁸Kyipfa kya ikyo ngapo tsakye tsechicha mfiri umwi, upfu, na fowa, na njaa; na oe nechirumatso nakamwi kui moṙo. Cha kyipfa Mndumii Ruwa alemwanduya nyi monyi pfinya.”

⁹Na wamangyi-wo wa uruka, walemṟuguya na iwuta shindo sha sia tsa wuyana hamwi na oe, wechifiiṟa na ikapa ṟanyi kyipfa kyakye; kyiyeri wawona mtsu o iunguo lyakye;

¹⁰wechigoṟoka kuleshi kui wuowu wo mawawio gakye, wechigamba, “Ochia, ochia mṟi ulya ung'anyi, Babelyi, mṟi ulya uwoṙe pfinya! Cha kyipfa kui kyiyeri kyifuhi ianduyo lyapfo lyamcha.”

¹¹Na wekapa mbucha wa uruka waifiiṟa na ikapa ṟanyi kyipfa kyakye, cha kyipfa kuwoṙe mndu aiguṟa-se shindo shawo-pfo.

¹²Shindo sha sahapu, heleri, igoe lyiwoṙe woguru wung'anyi, lulu, nguwo ngyicha ya uwiṟo, nguwo tsa kyimaande-maande, hariri, nguwo tsa kyimaande, orio ikyiṙi lya uudi, orio kyindo kya membe, orio kyindo kya ikyiṙi kya woguru wung'anyi, kya aṟeṟa, kya menya na kya marimari.

¹³Na mdalasini, ilyikyi, uvumba, mafuṙa gekyepfaama necha, ubani, mpfinyo, mafuṙa ga mseituni, mso mcha, nganu, umbe, moondo, farasi, makari, mmbiu na mrima ya wandu.

¹⁴Na ndunda tsilelango nyi mrima opfo tsammbuka kopfo; na shindo shoose shishiwiriwiri na shindo shoose sha wulole shamṙeka na iwuka kopfo; maa wandu wechishiwona-se maa ale-pfo.

¹⁵Na wekapa mbucha ya shindo-sho, walewona heleri kokye, wechigoṟoka kuleshi, kui wuowu wo mawawio gapfo; wechifiiṟa na ikapa ṟanyi,

¹⁶wechigamba, “Ochia, ochia, mṟi ulya ung'anyi, na ichopo nyi sahapu, na igoe lya woguru wung'anyi, na lulu,

¹⁷cha kyipfa kyiyeri kyifui tupu wunjama wung'anyi kuṙi wowa wukyiwa.” Na orio mndu ekyeṙuo kyindo kyekyeiṙa ipalyipalyinyi cha ngalawa, na orio mndu ekyeyenda handu kui matanga, na waṟundi wa shindo shekyeiṙa mapalyipalyinyi, na woose wekyeṟunda mapalyipalyinyi, wakagoṟoka kuleshi,

¹⁸wakafiiṟa mnu, kyiyeri walewona mtsu o iunguo lyakye, wechigamba, “Nyi mṟi uha ukyeri mfano o mṟi-chu ung'anyi?”

¹⁹Wakawiyitsa kyilulyi wuye ya mṙoe yawo, wakafiiṟa, wechitonyitsa mcheṟeṟe na ikapa ṟanyi, wechigamba, “Ochia, ochia, mṟi ulya ung'anyi; ulya kyiiṙi kyacho woose wawoṙe ngalawa mapalyipalyinyi walewona masaa kui wunjama wo mṟi-cho; kyipfa kyiyeri kyifuhi tupu owa wukyiwa.”

²⁰Chihiyonyi kyipfa kyacho, lanyoe wandu mokyekaa ruwewu, na nyoe wandu wa Ruwa na wasu na weonguo shisuku; cha kyipfa Ruwa amwuuanduya kyipfa kya shindo ulemmbutia nyoe.

²¹Na malaika umwi awoṙe pfinya kaira igoe, igoe lying'anyi cha ikyesa, kalyiwiyitsa ipalyipalyinyi, echigamba, “Kuṙi kui pfinya ing'anyi, mṟi o Babelyi ochiwiyitso; mṟi ulya ung'anyi, maa ochiwono-se maa ale-pfo.

²²Maa ṟui lya wekapa shinanda, lya wekapa zomari, lya wekapa mtoṟiṟo na lya wekapa maganda, kuwoṙe mndu echilyiicho-se kopfo-pfo. Maa mwaaria o iṟunda lyoose echiwono kopfo maa ale-pfo; maa ṟui lya ikyesa kuwoṙe mndu echilyiicho kopfo-pfo.

²³Maa ngyeela ya taa yechilyimika-se kopfo-pfo; maa ṟui lya monyi-wolyi na mpora okye kuwoṙe mndu echilyiicho-se kopfo-pfo. Kyipfa wekapa mbucha-wo wapfo wawei wang'anyi wa uruka, cha kyipfa masanga goose galelembo nyi wusawi wopfo.”

²⁴Na kokye kulewono samu ya weonguo shisuku, na ya wandu wa Ruwa, na ya woose walewoogo urukyenyi.